സോഷ്യല് മീഡിയയിലൂടെ പെണ്കുട്ടിയെ അപമാനിക്കുകയും പോലീസിനെ വെല്ലുവിളിക്കുകയും ചെയ്ത യുവാവിനെ പൊലീസ് പൊക്കി
സോഷ്യല് മീഡിയയിലൂടെ പെണ്കുട്ടിയെ അപമാനിക്കുകയും പോലീസിനെ വെല്ലുവിളിക്കുകയും ചെയ്ത യുവാവ് പിടിയില്. ലിജോ ജോയ് എന്നയാളെയാണ് ഹൊസൂരില്നിന്ന് കൊല്ലം ചടയമംഗലം പൊലീസ് പിടികൂടിയത്. കൊല്ലം റൂറല് ജില്ലാ പോലീസ് മേധാവി കെ. ബി. രവി, അഡീഷണല് എസ്.പി. ഇ. എസ്. ബിജുമോന് എന്നിവരുടെ നിര്ദേശപ്രകാരം ചടയമംഗലം എസ്. എച്ച്. ഒ. എസ്. ബിജോയ്, എസ്.ഐ. ജെ.സലീം എന്നിവരുടെ നേതൃത്വത്തിലുള്ള പൊലീസ് സംഘമാണ് കര്ണാടകയിലെ ഹൊസൂരില്നിന്ന് പ്രതിയെ പിടികൂടിയത്.
യുവാവിനെ പിടികൂടി സ്റ്റേഷനിലേക്ക് കൊണ്ടുവരുന്ന വീഡിയോ കേരളാ പൊലീസ് അവരുടെ ഔദ്യോഗിക പേജില് രസകരമായ ട്രോളുകളോടെ പോസ്റ്റ് ചെയ്തിട്ടുമുണ്ട്. ഇന്സ്റ്റാഗ്രാം അക്കൗണ്ടിലൂടെയാണ് ലിജോ ജോയ് ലൈവ് വീഡിയോയില് പെണ്കുട്ടിക്കെതിരെ അശ്ലീലച്ചുവയോടെ സംസാരിച്ചത്. കൂട്ടുകാരികള്ക്കൊപ്പം ലൈവ് വീഡിയോയില് വന്ന പെണ്കുട്ടിയെയാണ് ഇയാള് യാതൊരു പ്രകോപനവും കൂടാതെ അശ്ളീലം പറഞ്ഞത്. പെണ്കുട്ടിയുടെ കൂട്ടുകാരികളെക്കുറിച്ചും ഇയാള് മോശമായി സംസാരിച്ചിരുന്നു. എന്നാല് അതുമാത്രമായിരുന്നില്ല, പൊലീസിനെ ഇന്സ്റ്റാഗ്രാം ലൈവ് വീഡിയോയിലൂടെ വെല്ലുവിളിക്കുകയും മറ്റു പലരെയും അധിക്ഷേപിക്കുകയും ചെയ്തിരുന്നു.
ഈ സംഭവത്തെ തുടര്ന്ന് പെണ്കുട്ടി സോഷ്യല് മീഡിയയില് പോസ്റ്റു ചെയ്ത ലൈവ് വീഡിയോയാണ് പൊലീസിന്റെ ശ്രദ്ധയില് എത്തിയത്. താന് ശാരീരികമായും മാനസികമായും തളര്ന്ന അവസ്ഥയില് ആണെന്നും ഇയാള്ക്കെതിരെ നടപടിയെടുക്കണം എന്നുമാണ് പെണ്കുട്ടി സോഷ്യല് മീഡിയയില് പോസ്റ്റ് ചെയ്ത തന്റെ വീഡിയോയില് ആവശ്യപ്പെട്ടത്.
ലിജോ ജോയ് നടത്തിയ അശ്ലീല സംഭാഷണം പെണ്കുട്ടി തന്നെ വീഡിയോയില് പങ്കുവെച്ചിരുന്നു. ഇയാള് തന്നെ പലതവണ വീഡിയോ കോള് വിളിക്കാന് നോക്കിയതായി പെണ്കുട്ടി പറഞ്ഞു. വളരെ മോശം അര്ത്ഥത്തിലുള്ള മെസേജുകളും ഇയാള് തനിക്ക് അയച്ചിരുന്നതായി പെണ്കുട്ടി വെളിപ്പെടുത്തിയിരുന്നു. പൊലീസ് ഇക്കാര്യത്തില് നടപടിയെടുക്കുമോ എന്നറിയില്ലയെന്നും പെണ്കുട്ടി പറഞ്ഞിരുന്നു. എന്നാല് ഈ വീഡിയോ ശ്രദ്ധയില് പെട്ടതോടെ കേരള പൊലീസ് ഇടപെടുകയായിരുന്നു. ഉന്നത ഉദ്യോഗസ്ഥരുടെ നിര്ദേശാനുസരണം ലിജോ ജോയിയെ കണ്ടെത്താന് പൊലീസ് ശ്രമം തുടങ്ങി. അന്വേഷണത്തില് ഇയാള് ഹൊസൂരില് ഉണ്ടെന്ന് കണ്ടെത്തിയിരുന്നു. ഇതേ തുടര്ന്നാണ് പ്രതിയെ പിടികൂടാന് പ്രത്യേക സംഘം ഹൊസൂരിലെത്തിയത്. ഇവിടെ പ്രതി വാടകയ്ക്ക് താമസിച്ചിരുന്ന സ്ഥലത്തുനിന്നാണ് പൊലീസ് ഇയാളെ പിടികൂടിയത്.
ചടയമംഗലത്ത് എത്തിച്ച പ്രതിയ്ക്കെതിരെ വിവിധ വകുപ്പുകള് ചുമത്തി അറസ്റ്റ് രേഖപ്പെടുത്തുകയായിരുന്നു. തുടര്ന്ന് കോടതിയില് ഹാജരാക്കി റിമാന്ഡ് ചെയ്തിട്ടുണ്ട്.
https://www.facebook.com/Malayalivartha
