എല്‍ഡിഎഫിനെ ജയിപ്പിച്ചത് തങ്ങളാണെന്ന് എസ്എന്‍ഡിപി ജനറല്‍ സെക്രട്ടറി വെള്ളിപ്പള്ളി നടേശന്‍ കഴിഞ്ഞ ദിവസമാണ് പറഞ്ഞത്. അതേസമയമാണ് എസ്എന്‍ഡിപിയുടെ മറ്റോരു നേതാവും മകനുമായ തുഷാര്‍ വെള്ളാപ്പള്ളി സമ്പൂര്‍ണ പരാജയമടഞ്ഞത്.

അച്ഛനും മകനും കൂടി മനസ് വച്ചിരുന്നെങ്കില്‍ പല സീറ്റുകളിലും ബിജെപി ജയിക്കുമായിരുന്നു. പക്ഷെ അവരത് ചെയ്തില്ല. ബിജെപിയിലെ സംസ്ഥാന അധ്യക്ഷന്‍ സുരേന്ദ്രനും ശോഭ സുരേന്ദ്രനും കുമ്മനവുമെല്ലാം തോറ്റതില്‍ ഇവര്‍ക്കും പങ്കുണ്ട്.

ബിജെപിയോടൊപ്പം നില്‍ക്കുകയും കൂറ് മറുപക്ഷത്ത് കാണിക്കുകയും ചെയ്യുന്ന ബിഡിജെഎസിന്റെ നിലപാട് നേരത്തേയും വിമര്‍ശിച്ചിരുന്നു. ഒരു വേളയില്‍ ഡല്‍ഹിയില്‍ തുഷാര്‍ വെള്ളാപ്പള്ളി എത്തിയപ്പോള്‍ കാണാന്‍ പോലും അമിത്ഷാ കൂട്ടാക്കിയില്ല.

ഇത്രയൊക്കെ ചെയ്തിട്ടും ബിജെപി അവഗണിക്കുന്നെന്നാണ് അവരുടെ പരാതി. എന്‍ഡിഎയില്‍ അവഗണന നേരിടുന്നതില്‍ പ്രതിഷേധിച്ച് ബിഡിജെഎസ് അധ്യക്ഷന്‍ തുഷാര്‍ വെള്ളാപ്പള്ളി എന്‍ഡിഎ സംസ്ഥാന കണ്‍വീനര്‍ സ്ഥാനം രാജിവയ്ക്കാന്‍ ഒരുങ്ങുകയാണ്. ജില്ലാ കണ്‍വീനര്‍ സ്ഥാനങ്ങളും രാജിവയ്ക്കും. എന്നാല്‍, മുന്നണിമാറ്റം സംബന്ധിച്ച് ബിജെപി ദേശീയ നേതൃത്വവുമായുള്ള ചര്‍ച്ചയ്ക്കു ശേഷം തീരുമാനമെടുക്കാന്‍ തുഷാര്‍ വെള്ളാപ്പള്ളിയെ സംസ്ഥാന കൗണ്‍സില്‍ ചുമതലപ്പെടുത്തി.

നിയമസഭാ തിരഞ്ഞെടുപ്പില്‍ മുന്നണിക്കുണ്ടായ തോല്‍വിക്കു പിന്നാലെയാണ് എന്‍ഡിഎ കണ്‍വീനര്‍ സ്ഥാനം തുഷാര്‍ വെള്ളാപ്പള്ളി രാജിവയ്ക്കുന്നത്. ബിജെപി അവഗണനയിലുള്ള പ്രതിഷേധം കേന്ദ്ര നേതൃത്വത്തെ അറിയിക്കും. ബിഡിജെഎസിന്റെ സ്ഥാനാര്‍ഥികള്‍ക്ക് പ്രചാരണത്തിലും പരിഗണന ലഭിച്ചില്ല. ബിജെപി ഏകപക്ഷീയമായി തീരുമാനം കൈക്കൊള്ളുകയാണ്.

