ബംഗാളിൽ വമ്പൻ ട്വിസ്റ്റ്. മമതാ ബാനർജിയെ ഞെട്ടിച്ച് സിബിഐയുടെ മിന്നൽ നീക്കം...

നാരദ കേസില്‍ തൃണമൂല്‍ മന്ത്രിമാര്‍ അറസ്റ്റില്‍; സിബിഐ ഓഫീസില്‍ കുതിച്ചെത്തി മമതാബാനർജി...നാടകീയമായ രംഗങ്ങളാണ് ബംഗാളിൽ അരങ്ങേറിയിരിക്കുന്നത്. മന്ത്രിമാരെ കസ്റ്റഡിയിലെടുത്തതിനു പിന്നാലെ മുഖ്യമന്ത്രി മമത ബാനര്‍ജി സിബിഐ ആസ്ഥാനത്തെത്തിയതടാക്കമുള്ള സംഭവവികാസങ്ങളാണ് ബംഗാളിൽ ഇപ്പോൾ സംഭവിച്ചിരിക്കുന്നത്.

നാരദ ഒളിക്യാമറ കേസില്‍ സി.ബി.ഐ. ഇന്ന് കുറ്റപത്രം നല്‍കുവാൻ ഒരുങ്ങുകയാണ്.ഉന്നത പോലീസ് ഉദ്യോഗസ്ഥരും കേസില്‍ പ്രതികള്‍ ആണ്. കേസുമായി ബന്ധപ്പെട്ട് രണ്ട് മന്ത്രിമാരെ സി.ബി.ഐ. അറസ്റ്റ് ചെയ്തു.അറസ്റ്റിലായ മന്ത്രിമാർക്ക് ഐക്യദാർഢ്യം പ്രഖ്യാപിക്കാനാണ് മമത ബാനർജി സിബിഐ ആസ്ഥാനത്ത് എത്തിയത്. പറ്റുമെങ്കിൽ എന്നെ അറസ്റ്റ് ചെയ്യൂ എന്നാണ് മമത സി.ബി.ഐ. ഓഫീസിലെത്തിയതിനു ശേഷം പറഞ്ഞത്. അറസ്റ്റിലായ തൃണമൂൽ മന്ത്രി ഫിർഹാദ് ഹക്കീമിന്റെ വീട്ടിലെത്തിയതിനു ശേഷമാണ് മമത സി.ബി.ഐ. ആസ്ഥാനത്ത് എത്തിയത്.

ഇന്ന് രാവിലെ ഒമ്പത് മണിയോടെയാണ് മന്ത്രി ഫിർഹാദ് ഹക്കീമിനെ സി.ബി.ഐ. വീട്ടിൽ നിന്ന് കസ്റ്റഡിയിലെടുത്തത്. നടപടി ക്രമങ്ങൾ പാലിക്കാതെ സി.ബി.ഐ. തന്നെ അറസ്റ്റ് ചെയ്തുവെന്നായിരുന്നു ഫിർഹാദ് ഹക്കീo ഉയർത്തുന്ന വാദം. മന്ത്രിയായ സുബ്രതോ മുഖർജിയേയും തൃണമൂൽ എം.എൽ.എ. മദൻ മിത്രയേയും മുൻ എം.എൽ.എ. സോവൻ ചാറ്റർജിയേയും സി.ബി.ഐ. കസ്റ്റഡിയിലെടുത്തിട്ടുണ്ട്. കൊൽക്കത്തയുടെ മുൻ മേയറായ സോവൻ ചാറ്റർജി 2019ൽ പാർട്ടി വിട്ട് ബി.ജെ.പിയിൽ ചേർന്നിരുന്നുവെങ്കിലും മാർച്ചിൽ ബി.ജെ.പിയിൽ നിന്നും അദ്ദേഹം രാജിവയ്ക്കുകയും ചെയ്തു.

നാല് പേർക്കെതിരേയും അന്വേഷണം നടത്താൻ ഗവർണർ ജഗ്ദീപ് ധൻകർ അനുമതി നൽകിയിരുന്നു. കേസിൽ സി.ബി.ഐ. ഇന്ന് കുറ്റപത്രം സമർപ്പിക്കും. നാല് പേരെയും കസ്റ്റഡിയിൽ വേണമെന്ന് ആവശ്യപ്പെടും. കസ്റ്റഡി അപേക്ഷ കോടതി പരിഗണിച്ചില്ലെങ്കിൽ ജാമ്യം ലഭിക്കുന്നത് വരെ ഇവർ പോലീസ് ലോക്കപ്പിൽ തുടരേണ്ടി വരുമെന്ന അവസ്ഥയാണ് ഇപ്പോഴുള്ളത്.

