കേരളത്തില്‍ എല്‍ഡിഎഫ് വീണ്ടും അധികാരത്തിലെത്തുമെന്നാണ് ദേശീയതലത്തിലെ എല്ലാ എക്‌സിറ്റി പോള്‍ സര്‍വേ ഫലങ്ങളും. റിപ്പബ്‌ളിക് സിഎന്‍എക്‌സ് പോസ്റ്റ് പോള്‍ സര്‍വ്വേഫലനുസരിച്ച് 72 മുതല്‍ 80 വരെ സീറ്റുകളില്‍ എല്‍ഡിഎഫ് വിജയിക്കുമെന്നാണ് സൂചന. പശ്ചിമ ബംഗാളില്‍ തൂക്കു മന്ത്രിസഭയ്ക്കാണ് സാധ്യതയെന്നും സര്‍വ്വേഫലം പറയുന്നു.

തമിഴ്‌നാട് ഡിഎംകെ തൂത്തുവാരും എന്നാണ് റിപ്പബ്‌ളിക് സര്‍വ്വേഫലം പറയുന്നത്. 160-170 വരെ സീറ്റുകള്‍ ഡിഎംകെ സഖ്യത്തിന് ലഭിക്കാനാണ് സാധ്യതയെന്ന് സര്‍വ്വേഫലം വ്യക്തമാക്കുന്നു.

അതേസമയം, പശ്ചിമ ബംഗാളില്‍ തൃണമൂല്‍ കോണ്‍ഗ്രസിന് സാധ്യതയെന്നാണ് ടൈംസ് നൗ സിവോട്ടര്‍ സര്‍വ്വെഫലം പറയുന്നത്. 152-164 വരെ സീറ്റുകള്‍ നേടി മമതാ ബാനര്‍ജിയും കൂട്ടരും വീണ്ടും അധികാരത്തിലെത്തുമെന്നാണ് ടൈംസ് നൗ സിവോട്ടര്‍ സര്‍വ്വെഫലം നല്‍കുന്ന സൂചന.

കേരളത്തില്‍ എല്‍ഡിഎഫിന് 104-120 സീറ്റ് വരെ ലഭിക്കുമെന്നാണ് ഇന്ത്യ ടുഡെ ആക്‌സിസ് മൈഇന്ത്യ പോള്‍ സര്‍വ്വേഫലം പറയുന്നത്. 20-36 സീറ്റ് വരെ യുഡിഎഫിന് ലഭിക്കും. അസമില്‍ ബിജെപി അധികാരത്തിലെത്തിയേക്കും. ഇവിടെ ബിജെപി 75-85 വരെ സീറ്റ് നേടും. കോണ്‍ഗ്രസ് സഖ്യത്തിന് 40-50 വരെ കിട്ടിയേക്കുമെന്നും സര്‍വ്വേഫലം പറയുന്നു. ആകെ 126 മണ്ഡലങ്ങളാണ് അസമിലുള്ളത്.

ഇന്ത്യാ ടുഡെആക്‌സിസ് മൈ ഇന്ത്യ സര്‍വേ പ്രകാരം: എല്‍.ഡി.എഫ് 104-120 വരം, യു.ഡി.എഫ് 20-36, എന്‍.ഡി.എ 0-2
എ.ബി.പി ന്യൂസ്‌സി വോട്ടര്‍: എല്‍.ഡി.എഫ് 71-77, യു.ഡി.എഫ് 62-68, എന്‍.ഡി.എ 0-2
ന്യൂസ് 24ടുഡെയ്‌സ് ചാണക്യ: എല്‍.ഡി.എഫ് 102-111, യു.ഡി.എഫ് 35-44, എന്‍.ഡി.എ 3-6
പി മാര്‍ക്വ്: എല്‍.ഡി.എഫ് 72-79, യു.ഡി.എഫ് 60-66, എന്‍.ഡി.എ 0-3
റിപ്പബ്‌ളിക് ടിവിസി.എന്‍.എക്‌സ്: എല്‍.ഡി.എഫ് 72-80, യു.ഡി.എഫ് 58-64, എന്‍.ഡി.എ 1-5
ടൈംസ് നൗസി വോട്ടര്‍: എല്‍.ഡി.എഫ് 74 , യു.ഡി.എഫ് 65, എന്‍.ഡി.എ 0

അതേസമയം സംസ്ഥാനത്തെ പ്രമുഖമായ ചാനലുകള്‍ മൂന്ന് ദിവസങ്ങളായാണ് സര്‍വേ നടത്തുന്നത്. സംസ്ഥാന നിയമസഭാ തെരഞ്ഞെടുപ്പില്‍ വടക്കന്‍ ജില്ലകളില്‍ എല്‍ഡിഎഫിന് തന്നെ മുന്‍തൂക്കമുണ്ടാകുമെന്ന് ഏഷ്യാനെറ്റ് ന്യൂസ് സീ ഫോര്‍ സര്‍വേ ഫലം. കാസര്‍കോട്, കണ്ണൂര്‍, വയനാട്, കോഴിക്കോട് ജില്ലകളില്‍ നടത്തിയ പോസ്റ്റ് പോള്‍ ഫലമാണ് ഏഷ്യാനെറ്റ് ന്യൂസ് ഇന്ന് പുറത്തുവിട്ടത്. ഇതില്‍ നാല് ജില്ലകളിലും വ്യക്തമായ മേല്‍ക്കൈ ഇടതുമുന്നണിക്കുണ്ട്.

കാസര്‍കോട് മുതല്‍ തൃശൂര്‍ വരെ 7 ജില്ലകളിലെ മനോരമ ന്യൂസ് വിഎംആര്‍ എക്‌സിറ്റ് പോള്‍ പ്രവചനം പ്രകാരം യുഡിഎഫിന് നേരിയ പ്രതീക്ഷ നല്‍കി. 73 സീറ്റില്‍ യുഡിഎഫ് 38, എല്‍ഡിഎഫ് 34, എന്‍ഡിഎ 1. കഴിഞ്ഞ തിരഞ്ഞെടുപ്പില്‍ എല്‍ഡിഎഫ് 49, യുഡിഎഫ് 24 എന്നിങ്ങനെയായിരുന്നു സീറ്റ് നില.

എല്‍.ഡി.എഫിന് തുടര്‍ ഭരണം ലഭിക്കുമെന്ന് ദേശീയ ചാനലുകളും വിവിധ ഏജന്‍സികളും നടത്തിയ എക്‌സിറ്റ് പോള്‍ സര്‍വേകളുടെ പ്രവചനം പുറത്തു വന്നതോടെ എല്‍ഡിഎഫ് ക്യാമ്പ് സജീവമായി. അതേസമയം ചെന്നിത്തലയ്ക്കും കൂട്ടര്‍ക്കും കടുത്ത നിരാശയാണ്. തെരഞ്ഞെടുപ്പിന് മുമ്പ് നടത്തിയ സര്‍വേകളിലും എല്‍ഡിഎഫ് തൂത്തുവാരിയിരുന്നു. എന്തായാലും ഒരു ദിവസം വരെ കാത്തിരിക്കാം.