വളരെ അനുകൂലമായ കര്‍ഷക സമരം ഒറ്റ ദിനം കൊണ്ട് തല്ലിത്തകര്‍ത്തത് പോലെയാണ് ഇന്നലെയുണ്ടായ അക്രമങ്ങള്‍. റിപ്പബ്ലിക് ദിനത്തില്‍ തന്നെ ഇന്ത്യയുടെ അഭിമാനമായ ചെങ്കോട്ട കീഴടക്കി കൊടി നാട്ടിയതാണ് ജനങ്ങളുടെ മനസ് മാറിയത്.

എന്തിന്റെ പേരിലായാലും ഇതുണ്ടാകാന്‍ പാടില്ലാത്തതാണ്. ഇന്ത്യന്‍ ദേശീയ പതാക മാറ്റി 'ഖാലിസ്ഥാന്‍' കൊടി നാട്ടിയെന്ന പ്രചാരണം വ്യപകമായി. ഇതോടെയാണ് കര്‍ഷക സംഘടനകള്‍ക്ക് അക്രമ സമരത്തെ തള്ളിപ്പറയേണ്ടി വന്നത്. അതിനിടെ അവര്‍ക്ക് തന്നെ ദേശീയ പതാകയെ അപമാനിച്ചിട്ടില്ലെന്ന് തെളിയിക്കേണ്ടിയും വന്നു.

ഡല്‍ഹിയിലേക്കുള്ള കര്‍ഷകരുടെ ട്രാക്ടര്‍ റാലി പ്രക്ഷോഭത്തിനിടെ അവര്‍ ചെങ്കോട്ടയ്ക്ക് മേല്‍ സ്ഥാപിച്ചിട്ടുള്ള ദേശീയ പതാക മാറ്റി അവിടെ 'ഖാലിസ്ഥാന്‍' കൊടി സ്ഥാപിച്ചെന്ന് പറഞ്ഞുകൊണ്ട് സോഷ്യല്‍ മീഡിയ വഴി വ്യാപക പ്രചരണമാണ് നടക്കുന്നത്. നിരവധി വലതുപക്ഷ, തീവ്ര വലതുപക്ഷാനുകൂലികള്‍ ഇക്കാര്യം പറഞ്ഞുകൊണ്ട് സോഷ്യല്‍ മീഡിയ വഴിയും മറ്റും രംഗത്ത് വരികയും ചെയ്തു.

എന്നാല്‍ ചെങ്കോട്ടയ്ക്ക് മുകളിലെ ദേശീയ പതാക മാറ്റിക്കൊണ്ട് അവിടെ 'ഖാലിസ്ഥാന്‍' കൊടി കര്‍ഷകര്‍ സ്ഥാപിച്ചുവെന്ന വാദം പൂര്‍ണമായും വാസ്തവ വിരുദ്ധമാണെന്നാണ് വസ്തുതാ പരിശോധനാ വെബ്‌സൈറ്റായ 'ആള്‍ട്ട്‌ന്യൂസ്' തെളിവുകളോടെ ചൂണ്ടിക്കാട്ടുന്നത്. ദേശീയ പതാക നീക്കിയില്ല പ്രക്ഷോഭകര്‍ ചെങ്കോട്ടയ്ക്ക് മുകളിലുള്ള ദേശീയ പതാക നീക്കം ചെയ്യുകയോ പതാകയെ താഴേക്ക് മാറ്റി കെട്ടുകയോ ചെയ്തിട്ടില്ല. പ്രക്ഷോഭ സമയത്ത് ചിത്രീകരിക്കപ്പെട്ട ചെങ്കോട്ടയുടെ എല്ലാ ദൃശ്യങ്ങളിലും ദേശീയ പതാക യഥാസ്ഥാനത്ത് തന്നെയുള്ളതായാണ് കാണുന്നത്. മാദ്ധ്യമങ്ങള്‍ പുറത്തുവിട്ട ദൃശ്യങ്ങളില്‍ നിന്നും ഇത് വ്യക്തമാണ്.

