ചെങ്ങന്നൂരില്‍ 2.5 കിലോ കഞ്ചാവുമായി യുവാവിനെ പൊലീസ് അറസ്റ്റു ചെയ്തു. മാന്നാര്‍ മുട്ടേപ്പള്ളി കുട്ടമ്പേരൂര്‍ മംഗലത്തേത്ത് കാട്ടില്‍തെക്കേതില്‍ രതുല്‍ രാജ് (22) ആണ് പിടിയിലായത്. ഇയാളില്‍ നിന്നും 2.535 കിലോഗ്രാം കഞ്ചാവ് പൊലീസ് കണ്ടെടുത്തു. കല്ലിശേരി പൊട്ടക്കുളം ഭാഗത്ത് സ്‌കൂട്ടറില്‍ കഞ്ചാവ് കടത്തുന്നതായി പൊലീസിന് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തില്‍ ഇന്നലെ വൈകിട്ട് 3.35 ഓടെ പൊലീസ് സംഘം സ്ഥലത്തെത്തി പരിശോധനയിലാണ് പ്രതി പിടിയിലായത്.

കഞ്ചാവും കടത്താന്‍ ഉപയോഗിച്ച സ്‌കൂട്ടറും പൊലീസ് കസ്റ്റഡിയിലെടുത്തു. രക്ഷപ്പെട്ട രണ്ടാം പ്രതിക്കായി തിരച്ചില്‍ ഊര്‍ജ്ജിതമാക്കിയിട്ടുണ്ടെന്നും, പ്രദേശത്തെ ലഹരി വില്‍പ്പന സംഘങ്ങളെക്കുറിച്ച് കൂടുതല്‍ അന്വേഷണം നടത്തി വരികയാണെന്നും ചെങ്ങന്നൂര്‍ സി.ഐ എ.സി. വിപിന്‍ പറഞ്ഞു. സി.ഐയുടെ നേതൃത്വത്തില്‍ എസ്.ഐ എം.ടി. മധുകുമാര്‍, ഗ്രേഡ് എസ്.ഐ അജേഷ് കുമാര്‍, സീനിയര്‍ സിവില്‍ പൊലീസ് ഓഫീസര്‍ മിഥിലാജ്, എ.എസ്.ഐ ദിനേഷ് ബാബു എന്നിവര്‍ ഉള്‍പ്പെട്ട സംഘമാണ് പ്രതിയെ പിടികൂടിയത്.