പ്രതിപക്ഷ നേതാവ് രമേശ് ചെന്നിത്തലയെ കോണ്‍ഗ്രസ് കറിവേപ്പില പോലെ അടുത്തു കളഞ്ഞെന്ന് ബിജെപി സംസ്ഥാന അദ്ധ്യക്ഷന്‍ കെ.സുരേന്ദ്രന്‍. അഞ്ച് വര്‍ഷം പ്രതിപക്ഷ നേതാവായിരുന്ന രമേശ് ചെന്നിത്തലയെ കറിവേപ്പില പോലെ എടുത്ത് കളഞ്ഞിട്ടാണ് ഉമ്മന്‍ചാണ്ടിയെ കൊണ്ടുവന്നത്. ഇത് ആരുപറഞ്ഞിട്ടാണ്? പാണക്കാട്ട് നിന്നുളള നിര്‍ദ്ദേശപ്രകാരമാണോയെന്നും സുരേന്ദ്രന്‍ ചോദിച്ചു.

തിരഞ്ഞെടുപ്പ് സമിതിയുടെ അധ്യക്ഷനായി ഉമ്മന്‍ചാണ്ടിയെ നിയമിച്ച കോണ്‍ഗ്രസ് ഹൈക്കമാന്റ് തീരുമാനത്തോട് നന്ദി പറയേണ്ടി വരുമെന്ന് പരിഹാസവും സുരേന്ദ്രന്‍ നടത്തി. ഉമ്മന്‍ചാണ്ടിയെയും പിണറായി വിജയനെയും ഒരുപോലെ തുറന്നുകാട്ടാനുളള വഴിയാണ് ഇതിലൂടെ ഒരുങ്ങിയിരിക്കുന്നത്. അഞ്ച് വര്‍ഷം മുന്‍പുളള കാര്യങ്ങളെ ഓര്‍മ്മിപ്പിക്കാനുളള അവസരമാണ് ഉമ്മന്‍ചാണ്ടിയെ മടക്കി കൊണ്ടുവന്നതിലൂടെ ഹൈക്കമാന്റ് ഉണ്ടാക്കിയതെന്നും വാര്‍ത്താസമ്മേളനത്തില്‍ കെ.സുരേന്ദ്രന്‍ പറഞ്ഞു.

കോവിഡ് പടരുന്നതിന് കാരണം സംസ്ഥാനത്ത് ജനസാന്ദ്രത കൂടുതലാണെന്ന് പറഞ്ഞ ആരോഗ്യമന്ത്രിയുടെ വാദം വിവരക്കേടാണ്. കേരളത്തെക്കാള്‍ ജനസാന്ദ്രതയുളള മഹാനഗരങ്ങളില്‍ കൊവിഡ് നിയന്ത്രണ വിധേയമായെന്നും ആരോഗ്യമന്ത്രി വിവരക്കേട് പറയുകയാണെന്നും സുരേന്ദ്രന്‍ പറഞ്ഞു.രാജ്യം കൊവിഡിനെ കീഴടക്കിയപ്പോള്‍ സംസ്ഥാനം കൊവിഡിന് കീഴടങ്ങിയെന്നും സുരേന്ദ്രന്‍ പരിഹസിച്ചു. ടെസ്റ്റ് പോസിറ്റീവിറ്റി നിരക്ക് പതിനഞ്ചിനോട് അടുക്കുമ്പോഴും നിയന്ത്രിക്കാനുളള നടപടി ആരോഗ്യവകുപ്പോ സംസ്ഥാന സര്‍ക്കാരോ എടുക്കുന്നില്ലെന്നും ആരോഗ്യമന്ത്രി കെ.കെ ശൈലജ ഉറങ്ങുകയാണോയെന്നും സുരേന്ദ്രന്‍ പരിഹസിച്ചു.