മാത്രമല്ല, ലാഹോര്‍ ഗേറ്റിന് (ചെങ്കോട്ടയിലേക്കുള്ള പ്രവേശന മാര്‍ഗം) മുകളില്‍ ദേശീയ പതാക നാട്ടിയിരിക്കുന്ന ഫ്‌ലാഗ്‌പോളിന് അടുത്തുള്ള മറ്റൊരു ശൂന്യമായ ഫഌഗ് പോളിലേക്ക് പ്രക്ഷോഭകരില്‍ ഒരാള്‍ പിടിച്ചുകയറുന്ന ദൃശ്യങ്ങളും പുറത്തുവന്നിട്ടുണ്ട്. ദേശീയ പതാക നാട്ടിയിട്ടുള്ളതിനും താഴെയായിട്ടാണ് പ്രക്ഷോഭകര്‍ തങ്ങളുടെ കൊടികള്‍ നാട്ടിയതെന്നതും വ്യക്തമാണ്. ഈ ഫ്‌ളാഗ്‌പോള്‍ കൂടാതെ ചെങ്കോട്ടയിലെ ഒരു താഴികക്കുടത്തിന് മുകളിലും കര്‍ഷകര്‍ തങ്ങളുടെ കൊടി നാട്ടിയിട്ടുണ്ട്.

അതേസമയം പ്രക്ഷോഭകര്‍ നാട്ടിയത് 'ഖാലിസ്ഥാന്‍' കൊടിയാണെന്നുള്ള വാദവും 'ആള്‍ട്ട്‌ന്യൂസ്' തള്ളിക്കളയുന്നുണ്ട്. സിഖ് മതവിശ്വാസവുമായി ബന്ധപ്പെട്ട 'നിഷാന്‍ സാഹിബ്' എന്ന് വിളിക്കപ്പെടുന്ന കാവി നിറമുള്ള കൊടിയാണ് കര്‍ഷകര്‍ ദേശീയ പതാകയ്ക്ക് താഴെയായി സ്ഥാപിച്ചത്. ഇതോടൊപ്പം സ്ഥാപിക്കപ്പെട്ട മറ്റൊരു മഞ്ഞ നിറമുള്ള കൊടി ഭാരതീയ കിസാന്‍ യൂണിയന്റെ (ഉഗ്രഹാന്‍) കൊടിയാണെന്നും വിവരമുണ്ട്.

സിഖ് മതവിശ്വാസികളുടെ 'ഖണ്ഡ' എന്ന ചിഹ്നം ഉള്‍ക്കൊള്ളുന്ന കാവി, മഞ്ഞ എന്നീ നിറങ്ങളില്‍ കാണപ്പെടുന്ന ഈ കൊടികളെയാണ് വലതുപക്ഷ സോഷ്യല്‍ മീഡിയാ ഗ്രൂപ്പുകളും മറ്റും 'ഖാലിസ്ഥാന്‍' കൊടിയെന്ന് വിശേഷിപ്പിച്ചത്. റിപ്പബ്ലിക് ഡേ പരേഡുകളിലെ ഫ്‌ളോട്ടുകളില്‍ ഉള്‍പ്പെടെ 'നിഷാന്‍ സാഹിബ്' പ്രദര്‍ശിപ്പിക്കാറുണ്ട്.

സിഖ് വംശജരുടെ ആത്മാഭിമാനത്തിന്റെയും വ്യക്തിത്വത്തിന്റെയും ബിംബമായ കൊടികള്‍ സ്ഥാപിക്കുന്നതിലൂടെ കേന്ദ്ര സര്‍ക്കാരിന് ശക്തമായ സന്ദേശം നല്‍കുകയായിരുന്നു പ്രക്ഷോഭകരെന്ന് 'പഞ്ചാബ് ജേര്‍ണി ത്രൂ ഫോള്‍ട്ട് ലൈന്‍സ്' എന്ന പുസ്തകം രചിച്ച അമന്‍ദീപ് സന്ധു പറയുന്നു. 'തങ്ങളെ ഇനിയും സര്‍ക്കാരിന് അവഗണിക്കാന്‍ കഴിയില്ല എന്ന സന്ദേശമാണ് അവര്‍ നല്‍കിയതെ'ന്നും സന്ധു കൂട്ടിച്ചേര്‍ത്തു. എന്തായാലും ന്യായങ്ങള്‍ വരുമ്പോഴും ഇത്രയും വേണ്ടിയിരുന്നോ എന്ന ചോദ്യമാണ് പൊതുവേ ഉയരുന്നത്.