കാര്യങ്ങള് കൈവിടുന്നു... ട്രാക്ടര് റാലിയിലും ചെങ്കോട്ടയിലും കര്ഷക പ്രതിഷേധത്തിന്റെ പേരില് നടത്തിയ അതിക്രമങ്ങളില് പരിക്കേറ്റ പോലീസുകാരുടെ എണ്ണം 109 ആയി; രാഷ്ട്രീയ പാര്ട്ടികളും ക്രിമിനലുകളും നുഴഞ്ഞ് കയറിയെന്ന് ആരോപണം ശക്തം; ചെങ്കോട്ടയില് അക്രമം നടത്തിയത് തങ്ങളല്ലെന്ന് കര്ഷക സമര സമിതി; സര്ക്കാര് നിയമനടപടികള് എടുക്കണം
റിപ്പബ്ലിക് ദിനത്തില് രാജ്യത്തെ അപമാനിക്കാന് നടത്തിയ ആക്രമണങ്ങളില് 109 പോലീസുകാര്ക്കാണ് ഇതുവരെ പരിക്കേറ്റത്. കര്ഷകരെ കയ്യൂക്ക് കൊണ്ട് നേരിടേണ്ടെന്ന് തീരുമാനിച്ചതോടെയാണ് ഇത്രയും പോലീസുകാര്ക്ക് പരിക്കേറ്റത്.
83 പൊലീസുകാര്ക്ക് ട്രാക്ടര് റാലിക്കിടയിലാണ് പരിക്കേറ്റത്. 29 പേര്ക്ക് ചെങ്കോട്ടയിലെ അക്രമത്തിനിടയിലാണ് പരിക്കേറ്റത്. ഇവരെല്ലാവരും ചികിത്സയിലാണ്. ഒരു പോലീസുകാരന്റെ നില ഗുരുതരമാണ്. ഇവരില് ഭൂരിഭാഗത്തെയും ദല്ഹിയിലെ എല്എന്ജെപി ആശുപത്രിയില് പ്രവേശിപ്പിച്ചു.
റൂട്ട് മാപ് തെറ്റിച്ച് ദല്ഹി നഗരത്തിനുള്ളിലേക്ക് കടക്കാന് ശ്രമിച്ചപ്പോഴാണ് പൊലീസുകാര് കര്ഷകരെ തടയാന് ശ്രമിച്ചത്. ഏറ്റുമുട്ടലും അക്രമവും ഒന്നരമണിക്കൂര് നീണ്ടു.
കര്ഷകരില് ചിലര് ആള്ക്കൂട്ടത്തിലേക്ക് ട്രാക്ടര് ഓടിച്ചതിലും നിരവധി പോലീസുകാര്ക്ക് പരിക്കേറ്റു. അക്രമികളില് പലരും വടിയും ചങ്ങലയും ഉപയോഗിച്ച് പൊലീസിനെ ആക്രമിച്ചു. പിന്നീട് ചെങ്കോട്ടയില് കടന്ന അക്രമികളുമായുള്ള ഏറ്റുമുട്ടലിലും പൊലീസുകാര്ക്ക് പരിക്ക് പറ്റി.
അതേസമയം റിപ്പബ്ലിക് ദിനത്തില് രാജ്യതലസ്ഥാനത്ത് അക്രമം നടത്തിയത് കര്ഷക സമരത്തില് മറവില് നുഴഞ്ഞ് കയറിയ രാഷ്ട്രീയ പാര്ട്ടികളും ക്രിമിനലുകളുമാണെന്ന് സംയുക്ത സമരസമിതി നേതാക്കള് വ്യക്തമാക്കി. തങ്ങള് സമാധാന പൂര്ണമായാണ് സമരം നയിക്കുന്നത്. അക്രമങ്ങളില് വിശ്വസിക്കുന്നില്ല. ചെങ്കോട്ടയില് കടന്നു കയറിയവരും നിയമം ലംഘിച്ച് ട്രാക്ടര് റാലി നടത്തിയവരും തങ്ങള്ക്കൊപ്പമുള്ളവരല്ല. അക്രമികള്ക്കെതിരെ സര്ക്കാര് നിയമ നടപടികള് എടുക്കണമെന്നും ഇവര് അറിയിച്ചു. അക്രമം നടത്തിയവര് പുറത്തുനിന്നും വന്നവരാണ്. നഗരഹൃദയത്തില് എത്തിയത് സംയുക്ത സമിതിയിലുള്ളവരല്ലന്നും ഇവര് പറഞ്ഞു. പലയിടങ്ങളിലും പോലീസും കര്ഷകരും തമ്മില് സംഘര്ഷം ശക്തമായി. കല്ലേറും നടന്നു.
മുന്കൂട്ടി നിശ്ചയിച്ച എല്ലാ വഴികളും ഉപേക്ഷിച്ച് ദല്ഹി നഗര ഹൃദയത്തിലേക്ക് അക്രമികള് ഇരച്ചുകയറുകയായിരുന്നു. ഇതേത്തുടര്ന്ന് വലിയ സംഘര്ഷമാണ് ദല്ഹിയില് അരങ്ങേറുന്നത്. നിരവധി പോലീസുകാര്ക്കും കര്ഷകര്ക്കും പരുക്കേറ്റു. ചെങ്കോട്ടയ്ക്കു മുകളില് കയറിയ കര്ഷകരില് ചിലര് കൊടി ഉയര്ത്തിയതും വിവാദമായി.
നഗരഹൃദയമായ ഐടിഒയില് കര്ഷകരെ തുരത്താന് പോലീസ് രാത്രി വൈകിയും ശ്രമിച്ചുകൊണ്ടിരുന്നു. ട്രാക്ടറുകള് ഉപയോഗിച്ച് ബാരിക്കേഡുകള് മറികടന്ന് കര്ഷകര് മുന്നോട്ടു നീങ്ങിയതോടെ റോഡില് കുത്തിയിരുന്ന് പോലീസ് പ്രതിരോധം തീര്ക്കാന് ശ്രമിച്ചു. കര്ഷകരും പോലീസും തമ്മില് കല്ലേറുണ്ടായി. സെന്ട്രല് ഡല്ഹിയില് പോലീസിനെ ആക്രമിക്കുകയും പോലീസ് വാഹനം തകര്ക്കാന് ശ്രമിക്കുകയും ചെയ്തു. ഇതോടെ കര്ഷകരെ പിരിച്ചുവിടാന് പോലീസ് കണ്ണീര്വാതകം പ്രയോഗിച്ചു.
ബാരിക്കേഡ് മറികടക്കാന് പലയിടത്തും കര്ഷകര് ശ്രമിച്ചത് സംഘര്ഷത്തിനിടയാക്കി. മാര്ച്ചിനു നേരെ പൊലീസ് നടപടി ആരംഭിച്ചതോടെ നിരവധി പേര്ക്ക് പരുക്കേറ്റു. ട്രാക്ടറുകളുടെ ടയറിന്റെ കാറ്റ് പോലീസ് അഴിച്ചുവിട്ടതോടെ ട്രാക്ടറുകള് ഉപേക്ഷിച്ച് കര്ഷകര് പിന്വാങ്ങിയെങ്കിലും വീണ്ടും തിരികെ എത്തി പോലീസുമായി ഏറ്റുമുട്ടുകയായിരുന്നു. ഇതോടെയാണ് കാര്യങ്ങള് കൈവിട്ടത്.
"
https://www.facebook.com/Malayalivartha
