നാലുപേര്ക്ക് പുതുജീവന് സമ്മാനിച്ച് കലയെ സ്നേഹിച്ച ശ്രീകല ഒടുവില് യാത്രയായി...
നാലുപേര്ക്ക് പുതുജീവന് സമ്മാനിച്ച് കലയെ സ്നേഹിച്ച ശ്രീകല ഒടുവില് യാത്രയായി... . തലച്ചോറിലെ രക്തസ്രാവത്തെ തുടര്ന്ന് 26ന് കിംസ് ആശുപത്രിയില് പ്രവേശിപ്പിച്ച തിരുമല ആറാമട പ്ലാവിള കോട്ടുകോണം ജെ.ആര്.എ 841 ശ്രീലകത്തില് ഒ. ശ്രീകല (54) വ്യാഴാഴ്ചയാണ് മരണപ്പെട്ടത്.
തുടര്ന്ന് കുടുംബാംഗങ്ങളുടെ ആഗ്രഹപ്രകാരം അവയവങ്ങള് നാലുപേര്ക്ക് ദാനം ചെയ്യുകയായിരുന്നു. കലാകുടുംബമായിരുന്നു ശ്രീകലയുടേത്. ഡാന്സ് മാസ്റ്ററായ ഭര്ത്താവ് അനില്കുമാറിനും നര്ത്തകിയായ മകള് ശ്രീലക്ഷ്മിക്കുമൊപ്പം ജീവിതം സന്തോഷകരമായി മുന്നോട്ടുപോകുമ്പോഴാണ് അപ്രതീക്ഷിതമായി ആ നാദം നിലച്ചത്.
അനില്കുമാറിന്റെ നേതൃത്വത്തില് നടത്തുന്ന ഡാന്സ് സ്കൂളിന്റെ പ്രവര്ത്തനത്തില് സജീവ സാന്നിദ്ധ്യമായ ശ്രീകല ജനപ്രിയ പരിപാടിയായ ഐഡിയ സ്റ്റാര് സിംഗറിലും പങ്കെടുത്തിരുന്നു.
വ്യാഴാഴ്ച വൈകിട്ടോടെ മസ്തിഷ്ക മരണം സ്ഥിരീകരിച്ച ശ്രീകലയുടെ അവയവങ്ങള് ആര്ക്കെങ്കിലും പ്രയോജനപ്പെടുത്താന് കഴിയുമെങ്കില് തങ്ങള് തയ്യാറാണെന്ന് അനില്കുമാര് ഡോക്ടര്മാരെ അറിയിക്കുകയായിരുന്നു.
കുടുംബാംഗങ്ങളുടെ ആഗ്രഹം കിംസ് ആശുപത്രിയിലെ ഡോ. ഷാനവാസ് ആശുപത്രിയിലെ ട്രാന്സ്പ്ലാന്റ് പ്രൊക്യുവര്മെന്റ് മാനേജര് ഡോ. മുരളീധരനെ അറിയിച്ചു. തുടര്ന്ന് മൃതസഞ്ജീവനിയുടെ സംസ്ഥാന കണ്വീനറായ ഡോ. സാറ വര്ഗീസ്, സംസ്ഥാന നോഡല് ഓഫീസര് ഡോ. നോബിള് ഗ്രേഷ്യസ് എന്നിവരുടെ നേതൃത്വത്തില് അവയവദാനത്തിനുള്ള നടപടികള് സ്വീകരിച്ചു.
വൃക്കകളും നേത്രപടലവുമാണ് ദാനം ചെയ്തത്. കിംസ് ആശുപത്രിയില് യൂറോളജി വിഭാഗത്തിലെ ഡോ. രേണുവിന്റെ നേതൃത്വത്തിലാണ് ശസ്ത്രക്രിയ നടത്തി വൃക്കകള് പുറത്തെടുത്തത്.ഒരു വൃക്ക മെഡിക്കല് കോളേജ് ആശുപത്രിയിലെ രോഗിക്കാണ് വച്ചുപിടിപ്പിച്ചത്.
യൂറോളജി വിഭാഗം മേധാവി ഡോ. വാസുദേവന് പോറ്റിയുടെ നേതൃത്വത്തിലായിരുന്നു ശസ്ത്രക്രിയ. ഒരു വൃക്ക കിംസ് ആശുപത്രിയിലെ രോഗിക്ക് നല്കി. നേത്രപടലങ്ങള് ഗവ കണ്ണാശുപത്രിയിലെ രണ്ട് രോഗികള്ക്കാണ് നല്കിയത്.
https://www.facebook.com/Malayalivartha
