ഇഡി ഒന്നൊന്നായി പൊക്കുന്നു... കിഫ്ബി മസാല ബോണ്ടിനെതിരെ ആഞ്ഞടിച്ച നിര്മ്മല സീതാരാമന്റെ ശബ്ദം കേട്ടതോടെ ഇഡി ഉണര്ന്നു; രണ്ട് ദിവസത്തിനകം പഴയ വീര്യം കൈവരിച്ച് ഇഡി; സ്വര്ണത്തിനും ഡോളറിനും ഈന്തപ്പഴത്തിനും പുറകേപോയ ഇഡി പൊങ്ങിയത് കിഫ്ബിയില്; തെരഞ്ഞെടുപ്പ് കമ്മീഷനില് പരാതിയുമായി മുഖ്യമന്ത്രി
കിഫ്ബി വിവാദത്തിന് തുടക്കമിട്ട തോമസ് ഐസക് സ്വപ്നത്തില് പോലും വിചാരിച്ചില്ല നിര്മ്മല സീതരാമന് ഇങ്ങനെയൊരു പണി പറ്റിക്കുമെന്ന്. വെറുതേ കെ. സുരേന്ദ്രന്റെ യാത്രയില് പങ്കെടുത്ത് അമ്പമ്പോ എന്നതാ ഈ കിഫ്ബി എന്ന് നാല് ഭാഷകളില് ചോദിച്ചതേയുള്ളൂ.
സ്വര്ണവും ഡോളറും ഈന്തപ്പഴവും അന്വേഷിച്ച് എങ്ങുമെങ്ങുമെത്താത്തതിനാല് കിടന്നുറങ്ങിയ ഇഡി ഞെട്ടിയുണര്ന്നു. പിന്നെ സംഭവിച്ചതോ കിഫ്ബിയിലെ പ്രമുഖര് ഇഡി ഓഫീസില്.
നാളെ ഹാജരാകണമെന്നാവശ്യപ്പെട്ട് കിഫ്ബി സിഇഒ കെ എം അബ്രഹാമിന് എന്ഫോഴ്സ്മെന്റ് ഡയറക്ടറേറ്റിന്റെ നോട്ടീസ് ലഭിച്ചിരിക്കുകയാണ്. ഇന്ന് ഹാജരാകണമെന്നാവശ്യപ്പെട്ട് ഡെപ്യൂട്ടി മാനേജിംഗ് ഡയറക്ടര് വിക്രം ജിത് സിങ്ങിനും നോട്ടീസ് നല്കിയിട്ടുണ്ട്.
നേരത്തേ, വിദേശനാണയ പരിപാലനച്ചട്ടത്തിന്റെ ലംഘനം ആരോപിച്ച് ഇഡി കിഫ്ബിക്കെതിരെ കേസെടുത്തിരുന്നു. കിഎഫ്ബി സിഇഒ, ഡെപ്യൂട്ടി എംഡി, ആക്സിസ് ബാങ്ക് ഹോള്സെയില് മേധാവി എന്നിവര്ക്ക് നേരത്തേ ഇഡി നോട്ടീസയച്ചിരുന്നു. കൊച്ചിയിലെ ഇഡി ഓഫിസില് ഹാജരാകണമെന്നാവശ്യപ്പെട്ടാണ് നോട്ടീസ്.
കേരളം നിയമസഭാ തെരഞ്ഞെടുപ്പിന്റെ പടിവാതില്ക്കല് എത്തി നില്ക്കുമ്പോഴാണ് ഇഡിയുടെ സുപ്രധാന നടപടി. കിഫ്ബി വഴിയുള്ള വികസനം ഇടതുപക്ഷ സര്ക്കാരിന്റെ പ്രധാന പ്രചാരണ മുദ്രാവാക്യമാണ്. ഇതിനിടെയാണ് കിഫ്ബി നടത്തിപ്പ് തന്നെ ചോദ്യം ചെയ്യുന്ന അന്വേഷണങ്ങളിലേക്ക് ഇഡി കടക്കുന്നത്.
കേന്ദ്ര അനുമതിയില്ലാതെ വിദേശ ഫണ്ട് സ്വീകരിച്ചതിനാല് വിദേശ നാണയ പരിപാലന നിയമത്തിന്റെ ലംഘനം ഉണ്ടായെന്ന് നോട്ടീസില് പറയുന്നുണ്ട്. കിഫ്ബിയുടെ പാര്ട്ണര് ബാങ്കാണ് ആക്സിസ് ബാങ്ക്. ബാങ്കിനെ അംഗീകൃത ഡീലറാക്കിയാണ് കിഫ്ബി മസാല ബോണ്ടിറക്കിയത്. ഇതും വ്യവസ്ഥാപിതമല്ലെന്നാണ് ആരോപണം. ഈ സാഹചര്യത്തിലാണ് ബാങ്കിനെയും ഇഡി അന്വേഷണ പരിധിയില് ഉള്പ്പെടുത്തിയത്.
