കീറാമുട്ടിയായ മഞ്ചേശ്വരം പിടിക്കുക എന്നത് ബിജെപിയുടെ സ്വപ്നമാണ്. എന്നാല്‍ ബിജെപി അധ്യക്ഷന്‍ കെ. സുരേന്ദ്രനെ തോല്‍പ്പിക്കാന്‍ ശക്തികള്‍ ഒന്നിക്കുകയായിരുന്നു. കാസര്‍കോട് ജില്ലയിലെ മഞ്ചേശ്വരത്ത് മത്സരം കടുപ്പമെന്ന സൂചനയുമായാണ് മനോരമ ന്യൂസ് വി.എം.ആര്‍ എക്‌സിറ്റ് പോള്‍ ഫലം വരുന്നത്. എങ്കിലും മഞ്ചേശ്വരത്ത് 0.60 % വ്യത്യാസത്തില്‍ എന്‍ഡിഎ മുന്നിലെന്ന് എക്‌സിറ്റ് പോള്‍ പറയുന്നു. യുഡിഎഫ് രണ്ടാമതും എല്‍ഡിഎഫ് മൂന്നാം സ്ഥാനത്തെന്നും ഫലം സൂചന നല്‍കുന്നു.

മഞ്ചേശ്വരത്ത് എന്‍ഡിഎ സ്ഥാനാര്‍ഥി കെ.സുരേന്ദ്രന്‍ 35.90 ശതമാനം വോട്ട് നേടുമ്പോള്‍ യുഡിഎഫ് സ്ഥാനാര്‍ഥി എ.കെ.എം.അഷ്‌റഫ് 35.30 ശതമാനം വോട്ടും എല്‍ഡിഎഫ് സ്ഥാനാര്‍ഥി വി.വി.രമേശന്‍ 27.00 ശതമാനം വോട്ടും നേടുമെന്നാണ് പ്രവചനം. ശക്തമായ മല്‍സരം തന്നെയാണ് മഞ്ചേശ്വരത്തെന്നാണ് എക്‌സിറ്റ് പോള്‍ സൂചന.

കാസര്‍കോട്ട് യുഡിഎഫ് തന്നെ ജയിക്കുമെന്ന് മനോരമന്യൂസ്-വി.എം.ആര്‍ എക്‌സിറ്റ് പോള്‍ ഫലം വ്യക്തമാക്കുന്നു. എക്‌സിറ്റ് പോളില്‍ ലീഗ് ബിജെപിയെക്കാള്‍ 11.70% മുന്നിലെന്ന് എക്‌സിറ്റ് പോള്‍ ഫലം സൂചിപ്പിക്കുന്നു.

ഉദുമയില്‍ യുഡിഎഫ് അട്ടിമറി ജയം നേടുമെന്നാണ് പ്രവചനം. കടുത്ത മല്‍സരത്തിനൊടുവില്‍ യുഡിഎഫ് അട്ടിമറിയുണ്ടാകുമെന്നാണ് എക്‌സിറ്റ് പോള്‍. 1.20 % വോട്ടിന് കോണ്‍ഗ്രസിലെ സി.ബാലകൃഷ്ണന്‍ സി.എച്ച് കുഞ്ഞമ്പുവിനെ മറികടക്കുമെന്നാണ് പ്രവചനം.

യുഡിഎഫ് സി.ബാലകൃഷ്ണന്‍ 43.40 ശതമാനം, എല്‍ഡിഎഫ് സ്ഥാനാര്‍ഥി സി.എച്ച്.കുഞ്ഞമ്പു 42.20, എന്‍ഡിഎ 12.70 എന്നിങ്ങനെയാണ് വോട്ടുനില. 2016 ല്‍ കെ.കുഞ്ഞിരാമന്‍ കെ.സുധാകരനെ തോല്‍പ്പിച്ച മാര്‍ജിന്‍ 2.38 % (3832 വോട്ട്). ഇത്തവണ എല്‍ഡിഎഫിന്റെ വോട്ട് വിഹിതവും കുറയുമെന്ന് എക്‌സിറ്റ് പോള്‍ പറയുന്നു.

