പാവങ്ങളുടെ ഗുജറാത്താണ് തിരുവനന്തപുരത്തെ നേമം. ഒരിക്കല്‍ ഒരു രാജഗോപാലിനെ ജയിപ്പിച്ചെന്നു കരുതി എപ്പോഴും ജനം അങ്ങനെ ചിന്തിക്കണമെന്നില്ല. തോറ്റ് തോറ്റ് ഒരു ഗതിയും പരഗതിയും ഇല്ലാതെ അലഞ്ഞ രാജഗോപാലിന് തലസ്ഥാന നിവാസികള്‍ നല്‍കിയ സമ്മാനമാണ് പാവങ്ങളുടെ ഗുജറാത്തായ നേമം.

ആ നേമം ഇത്തവണ നല്‍കിയത് രാജഗോപാലിനെ പോലെ തോറ്റ് തോറ്റ് നിന്ന കുമ്മനം രാജശേഖരനാണ്. ജയിക്കാന്‍ കഴിഞ്ഞ തെരഞ്ഞെടുപ്പുകളില്‍ പല അവസരങ്ങളുണ്ടായിട്ടും കമ്മ്യൂണിസ്റ്റുകാരും കോണ്‍ഗ്രസുകാരും പരസ്പരം സഹായിച്ച് കുമ്മനത്തെ കെട്ടുകെട്ടിച്ചിരുന്നു.

ഇപ്പം ഉമ്മന്‍ചാണ്ടിയെ രക്തസാക്ഷിയാക്കാനുള്ള കോണ്‍ഗ്രസുകാരുടെ ശ്രമം ചങ്കില്‍ കൊള്ളുന്നത് കുമ്മനത്തിന് തന്നെയാണ്. പാവങ്ങളുടെ ഗുജറാത്ത് കൈയ്യേറാന്‍ ഉമ്മന്‍ചണ്ടി എങ്ങാനും വരുമോ എന്നാണ് സകലരും ചോദിക്കുന്നത്.

അതേസമയം ഉമ്മന്‍ചാണ്ടിക്ക് പാവങ്ങളുടെ ഗുജറാത്തില്‍ കയറി കളിക്കാന്‍ അത്ര ധൈര്യം പോര. നമ്മള് പുതുപ്പള്ളിയില്‍ ശേഷിച്ച കാലം തങ്ങിക്കോളാം എന്നാണ് ഉമ്മന്‍ ചാണ്ടിയുടെ സ്റ്റൈല്‍. തന്റെ ജീവിതം പുതുപ്പള്ളിയുമായി അലിഞ്ഞു കിടക്കുന്നതാണെന്നും ആജീവനാന്തം അതില്‍ മാറ്റം ഉണ്ടാകില്ലെന്നും ഉമ്മന്‍ചാണ്ടി. ഇത്തവണ പുതുപ്പള്ളി സീറ്റ് ഒഴിവാക്കി തലസ്ഥാന ജില്ലയില്‍നിന്നു നിയമസഭയിലേക്ക് മത്സരിക്കുമെന്ന പ്രചാരണങ്ങളോട് പ്രതികരിക്കുകയായിരുന്നു അദ്ദേഹം.

കോണ്‍ഗ്രസില്‍ സ്ഥാനാര്‍ഥി നിര്‍ണയം തുടങ്ങുംമുമ്പേ തന്റെ സ്ഥാനാര്‍ഥിത്വവുമായി ബന്ധപ്പെട്ട് നടക്കുന്ന പ്രചാരണം അടിയന്തരമായി അവസാനിപ്പിക്കണം. കോണ്‍ഗ്രസ് ഹൈക്കമാന്‍ഡും കെ.പി.സി.സി. നേതൃത്വവുമാണ് സ്ഥാനാര്‍ഥികളെ നിശ്ചയിക്കുന്നതെന്നും അദ്ദേഹം പറഞ്ഞു.