കേസുമായി ബന്ധപ്പെട്ട് ധനകാര്യ മന്തി തോമസ് ഐസക്കിനെയും താമസിയാതെ ചോദ്യം ചെയ്യുമെന്ന് കൊച്ചി ബ്യൂറോ റിപ്പോര്ട്ട് ചെയ്യുന്നു. തെരഞ്ഞടുപ്പിന് ഒരു മാസം ബാക്കി നില്ക്കെ വലിയ രാഷ്ട്രീയ വിവാദത്തിനും ഈ ഇഡി അന്വേഷണം തിരികൊളുത്തുമെന്നുറപ്പാണ്.
അതേസമയം പ്രതിരോധവുമായി സര്ക്കാരും പാര്ട്ടിയും രംഗത്തെത്തിയിട്ടുണ്ട്. കിഫ്ബിക്ക് എതിരെ കേസെടുക്കാനുള്ള എന്ഫോഴ്സ്മെന്റ് ഡയറക്ടറേറ്റിന്റെ നീക്കം കേന്ദ്ര ധനമന്ത്രി നിര്മ്മല സീതാരാമന്റെ രാഷ്ട്രീയ താത്പര്യപ്രകാരമാണെന്ന് മുഖ്യമന്ത്രി പിണറായി വിജയന് പറഞ്ഞു. ഇഡിയുടെ നീക്കം തിരഞ്ഞെടുപ്പ് പെരുമാറ്റച്ചട്ടലംഘനമാണെന്നും ഇതിനെതിരെ കേന്ദ്രതിരഞ്ഞെടുപ്പ് കമ്മിഷന് പരാതി നല്കിയതായും മുഖ്യമന്ത്രി അറിയിച്ചു.
കേന്ദ്ര ധനമന്ത്രി നിര്മല സീതാരാമന്റെ രാഷ്ട്രീയ താല്പര്യപ്രകാരമാണ് എന്ഫോഴ്സ്മെന്റ് ഡയറക്ടറേറ്റ് കിഫ്ബി ഉദ്യോഗസ്ഥരെ വിളിച്ചുവരുത്തുന്നതെന്ന് മുഖ്യമന്ത്രി പിണറായി വിജയന് കത്തില് ആരോപിക്കുന്നു. എന്ഫോഴ്സ്മെന്റ് ഡയറക്ടറേറ്റ് മാതൃകാ പെരുമാറ്റച്ചട്ടം അട്ടിമറിക്കുകയാണെന്നുംമുഖ്യമന്ത്രി ആരോപിക്കുന്നു. അന്വേഷണ ഏജന്സികള് മാതൃകാ പെരുമാറ്റച്ചട്ടം ലംഘിക്കുന്നതിനെതിരെ കമ്മിഷന് ഇടപെടണമെന്നും മുഖ്യമന്ത്രി കത്തില് ആവശ്യപ്പെട്ടു.
ബി.ജെ.പി യാത്രയില് പങ്കെടുത്ത് ഫെബ്രുവരി 28 ന് നിര്മല സീതാരാമന് നടത്തിയ പ്രസ്താവന അന്വേഷണ ഏജന്സികളെ രാഷ്ട്രീയമായി ഉപയോഗിക്കുന്നതിന്റെ തെളിവാണെന്നും മുഖ്യമന്ത്രി ചൂണ്ടിക്കാട്ടുന്നു.
മസാല ബോണ്ടിന്റെ പേരില് സര്ക്കാരിനെ വിരട്ടാന് നോക്കേണ്ടെന്ന് എന്ഫോഴ്സ്മെന്റ് ഡയറക്ടറേറ്റിനോട് മന്ത്രി തോമസ് ഐസകും പറഞ്ഞു. കേരള സര്ക്കാരിന്റെ ഉദ്യോഗസ്ഥരെ ഇ.ഡി ചോദ്യം ചെയ്യാന് വിളിപ്പിച്ച് പീഡിപ്പിക്കുകയാണ് ചെയ്തത്. സര്ക്കാരിന്റെ ഉദ്യോഗസ്ഥരെ സംരക്ഷിക്കാനറിയാം. തങ്ങള്ക്കും പൊലീസൊക്കെയുണ്ടെന്നും ഐസക് മുന്നറിയിപ്പ് നല്കി.
"
https://www.facebook.com/Malayalivartha