കാഞ്ഞങ്ങാട്ട് എല്‍ഡിഎഫ് നല്ല മാര്‍ജിനില്‍ എല്‍ഡിഎഫ് ജയിക്കുമെന്നാണ് എക്‌സിറ്റ്‌പോള്‍. മന്ത്രി ഇ. ചന്ദ്രശേഖരന്‍ മികച്ച ഭൂരിപക്ഷത്തോടെ മണ്ഡലം നിലനിര്‍ത്തുമെന്ന് എക്‌സിറ്റ് പോള്‍ വിശദമാക്കുന്നു. മാര്‍ജിന്‍ 14.30. എല്‍ഡിഎഫ് 47.60 %, യുഡിഎഫ് 33.30 ശതമാനം, എന്‍ഡിഎ 16.20 ശതമാനം എന്നിങ്ങനെയാണ് വോട്ടുശതമാനം. കഴിഞ്ഞ തവണ എല്‍ഡിഎഫ് ജയിച്ച മാര്‍ജിന്‍ 16.14 % (26011 വോട്ട്). കോണ്‍ഗ്രസിലെ പി.വി.സുരേഷിന് 2016ല്‍ ധന്യ സുരേഷ് നേടിയതിനേക്കാള്‍ അല്‍പം വോട്ട് കുറയുമെന്നാണ് പ്രവചനം. ഇത്തവണ മറ്റുള്ളവര്‍ 2.90 %.

തൃക്കരിപ്പൂരില്‍ പൊരിഞ്ഞ പോരെന്ന് എക്‌സിറ്റ് പോള്‍ സൂചിപ്പിക്കുന്നു. തൃക്കരിപ്പൂരില്‍ എല്‍ഡിഎഫ് 1.20 % മാര്‍ജിനില്‍ മുന്നിലെന്ന് എക്‌സിറ്റ് പോള്‍ പറയുന്നു.

അതേസമയം മഞ്ചേശ്വരത്ത് ഏഷ്യാനെറ്റ് സീഫോര്‍ സര്‍വേയില്‍ യു.ഡി.എഫിനാണ് നേരിയ മുന്‍തൂക്കം നല്‍കുന്നത്. മാതൃഭൂമി ന്യൂസ് ആക്‌സിസ് മൈ ഇന്ത്യ സര്‍വേയും യു.ഡി.എഫ് സ്ഥാനാര്‍ത്ഥി അഷ്‌റഫ് വിജയിക്കുമെന്നാണ് പറയുന്നത്.

ബാലുശേരിയിലെ യുഡിഎഫ് സ്ഥാനാര്‍ത്ഥിയും നടനുമായ ധര്‍മജന്‍ ബോള്‍ഗാട്ടി പരാജയപ്പെടുമെന്ന് ചാനല്‍ സര്‍വേകള്‍. മലയാളത്തിലെ രണ്ട് പ്രമുഖ ചാനലുകളാണ് ഇക്കാര്യം പ്രവചിക്കുന്നത്. മണ്ഡലത്തിലെ എല്‍ഡിഎഫ് സ്ഥാനാര്‍ത്ഥിയും എസ്എഫ്‌ഐയുടെ സംസ്ഥാന സെക്രട്ടറിയുമായ സച്ചിന്‍ ദേവാണ് വിജയം നേടുകയെന്നും ചാനലുകള്‍ പറയുന്നു. ലിബിന്‍ ബാലുശേരിയാണ് ഇവിടെ എന്‍ഡിഎ സ്ഥാനാര്‍ത്ഥി.

ബാലുശേരിയില്‍ ധര്‍മജന്‍ യുഡിഎഫ് സ്ഥാനാര്‍ത്ഥിയായി വരുന്നതില്‍ കോണ്‍ഗ്രസ് പാര്‍ട്ടിയിലും മുന്നണിയിലും എതിര്‍പ്പുണ്ടായിരുന്നതായി നേരത്തെ വാര്‍ത്തകള്‍ വന്നിരുന്നു. ദളിത് കോണ്‍ഗ്രസും ഇക്കാര്യത്തില്‍ കടുത്ത എതിര്‍പ്പ് അറിയിച്ചിരുന്നു.

ധര്‍മ്മജനെ മത്സരിപ്പിക്കരുതെന്ന ആവശ്യവുമായി യുഡിഎഫ് ബാലുശേരി മണ്ഡലം കമ്മിറ്റിയും കെ.പി.സി.സി നേതൃത്വത്തിന് പരാതി നല്‍കിയതായി വാര്‍ത്തയുണ്ടായിരുന്നു.