ചാനല്‍ സര്‍വേകള്‍ കാണാനിരുന്ന മലയാളികള്‍ അക്ഷരാര്‍ത്ഥത്തില്‍ ഞെട്ടിയത് നേമവും കഴക്കൂട്ടവും പ്രവചിച്ചത് കണ്ടപ്പോഴാണ്. ഏഷ്യാനെറ്റും മനോരമ ന്യൂസും മാതൃഭൂമിയും വ്യത്യസ്ഥമായ ഫലമാണ് പ്രവചിച്ചത്. ഇതോടെ ഇത് ട്രോള്‍ ആകുകയും ചെയ്തു.

തിരുവനന്തപുരത്തെ പാവങ്ങളുടെ ഗുജറാത്തായ നേമം ആദ്യം പ്രവചിച്ചത് ഏഷ്യാനെറ്റാണ്. നേമത്ത് മുരളീധരന്‍ ഒന്നാമതും കമ്മനം രണ്ടാമതും ശിവന്‍കുട്ടി മൂന്നാമതുമെന്ന് ഏഷ്യാനെറ്റ് പറഞ്ഞപ്പോള്‍ പാവം ജനം വിശ്വസിച്ചു. എന്നാല്‍ ചാനല്‍ മാറ്റിയപ്പോള്‍ ഞെട്ടിപ്പോയി. നേരെ വിപരീതമായി മനോരമയും മാതൃഭൂമിയും. ഇതോടെ ചാനലുകാരുടെ ഉള്ളിലിരുപ്പ് വ്യക്തമായി.

തിരുവനന്തപുരം ജില്ലയില്‍ ഇടതുപക്ഷത്തിന് മുന്‍തൂക്കം പ്രവചിച്ചിരിക്കുകയാണ് മാതൃഭൂമി ന്യൂസ് ആക്‌സിസ് മൈ ഇന്ത്യ എക്‌സിറ്റ് പോള്‍ ഫലം. 11 മണ്ഡലത്തില്‍ എല്‍ഡിഎഫ് ജയിക്കും. നേമം മണ്ഡലം ബിജെപിയെ കൈവിടും, മൂന്നിടങ്ങളില്‍ ഇഞ്ചോടിഞ്ച് പോരാട്ടം നടക്കുമെന്നും സര്‍വേ പ്രവചിക്കുന്നു.

നേമം മണ്ഡലത്തില്‍ എല്‍ഡിഎഫ് അട്ടിമറി വിജയം നേടുമെന്ന് സര്‍വേ പറയുന്നു. ബിജെപിയുടെ കേരളത്തിലെ ഏക സീറ്റായ നേമത്ത് ബിജെപി സ്ഥാനാര്‍ഥി കുമ്മനം രാജശേഖരന്‍ തോല്‍ക്കും. കെ മുരളീധരനാണ് ഇവിടെ യുഡിഎഫ് സ്ഥാനാര്‍ഥി. 2016ല്‍ 8671 വോട്ടിനാണ് ഒ രാജഗോപാല്‍ മണ്ഡലത്തില്‍ വിജയിച്ചത്.

കഴക്കൂട്ടം മണ്ഡലത്തില്‍ സിറ്റിങ് എംഎല്‍എയും എല്‍ഡിഎഫ് സ്ഥാനാര്‍ഥിയുമായ കടകംപള്ളി സുരേന്ദ്രന്‍ വിജയിക്കും. 2016ല്‍ 7347 ആയിരുന്നു കടകംപള്ളിയുടെ ഭൂരിപക്ഷം. ഡോ.എസ് എസ് ലാല്‍, ശോഭാ സുരേന്ദ്രന്‍ എന്നിവരാണ് മറ്റ് സ്ഥാനാര്‍ഥികള്‍.

അതേസമയം മനോരമയും പറയുന്നത് ബിജെപിക്ക് നേമം പോവുമെന്നാണ് എക്‌സിറ്റ് പോളിലെ പ്രവചനം. വി.ശിവന്‍കുട്ടി (എല്‍ഡിഎഫ്) 7.60% അധികവോട്ടോടെ മണ്ഡലം തിരിച്ചുപിടിക്കുമെന്ന് എക്‌സിറ്റ് പോള്‍ പറയുന്നു. ബിജെപിക്ക് 15% വോട്ട് വരെ കുറയും, കെ.മുരളീധരന്റെ വോട്ട് 15% കൂടുമെന്നും പ്രവചനം പറയുന്നു. വോട്ടുശതമാനം ഇങ്ങനെ: എല്‍ഡിഎഫ് 40.70 %, എന്‍ഡിഎ 33.10%, യുഡിഎഫ് 24.40 %. രാജ്യം ഉറ്റുനോക്കുന്ന മണ്ഡലത്തില്‍ ബിജെപിക്ക് സീറ്റ് നഷ്ടപ്പെടുമെന്ന് എക്‌സിറ്റ് പോള്‍ പറയുന്നു.

കഴക്കൂട്ടത്ത് ശോഭ സുരേന്ദ്രന്‍ ചരിത്രം കുറിക്കുമെന്ന് എക്‌സിറ്റ് പോള്‍ ഫലം. 2.80% കൂടുതല്‍ വോട്ടോടെ കടകംപള്ളി സുരേന്ദ്രനെ അട്ടിമറിക്കുമെന്നാണ് പ്രവചനം. യുഡിഎഫ് സ്ഥാനാര്‍ഥിക്ക് കാര്യമായ നേട്ടമുണ്ടാക്കാനാവില്ലെന്നാണ് സര്‍വേ പറയുന്നത്.

2.80% മാര്‍ജിനില്‍ മന്ത്രി കടകംപള്ളി സുരേന്ദ്രനെ ശോഭ അട്ടിമറിക്കുമെന്നാണ് പ്രവചനം. സിറ്റിങ് എംഎല്‍എയായ കടകംപള്ളി 2016ല്‍ 5.48% (7347 വോട്ട്) മാര്‍ജിനിലാണ് ഇപ്പോഴത്തെ കേന്ദ്രമന്ത്രി വി.മുരളീധരനെ തോല്‍പ്പിച്ചത്. യുഡിഎഫിലെ ഡോ. എസ്.എസ്.ലാലിന് കഴിഞ്ഞതവണ മൂന്നാംസ്ഥാനത്തെത്തിയ എം.എ.വാഹിദിന്റെ പ്രകടനം പോലും ആവര്‍ത്തിക്കാനായില്ലെന്ന് സര്‍വേ പറയുന്നു.

വട്ടിയൂര്‍ക്കാവില്‍ സിറ്റിങ് എംഎല്‍എ വി.കെ.പ്രശാന്തിന് വിജയമെന്ന് എക്‌സിറ്റ് പോള്‍. ബിജെപിയുടെ വോട്ട് കുറയും. യുഡിഎഫാണ് രണ്ടാമത്. 4.50 % മാര്‍ജിനില്‍ സിറ്റിങ് എംഎല്‍എ വി.കെ.പ്രശാന്ത് മണ്ഡലം നിലനിര്‍ത്തുമെന്ന് എക്‌സിറ്റ് പോള്‍ പറയുന്നു!. സ്ഥാനാര്‍ഥി നിര്‍ണയത്തിലെ കാലതാമസവും പാളിച്ചകളും പ്രവര്‍ത്തനത്തിലെ ഏകോപനക്കുറവും കോണ്‍ഗ്രസിന് തിരിച്ചടിയായി എന്നുവേണം കരുതാനെന്നും മനോരമ പറയുന്നു.