എം.എൽ.എമാർക്കെതിരെ അന്വേഷണം നടത്താൻ സ്പീക്കർ അനുമതി നൽകുകയെന്ന കടമ്പ കടക്കേണ്ടതുണ്ട്. എന്നാൽ സ്പീക്കറെ സമീപിക്കാതെ നേരിട്ട് ഗവർണറിൽ നിന്ന് അനുമതി തേടിയാണ് മന്ത്രിമാരേയും എംഎൽഎമാരേയും കസ്റ്റഡിയിലെടുത്തിരിക്കുന്നത്. ഇന്ന് സി.ബി.ഐ. കസ്റ്റഡിയിലെടുത്ത നാല് പേരും 2014-ലെ നാരദ കോഴക്കേസ് കാലത്ത് മമത ബാനർജി സർക്കാരിൽ അംഗങ്ങളായിരുന്നു

പശ്ചിമ ബംഗാളിലെ തൃണമൂൽ കോൺഗ്രസ് നേതാക്കളായിരുന്ന മുകുൾ റോയിയും സുവേന്ദു അധികാരിയും അടക്കമുള്ളവർ സാങ്കൽപ്പിക കമ്പനിയുടെ പ്രതിനിധികളിൽനിന്ന് കൈക്കൂലി വാങ്ങുന്ന ദൃശ്യങ്ങൾ ഉൾപ്പെട്ടതായിരുന്നു നാരദ സ്റ്റിങ് ഓപ്പറേഷൻ വീഡിയോ. തൃണമൂൽ കോൺഗ്രസിന്റെ സ്ഥാപക അംഗങ്ങളിൽ ഒരാളായ മുകുൾ റോയ് 2017-ൽ ബി.ജെ.പിയിൽ ചേർന്നിരുന്നു. സുവേന്ദു അധികാരിയും പിന്നീട് ബി.ജെ.പിയിൽ ചേർന്നു.

നാരദ ന്യൂസ് പോർട്ടലിലെ മാത്യു സാമുവലാണ് ഒളിക്യാമറ ഓപ്പറേഷൻ നടത്തിയത്. 2016-ൽ പശ്ചിമ ബംഗാളിൽ നടന്ന നിയമസഭാ തിരഞ്ഞെടുപ്പിന് തൊട്ടുമുമ്പാണ് വീഡിയോ പുറത്തുവന്നത്. ഐ.പി.എസ്. ഉദ്യോഗസ്ഥനായ എസ്എം.എച്ച്. മിർസയടക്കമുള്ള പശ്ചിമ ബംഗാളിലെ ഉന്നത പോലീസ് ഉദ്യോഗസ്ഥർ കൈക്കൂലി വാങ്ങുന്നതിന്റെ ദൃശ്യങ്ങൾ പുറത്തുവന്നിരുന്നു. ബർദ്വാൻ ജില്ലാ പോലീസ് സൂപ്രണ്ടായിരുന്നു അന്ന് മിർസ. കേസിൽ അന്വേഷണം നടത്താൻ 2017-ലാണ് കൊൽക്കത്ത ഹൈക്കോടതി ഉത്തരവിട്ടത്.

തിരഞ്ഞെടുപ്പ് ഫലം വന്നതിനു ശേഷം ബംഗാളിൽ നടന്ന ആക്രമണങ്ങൾ ഇന്ത്യമുഴുവൻ ഭയത്തോടെ നോക്കി കണ്ടായിരുന്നു. തൃണമൂൽ പ്രവർത്തകർ ബിജെപി പ്രവർത്തകരെ ആക്രമിക്കുന്നു എന്ന തരത്തിലുള്ള ദൃശ്യങ്ങളും വാർത്തകളും വിവരങ്ങളും പുറത്തുവന്നിരുന്നു. എന്നാൽ ഈ ആക്രമണങ്ങൾ നടക്കുന്നതിനിടയിൽ തന്നെ മമതാബാനർജി സർക്കാർ അധികാരത്തിലേറിയിരുന്നു. അതിക്രൂരമായ ആക്രമണപരമ്പര കളായിരുന്നു ബംഗാളിൽ അരങ്ങേറിയത്. ഇതിനൊക്കെ പിന്നാലെയാണ് ഇപ്പോൾ തൃണമൂൽ മന്ത്രിമാരെ അറസ്റ്റ് ചെയ്തു എന്ന ഈ വാർത്ത കൂടെ പുറത്തു വരുന്നത്.