നിയമസഭാ തെരഞ്ഞെടുപ്പിലെ വൻ തോൽവിക്ക് പിന്നാലെ കോണ്‍ഗ്രസ് നേതൃത്വത്തെ കടുത്ത ഭാഷയിൽ വിമര്‍ശിച്ച് ആര്‍എസ്പി നേതാവ് ഷിബു ബേബി ജോൺ രംഗത്ത് എത്തിയിരിക്കുകയാണ്. ഫേസ്ബുക്ക് കുറിപ്പിലൂടെയാണ് വിമര്‍ശനം ഉന്നയിച്ചിരിക്കുന്നത്.

മാധ്യമങ്ങളോട് എന്താണ് പറയേണ്ടത് എന്നും പാർട്ടിവേദിയിൽ എന്ത് പറയണമെന്നോ തിരിച്ചറിവ് പോലുമില്ലാത്ത ആളുകളോട് സഹതപിക്കാൻ മാത്രമെ സാധിക്കുകയുള്ളു എന്നും അദ്ദേഹം ഫേസ്ബുക്കിൽ കുറിക്കുന്നു. പാര്‍ട്ടി പരാജയത്തിന്റെ പടുകുഴിയിലേക്ക് വീഴുമ്പോഴും ഗ്രൂപ്പ് യോഗങ്ങള്‍ ചേരുന്നതിനെയും നേതാവ് ചോദ്യം ചെയ്യുന്നുമുണ്ട്.

ഇരിക്കുന്ന കൊമ്പ് മുറിക്കുന്ന ഒരു ചിത്രത്തോടൊപ്പമാണ് ഷിബു കുറിപ്പ് പങ്കുവച്ചിരിക്കുന്നത്. യുഡിഎഫിൽ നിന്നും വിമർശനമുണ്ടായതോടെ മുന്നണി മാറ്റമുണ്ടാകുമോ എന്നാണ് ഉയരുന്ന ചോദ്യങ്ങൾ.

ഫേസ്ബുക്ക് കുറിപ്പ് ഇങ്ങനെ;

കേരളത്തിലെ മതേതര ജനാധിപത്യ ചേരിയായ ഐക്യജനാധിപത്യ മുന്നണി തെരെഞ്ഞെടുപ്പിൽ പരാജയപ്പെട്ട് വലിയൊരു പടുകുഴിയിലേക്ക് നിലംപതിച്ചിരിക്കുന്ന ഒരു രാഷ്ട്രീയ സാഹചര്യത്തിൽ നിലനിൽപ്പ് തന്നെ കൺമുമ്പിൽ ചോദ്യചിഹ്നമായി നിൽക്കുകയാണ്. എന്നാൽ അത് ഉൾക്കൊള്ളാൻ തയ്യാറാകാതെ പരസ്യമായും രഹസ്യമായുമൊക്കെ ഗ്രൂപ്പ് യോഗങ്ങൾ വിളിച്ചും പരസ്യമായി വിഴുപ്പലക്കിയും പൊതുജനമധ്യത്തിൽ കൂടുതൽ അപഹാസ്യരാകുന്ന നേതാക്കളുടെ ഉദ്ദേശമെന്താണ്?

മാധ്യമങ്ങളോട് എന്ത് പറയണം, പാർട്ടിവേദിയിൽ എന്ത് പറയണമെന്ന തിരിച്ചറിവ് പോലുമില്ലാത്തവരോട് സഹതപിക്കാൻ മാത്രമെ സാധിക്കുകയുള്ളു. നിങ്ങളുടെ ഈ അധ:പതനത്തിനുള്ള മറുപടിയാണ് ജനം തന്നത്. എന്നാൽ 'എന്നെ തല്ലണ്ടമ്മാ ഞാൻ നന്നാവൂല' എന്ന സന്ദേശമാണ് നിങ്ങൾ ജനങ്ങൾക്ക് നൽകാൻ ആഗ്രഹിക്കുന്നതെങ്കിൽ ഇനിയും അവരെ കൊണ്ട് തല്ലിക്കാതെ സ്വയം ഒരു കുഴിയെടുത്ത് മൂടുന്നതാകും നല്ലത്.
അല്ല... അതാണല്ലോ ഇപ്പോഴും ചെയ്തുകൊണ്ടിരിക്കുന്നത്.