വര്ഷങ്ങള്ക്കിപ്പുറം മമ്മൂട്ടി, മോഹന്ലാല് ഒരുമിച്ചെത്തുന്ന ചിത്രം പാട്രിയറ്റ് ഏപ്രില് 9ന് തീയേറ്ററുകളില് എത്തും
വര്ഷങ്ങള്ക്കുശേഷം മലയാളത്തിന്റെ മഹാനടന്മാരായ മമ്മൂട്ടി, മോഹന്ലാല് എന്നിവരെ കേന്ദ്ര കഥാപാത്രങ്ങളാക്കി മഹേഷ് നാരായണന് രചനയും സംവിധാനവും നിര്വഹിക്കുന്ന പാട്രിയറ്റ് ഏപ്രില് 9ന് ലോകവ്യാപമായി റിലീസ് ചെയ്യും. ഡോക്ടര് ഡാനിയേല് ജെയിംസ് എന്ന കഥാപാത്രത്തെയാണ് മമ്മൂട്ടി അവതരിപ്പിക്കുന്നത്. കേണല് റഹിം നായ്ക് എന്ന കഥാപാത്രമായി മോഹന്ലാലും എത്തുന്നു. മമ്മൂട്ടിയും മോഹന്ലാലും പത്തൊമ്പതു വര്ഷത്തിനുശേഷം ഒരുമിക്കുന്ന പാട്രിയറ്റ് മലയാളത്തില് ഇന്നേവരെയുള്ളതില് ഏറ്റവും വലിയ ബഡ്ജറ്റിലാണ് ഒരുങ്ങുന്നത്. വിവിധ രാജ്യങ്ങളിലെ പത്തിലധികം ഷെഡ്യൂളുകളിലായി ഒരുവര്ഷത്തിലധികം നീണ്ടതായിരുന്നു ചിത്രീകരണം. അന്താരാഷ്ട്ര സ്പൈ ത്രില്ലറുകളെ അനുസ്മരിപ്പിക്കുന്ന രീതിയിലാണ് ഒരുക്കുന്നത്.
ട്വന്റി 20 ക്ക് ശേഷം മലയാളത്തിലെ പ്രമുഖതാരങ്ങളെല്ലാം ഒന്നിക്കുന്ന ചിത്രം കൂടിയാണ്. മമ്മൂട്ടി, മോഹന്ലാല് എന്നിവരോടൊപ്പം ഫഹദ് ഫാസില്, കുഞ്ചാക്കോ ബോബന്, നയന്താര, രേവതി എന്നിവര് ആണ് പ്രധാന വേഷങ്ങള് ചെയ്യുന്നത്. ജിനു ജോസഫ്, രാജീവ് മേനോന്, ഡാനിഷ് ഹുസൈന്, ഷഹീന് സിദ്ദിഖ്, സനല് അമന്, ദര്ശന രാജേന്ദ്രന്, സെറീന് ഷിഹാബ്, ഗ്രേസ് ആന്റണി എന്നിവരും, മദ്രാസ് കഫേ, പത്താന് തുടങ്ങിയവയിലൂടെ ശ്രദ്ധേയനായ തിയേറ്റര് ആര്ട്ടിസ്റ്റും സംവിധായകനുമായ പ്രകാശ് ബെലവാടിയും താരനിരയിലുണ്ട്. ക്യാമറ ചലിപ്പിച്ചത് മനുഷ് നന്ദനാണ്. സംഗീതം സുഷിന് ശ്യാം. എഡിറ്റിംഗ് മഹേഷ് നാരായണനും രാഹുല് രാധാകൃഷ്ണനും ചേര്ന്നാണ്.
ആന്റോ ജോസഫ് ഫിലിം കമ്പനി, കിച്ചപ്പു ഫിലിംസ് എന്നീ ബാനറില് ആന്റോ ജോസഫ്, കെ ജി അനില്കുമാര് എന്നിവര് ചേര്ന്നാണ് നിര്മ്മാണം. ആന് മെഗാ മീഡിയ പ്രദര്ശനത്തിന് എത്തിക്കും.
https://www.facebook.com/Malayalivartha
