എടിഎമ്മിൽ നിന്നും പണം മോഷ്ട്ടിക്കുന്നത് പതിവാണ്. എന്നാൽ അവിടെ നിന്നും സാനിറ്റൈസർ മോഷ്ട്ടിക്കുന്നത് അപൂർവങ്ങളിൽ അപൂർവ്വമായ സംഭവമാണ്. അത്തരത്തിലൊരു സാനിറ്റൈസർ കള്ളൻ സിസിടിവി ക്യാമറയിൽ കുടുങ്ങിയിരിക്കുകയാണ്.

കോഴിക്കോട് കക്കോടിയിലെ എസ്ബിഐ എടിമ്മില്‍ നിന്ന് ഒറ്റ ദിവസം രണ്ട് അര ലിറ്റര്‍ സാനിറ്റൈസര്‍ മോഷ്ടിച്ച് കൊണ്ടുപോകുന്ന ദൃശ്യങ്ങള്‍ ഇപ്പോൾ സോഷ്യൽ മീഡിയയിൽ വ്യാപകമാകുകയാണ്.

കക്കോടിയില്‍ എസ്ബിഐ എടിഎമ്മിലെത്തിയാള്‍ പണമെടുത്ത് സാനിറ്റൈസര്‍ ഉപയോഗിച്ച് കൈ കഴുകുന്നതും സാമാന്യം തിരക്കുള്ള സമയമായിട്ട് കൂടി അര ലിറ്റര്‍ സാനിറ്റൈസറിന്‍റെ ബോട്ടിലുമെടുത്ത് ഒന്നുമറിയാത്ത പോലെ നടന്നുപോകുന്നതും ദൃശ്യങ്ങളില്‍ വ്യക്തമായി കാണാൻ സാധിക്കുന്നു. രണ്ടാമന്‍ ആദ്യം എടിഎമ്മില്‍ നിന്ന് പണം എടുക്കുന്നത് പോലെ അഭിനയിച്ചു.

അവിടെയുണ്ടായിരുന്ന ഒരു കുപ്പി സാനിറ്റൈസര്‍ ഇയാളും കൊണ്ടുപോയി. ഇത് ഒറ്റപ്പെട്ട സംഭവമല്ലെന്നാണ് ബാങ്ക് ഉദ്യോഗസ്ഥര്‍ വ്യക്തമാക്കുന്നത് . ധാരാളം ആളുകള്‍ക്ക് ഉപയോഗിക്കേണ്ടതിനാല്‍ മിക്കവാറും അരലിറ്ററിന്‍റെ സാനിറ്റൈസറാണ് എടിഎമ്മുകളില്‍ കൊണ്ട് വയ്ക്കുന്നത്.

എന്നാല്‍, ചില പ്രദേശങ്ങളില്‍ സാനിറ്റൈസര്‍ വയ്ക്കുന്നത് മോഷ്ട്ടിച്ച് കൊണ്ടുപോകും. സാനിറ്റൈസര്‍ വയ്ക്കുന്ന സമയത്ത് തന്നെ എടുത്തുകൊണ്ടുപോകുന്ന സ്ഥലങ്ങളും ഉണ്ടെന്ന് ബാങ്ക് ഉദ്യോഗസ്ഥര്‍ വെളിപ്പെടുത്തുന്നു.

എടിഎമ്മില്‍ സാനിറ്റൈസര്‍ ഇല്ലാതാവുന്നതോടെ കൊവിഡ് പടര്‍ന്ന് പിടിക്കുന്ന കോഴിക്കോടടക്കമുള്ള ബാങ്കുകളിലേക്ക് ഇടപാടുകാര്‍ എത്തി ജീവനക്കാരെ വഴക്ക് പറയാന്‍ തുടങ്ങും.

അങ്ങനെയാണ് ജീവനക്കാര്‍ സിസിടിവി പരിശോധിച്ചതും സാനിറ്റൈസര്‍ മോഷണം കയ്യോടെ പിടികൂടിയതും. ഇതുവരെ പൊലീസിലൊന്നും പരാതി നല്‍കിയില്ലെങ്കിലും ഇങ്ങനെ തുടര്‍ന്നാല്‍ മറ്റ് വഴിയില്ലെന്നാണ് ബാങ്ക് ജീവനക്കാര്‍ പറയുന്നത്. ചിലയിടങ്ങളിൽ സാനിറ്റൈസര്‍ കെട്ടിയിടാറാണ് പതിവ്.