ബിജെപിയുമായി ഒന്നിച്ചുപോകുക പ്രയാസമാണ് എന്ന പരസ്യ പ്രഖ്യാപനമാണ് തുഷാറിന്റെ രാജി. ഇക്കുറി മത്സരിക്കാനും തുഷാര്‍ തയാറായിരുന്നില്ല. മുന്നണി മാറ്റത്തിന്റെ ആദ്യപടിയായി തന്നെ രാഷ്ട്രീയ കേന്ദ്രങ്ങള്‍ ഇതിനെ വിലയിരുത്തുന്നു.

സംസ്ഥാന നിയമസഭാ തിരഞ്ഞെടുപ്പില്‍ എസ്എന്‍ഡിപി യോഗം ആരെയും പിന്തുണയ്ക്കില്ലെന്ന് തുഷാര്‍ വെള്ളാപ്പള്ളി നേരത്തെ വെളിപ്പെടുത്തിയിരുന്നു. എസ്എന്‍ഡിപി യോഗം സ്വതന്ത്ര സംഘടനയാണ്. സര്‍ക്കാരിനെ എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍ പിന്തുണയ്ക്കുന്നില്ല. ബിഡിജെഎസ് എന്‍ഡിഎ വിടില്ല. യുഡിഎഫുമായി ചര്‍ച്ച നടത്തിയിട്ടില്ലെന്നും തുഷാര്‍ വെള്ളാപ്പള്ളി നേരത്തെ പറഞ്ഞു. രണ്ട് വള്ളത്തില്‍ കാലൂന്നിയുള്ള തുഷാറിന്റെ ഈ നില്‍പ്പാണ് എല്ലാത്തിനും പ്രശ്‌നം.

പാര്‍ട്ടിയിലെ സഹപ്രവര്‍ത്തകരോട് കൂടിയാലോചിച്ച തുഷാര്‍ നിര്‍ണായക തീരുമാനം കൈകൊള്ളുമെന്നാണ് വിവരം. ബിഡിജെഎസ് സംസ്ഥാന കൗണ്‍സില്‍ യോഗത്തില്‍ ഇക്കാര്യത്തില്‍ അന്തിമ തീരുമാനമുണ്ടാകുമെന്നാണ് വ്യക്തമാകുന്നത്.

സംസ്ഥാന നിയമസഭാ തെരഞ്ഞെടുപ്പില്‍ ബിജെപി നേതൃത്വം നല്‍കുന്ന എന്‍ഡിഎ സഖ്യം വലിയ പരാജയമാണ് ഏറ്റുവാങ്ങിയത്. നിലവിലുണ്ടായിരുന്ന ഏക സിറ്റിംഗ് സീറ്റ് നഷ്ടപ്പെട്ടതിന് പുറമെ വോട്ട് കണക്കിലും വളരെയേറെ പിന്നിലേക്ക് പോയി. പല സീറ്റുകളിലും എസ്എന്‍ഡിപിക്ക് വലിയ സ്വാധീനമുള്ള മേഖലകളാണ്.

ഒന്ന് മനസ് വച്ചെങ്കില്‍ ചില നേതാക്കളേയെങ്കിലും ജയിപ്പിച്ചെടുക്കാമായിരുന്നു. അതിനൊന്നും ശ്രമിക്കാതെ സ്ഥാനമാനങ്ങള്‍ മാത്രമാണ് നോക്കുന്നത്. അതിനാല്‍ തന്നെയാണ് ബിജെപി കേന്ദ്ര നേതൃത്വവും തുഷാറിന് ഒരു സഹായവും നല്‍കാത്തത്. ഈ സാഹചര്യത്തിലാണ് കണ്‍വീനര്‍ സ്ഥാനം ഒഴിയാനുള്ള തീരുമാനത്തിലേക്ക് തുഷാര്‍ എത്തിയതെന്നാണ് വിവരം.