ചെറിയാന് ഫിലിപ്പിനെ കോണ്ഗ്രസിലേക്ക് തിരിച്ചുവിളിച്ച് പാര്ട്ടി മുഖപത്രമായ വീക്ഷണം... തെറ്റുകള് ഏറ്റുപറഞ്ഞ് തിരുത്തി തിരിച്ചെത്തിയാല് കോണ്ഗ്രസ് അര്ഹമായ പരിഗണന നല്കുമെന്നും പത്രത്തിന്റെ മുഖപ്രസംഗത്തില് പറയുന്നു
രാജ്യസഭ തിരഞ്ഞെടുപ്പ് കേരളത്തില് വലിയ രാഷ്ട്രീയ ചര്ച്ചകള്ക്കാണ് വഴി തുറന്നിരിക്കുന്നത്. കാലത്തിന്റെ കാവ്യനീതിയോ അതോ ഇരട്ടനീതി നിഷേധമോ ചെറിയാന് ഫിലിപ്പിന്റെ കാര്യം രാഷ്ട്രീയ നിരീക്ഷകരുടെ ഇടയില് വീണ്ടും വലിയ ചര്ച്ചയാവുകയാണ്.
ചെറിയാന് ഫിലിപ്പിനെ കോണ്ഗ്രസിലേക്ക് തിരിച്ചുവിളിച്ച് പാര്ട്ടി മുഖപത്രമായ വീക്ഷണം വന്നതോടെ ഒരിടവേളയ്ക്ക് ശേഷം വീണ്ടും ചെറിയാനാണ് താരം. തെറ്റുകള് ഏറ്റുപറഞ്ഞ് തിരുത്തി തിരിച്ചെത്തിയാല് കോണ്ഗ്രസ് അര്ഹമായ പരിഗണന നല്കുമെന്നും പത്രത്തിന്റെ മുഖപ്രസംഗത്തില് പറയുന്നു. കോണ്ഗ്രസിനെ ചതിച്ച ചെറിയാന് ഫിലിപ്പിനെ സിപിഎം ചതിച്ചു. രാജ്യസഭാ സീറ്റ് ഇത്തവണയും നല്കിയില്ല. രണ്ടു സീറ്റുകളും നല്കിയത് പിണറായി വിജയന്റെ അടുക്കള സംഘത്തിലുള്ളവര്ക്കാണെന്നും പത്രം പറയുന്നു.
വിമതരെ സ്വീകരിക്കുന്ന സിപിഎമ്മിന്റെ ഇരട്ടത്താപ്പിന്റെ തെളിവാണ് ചെറിയാന് ഫിലിപ്പ്. രാജ്യസഭാ സീറ്റ് രണ്ടുതവണ വാഗ്ദാനം ചെയ്തു വഞ്ചിച്ചു. തുടലിലിട്ട കുരങ്ങനെ പോലെയാണ് ചെറിയാന് ഫിലിപ്പിന്റെ സിപിഎമ്മിലെ സ്ഥാനം. ചെറിയാന് ഫിലിപ്പിന് വലിയ സ്ഥാനമാനങ്ങളൊന്നുമില്ലെങ്കിലും കോണ്ഗ്രസിന്റെ പൂമുഖത്തൊരു ഇരിപ്പിടമുണ്ടായിരുന്നു.
എന്നാലിപ്പോള് സിപിഎമ്മിന്റെ അടുക്കളപ്പുറത്ത് ഇരിക്കേണ്ടി വന്നിരിക്കുന്നു. മറുകണ്ടം ചാടി വരുന്നവരുടെ ചോര ഊറ്റിക്കുടിച്ച് എല്ലും തോലും മാത്രം അവശേഷിപ്പിക്കുന്ന സ്വഭാവമാണ് സിപിഎമ്മിന്. കരിമ്പനയിലെ യക്ഷിയെ പോലെയാണ് സിപിഎം. ചെറിയാനോട് കാട്ടിയത് ചിറ്റമ്മ നയമാണ്.
2001ലെ നിയമസഭാ തിരഞ്ഞെടുപ്പില് ആഗ്രഹിച്ച തിരുവനന്തപുരം വെസ്റ്റ് സീറ്റ് കിട്ടാത്തതിന്റെ പേരിലാണ് ചെറിയാന് ഫിലിപ്പ് കോണ്ഗ്രസ് വിട്ടതും പുതുപ്പള്ളിയില് ഉമ്മന് ചാണ്ടിക്കെതിരെ മല്സരിച്ചതും. ഉമ്മന് ചാണ്ടിക്കും എകെ ആന്റണിക്കുമെതിരെ ചെറിയാന് ഫിലിപ്പ് ചൊരിഞ്ഞ അധിക്ഷേപങ്ങള് സാമാന്യ മര്യാദ പോലും മറന്നുകൊണ്ടാണെന്നും വീക്ഷണം മുഖപ്രസംഗത്തില് കുറ്റപ്പെടുത്തുന്നു. ഏതായാലും ചെറിയാന് തിരിച്ചുപോകുമോ ഇല്ലയോ എന്നതാണ് ഇനി കാണേണ്ടത്.
https://www.facebook.com/Malayalivartha