ഉമ്മന്‍ചാണ്ടിയെ തലസ്ഥാനത്ത് നിന്ന് മത്സരിപ്പിക്കാന്‍ കോണ്‍ഗ്രസിനുള്ളില്‍ നീക്കമെന്ന തരത്തിലാണ് വാര്‍ത്ത പ്രചരിച്ചത്. തിരുവനന്തപുരം, നേമം, വട്ടിയൂര്‍ക്കാവ് മണ്ഡലങ്ങളില്‍ എവിടെയെങ്കിലും മത്സരിപ്പിക്കുമെന്നും പ്രചാരണമുണ്ടായി. പകരം അദ്ദേഹം 50 വര്‍ഷമായി പ്രതിനിധീകരിക്കുന്ന പുതുപ്പള്ളിയില്‍ മകന്‍ ചാണ്ടി ഉമ്മനെ മത്സരിപ്പിക്കാനാണു നീക്കമെന്നും വാര്‍ത്തവന്നു. ഇതേത്തുടര്‍ന്നാണ് ഉമ്മന്‍ചാണ്ടി നിഷേധക്കുറിപ്പ് പുറത്തിറക്കിയത്.

ഉമ്മന്‍ ചാണ്ടി പുതുപ്പള്ളിയില്‍ തന്നെയാകും മത്സരിക്കുകയെന്നു കെ.പി.സി.സി. പ്രസിഡന്റ് മുല്ലപ്പള്ളി രാമചന്ദ്രന്‍. നേമത്തെ വെല്ലുവിളി ഏറ്റെടുക്കണമെന്നു നേരത്തെ ചര്‍ച്ച ഉണ്ടായിരുന്നതാണ്. പക്ഷേ, അതു പാര്‍ട്ടിക്ക് പുറത്തായിരുന്നു. നേമത്തെ സ്ഥാനാര്‍ഥി വെല്ലുവിളി ഏറ്റെടുക്കാന്‍ ഉമ്മന്‍ ചാണ്ടി പ്രാപ്തനാണെന്നും മുല്ലപ്പള്ളി പറഞ്ഞു.

പുതുപ്പള്ളി വിട്ട് ഉമ്മന്‍ചാണ്ടി തിരുവനന്തപുരത്ത് മത്സരിച്ചേക്കുമെന്നാണ് റിപ്പോര്‍ട്ടുകള്‍ വന്നിരുന്നു. ഉമ്മന്‍ചാണ്ടി തിരുവനന്തപുരത്ത് മത്സരിക്കുകയാണെങ്കില്‍ തെക്കന്‍ കേരളത്തില്‍ വന്‍ചലനം സൃഷ്ടിക്കാന്‍ കോണ്‍ഗ്രസിന് സാധിക്കുമെന്ന് ഒരു വിഭാഗം നേതാക്കള്‍ അഭിപ്രായം പ്രകടിപ്പിച്ചിരുന്നു. പുതുപ്പള്ളിയില്‍ അദ്ദേഹത്തിന്റെ മകന്‍ ചാണ്ടി ഉമ്മനെ നിറുത്തി സീറ്റ് ഭദ്രമാക്കാനും കോണ്‍ഗ്രസില്‍ ആലോചന പുരോഗമിക്കവെയാണ്, അതെല്ലാം തള്ളി ഉമ്മന്‍ചാണ്ടി തന്നെ രംഗത്തുവന്നത്.

ഉമ്മന്‍ചാണ്ടിയെ കൊണ്ടുവരുന്നതിലൂടെ തെക്കന്‍ കേരളത്തില്‍ കൂടുതല്‍ സീറ്റുകള്‍ നേടിയെടുക്കാമെന്നും, ബിജെപിയുടെ കുതിപ്പ് തടയാന്‍ സാധിക്കുമെന്നും വിലയിരുത്തലുണ്ട്. അതേസമയം, എവിടെ മത്സരിച്ചാലും ഉമ്മന്‍ചാണ്ടി ജയിക്കുമെന്നാണ് കെപിസിസി അദ്ധ്യക്ഷന്‍ മുല്ലപ്പള്ളി രാമചന്ദ്രന്‍ പ്രതികരിച്ചത്.

ഉമ്മന്‍ചാണ്ടിയെ നേമത്ത് മത്സരിപ്പിക്കാനാണ് മുല്ലപ്പള്ളിക്ക് താല്‍പര്യമെന്നാണ് അറിയുന്നത്. എന്തായാലും ഉമ്മന്‍ചാണ്ടി വരരുതേ എന്നായിരിക്കും കുമ്മനം ആഗ്രഹിക്കുന്നത്. ഇനിയെങ്ങാനും വന്നാല്‍ രക്തസാക്ഷി ഉമ്മന്‍ചാണ്ടി എന്ന പേരും വരും.