സമാനതകളില്ലാത്ത പാര്പിട വികസനമാണ് ലൈഫ് മിഷനിലൂടെ സര്ക്കാര് നടപ്പാക്കിയതെന്ന് മുഖ്യമന്ത്രി; എല്ലാവര്ക്കും അന്തസ്സോടെ ജീവിക്കാനുള്ള അവകാശം ഊട്ടിയുറപ്പിക്കുകയാണ് സര്ക്കാര്, ലൈഫ് മിഷനിലൂടെ രണ്ടര ലക്ഷം വീടുകള് പൂര്ത്തിയാക്കി
സമാനതകളില്ലാത്ത പാര്പിട വികസനമാണ് ലൈഫ് മിഷനിലൂടെ സര്ക്കാര് നടപ്പാക്കിയതെന്ന് മുഖ്യമന്ത്രി പിണറായി വിജയന് വ്യക്തമാക്കുകയുണ്ടായി. രാജ്യത്തു തന്നെ ഇതിനു മുമ്പ് ഇത്തരമൊരു പദ്ധതി നടപ്പാക്കിയിട്ടില്ല. എല്ലാവര്ക്കും അന്തസ്സോടെ ജീവിക്കാനുള്ള അവകാശം ഊട്ടിയുറപ്പിക്കുകയാണ് സര്ക്കാര് ചെയ്യുന്നത്. ലൈഫ് മിഷനിലൂടെ രണ്ടര ലക്ഷം വീടുകള് പൂര്ത്തിയാക്കിയതിന്റെ പ്രഖ്യാപനം വീഡിയോ കോണ്ഫറന്സു വഴി നിര്വഹിച്ചുകൊണ്ടാണ് ഇത്തരത്തിൽ പറഞ്ഞത്.
നാലര വര്ഷം പിന്നിട്ട എല്ഡിഎഫ് സര്ക്കാരിന് അങ്ങേയറ്റം അഭിമാനം പകരുന്ന പ്രഖ്യാപനമാണ് ഇതെന്ന് മുഖ്യമന്ത്രി പറയുകയുണ്ടായി. ഇതിലൂടെ 2,50,547 വീടുകളാണ് പൂര്ത്തിയായത്. ഇതു വഴി പത്തു ലക്ഷത്തിലേറെ പേര്ക്ക് വീടെന്ന സ്വപ്നം യാഥാര്ത്ഥ്യമായിരിക്കുന്നു. കേരളത്തില് ഇത് വലിയ മാറ്റമാണ് ഉണ്ടാക്കുന്നത്. ഇനിയും അടച്ചുറപ്പില്ലാത്ത വീടുകളില് കഴിയുന്ന ധാരാളം പേരുണ്ട്. അവരില് നിന്ന് ലഭിച്ച അപേക്ഷകള് സര്ക്കാര് പരിശോധിച്ചുകൊണ്ടിരിക്കുകയാണ്. അര്ഹരായ എല്ലാവര്ക്കും വീട് നല്കാനാണ് തീരുമാനമെന്നും മുഖ്യമന്ത്രി സമ്മേളനത്തിൽ പറഞ്ഞു.
അതോടൊപ്പം തന്നെ എല്ഡിഎഫ് സര്ക്കാരിന്റെ വികസന കാഴ്ചപ്പാടിന്റെ ഭാഗമാണ് ലൈഫ് മിഷന്. സര്ക്കാര് അധികാരമേറ്റ ഉടനെ നാലു മിഷനുകളാണ് രൂപീകരിച്ചത്. എന്തിനാണ് മിഷനുകള് എന്ന് ചോദിച്ചവരുണ്ട്. എന്നാല്, കാര്യങ്ങള് മികച്ച രീതിയില് നടപ്പാക്കാന് ഇതുവഴി കഴിഞ്ഞുവെന്ന് ഇപ്പോള് വ്യക്തമായെന്നും മുഖ്യമന്ത്രി ഇതിലൂടെ അഭിപ്രായപ്പെടുകയുണ്ടായി.
https://www.facebook.com/Malayalivartha