ജോസ് കെ മാണി പോയപ്പോള്‍ കോട്ടയത്ത് സംഭവിച്ച അതേ കാര്യമാണ് കൊല്ലത്തും യുഡിഎഫിന് സംഭവിക്കാനിരിക്കുന്നത്.

നിയമസഭാ തെരഞ്ഞെടുപ്പില്‍ സംഭവിച്ച കനത്ത പരാജയത്തില്‍ അതീവ ദു:ഖിതനാണ് ആര്‍.എസ്.പി നേതാവ് ഷിബു ബേബിജോണ്‍. പാര്‍ട്ടിയില്‍ നിന്ന് അവധിയെടുക്കാനടക്കമുള്ള കനത്ത തീരുമാനത്തിലേക്ക് പോയതാണ്. എന്നാല്‍ നേതാക്കള്‍ പറഞ്ഞ് ആശ്വസിപ്പിച്ചു.

പാര്‍ട്ടിയില്‍ നിന്ന് അവധിയെടുക്കാനുള്ള തീരുമാനത്തില്‍ നിന്ന് പിന്‍വാങ്ങുന്നതായി ഷിബു ബേബി ജോണ്‍ അറിയിച്ചു. പാര്‍ട്ടിയെ ദുര്‍ബലപ്പെടുത്തുന്ന പ്രവര്‍ത്തനം തന്റെ ഭാഗത്തു നിന്നും ഉണ്ടാകില്ലെന്ന് അദ്ദേഹം പറഞ്ഞു. അതേസമയം മുന്നണിമാറ്റത്തില്‍ ഉചിതമായ സമയത്ത് ഉചിതമായ തീരുമാനമെടുക്കുമെന്ന് ആര്‍.എസ്.പി സംസ്ഥാന സെക്രട്ടറി എ.എ. അസീസ് വ്യക്തമാക്കി.

തെരഞ്ഞെടുപ്പില്‍ പരാജയത്തിന്റെ പേരില്‍ മുന്നണി മാറാനോ മറ്റൊരു മുന്നണിയിലേക്ക് പോകാനോ ഇപ്പോള്‍ ആലോചിച്ചിട്ടില്ല. പരാജയത്തിന് കാരണം യു.ഡി.എഫിന്റെ സംഘടനാ ദൗര്‍ബല്യമാണ്. എല്‍.ഡി.എഫിനെ നേരിടാനുള്ള കെട്ടുറപ്പ് മുന്നണിക്കില്ല. യു.ഡി.എഫിന്റെ സംഘടനാസംവിധാനം ശക്തിപ്പെടുത്താന്‍ കോണ്‍ഗ്രസ് മുന്‍കയ്യെടുക്കണമെന്നും അസീസ് ആവശ്യപ്പെട്ടു.

ആര്‍.എസ്.പിയില്‍ പൊട്ടിത്തെറിയുണ്ടാകുമെന്ന് ചില വാര്‍ത്തകള്‍ കണ്ടു, അതൊന്നും ശരിയല്ല. രണ്ടാംതവണയും നിയമസഭയില്‍ പ്രാതിനിദ്ധ്യം ഇല്ലാത്തത് ആര്‍.എസ്.പി പ്രവര്‍ത്തകരെ നിരാശരാക്കിയെന്നും അദ്ദേഹം വ്യക്തമാക്കി. ആഗസ്റ്റ് 9ന് നേതൃത്വനിരയിലുള്ള 500 പേരുടെ സമ്മേളനം കൊല്ലത്ത് നടത്തുമെന്നും അസീസ് അറിയിച്ചു.

അതേസമയം, ഏതെങ്കിലും മുന്നണിയിലേക്ക് പോകാന്‍ കോവൂര്‍ കുഞ്ഞുമോന്റെ ക്ഷണം വേണ്ടെന്നും ആര്‍.എസ്.പിക്ക് അത്ര ഗതികേടില്ലെന്നും ഷിബു ബേബി ജോണ്‍ പറഞ്ഞു. 2014നു ശേഷം എല്‍.ഡി.എഫുമായി ഒരു ചര്‍ച്ചയും നടത്തിയിട്ടില്ല. ആര്‍.എസ്.പിക്ക് എല്‍.ഡി.എഫിലേക്ക് പോകേണ്ടി വന്നാല്‍ ആരോടാണ് സംസാരിക്കേണ്ടെന്ന് അറിയാമെന്നും അദ്ദേഹം വ്യക്തമാക്കി.

തുടര്‍ച്ചയായ രണ്ട് നിയമസഭാ തെരഞ്ഞെടുപ്പുകളില്‍ നേരിട്ട തിരിച്ചടികളുടെ പശ്ചാത്തലത്തില്‍ മുന്നണി മാറണമെന്ന ആവശ്യം ആര്‍.എസ്.പിയില്‍ ശക്തമാവുകയാണ്. യു.ഡി.എഫില്‍ തുടരുന്നത് നഷ്ടക്കച്ചവടമാണെന്ന വികാരമാണ് ഇന്നലെ ചേര്‍ന്ന സംസ്ഥാന സെക്രട്ടേറിയറ്റ് യോഗത്തില്‍ ബഹുഭൂരിപക്ഷവും പങ്കിട്ടത്.

മുന്നണിക്ക് തിരിച്ചടിയുണ്ടായതിന് പിന്നാലെ വിട്ടുപോകുന്നത് ന്യായമല്ലെന്ന അഭിപ്രായവുമുണ്ടായി. മുന്നണി നേതൃത്വം പരാജയമായിരുന്നുവെന്ന ശക്തമായ വിമര്‍ശനമാണ് ഏറെക്കുറെ എല്ലാവരുമുയര്‍ത്തിയത്. യു.ഡി.എഫിന് നേതൃത്വം നല്‍കുന്ന കോണ്‍ഗ്രസ്, പരാജയത്തില്‍ നിന്ന് പാഠമുള്‍ക്കൊണ്ട് ക്രിയാത്മകമാകുന്നുണ്ടോയെന്ന് നിരീക്ഷിക്കും. അല്ലെങ്കില്‍ കടുത്ത തീരുമാനത്തിലേക്ക് നീങ്ങേണ്ടി വരുമെന്ന സൂചനയാണ് പാര്‍ട്ടിവൃത്തങ്ങള്‍ നല്‍കുന്നത്.

മുന്നണി മാറ്റമടക്കമുള്ള വിഷയങ്ങളില്‍ ഉചിത സമയത്ത് ഉചിതമായ തീരുമാനമെടുക്കുമെന്ന് ആര്‍.എസ്.പി സംസ്ഥാന സെക്രട്ടറി എ.എ. അസീസ് വാര്‍ത്താലേഖകരോട് പറഞ്ഞു. കോണ്‍ഗ്രസിന്റെ സമീപനത്തില്‍ ആത്മാര്‍ത്ഥതയില്ലെന്ന വിമര്‍ശനമാണ് യോഗത്തില്‍ പലരും ഉന്നയിച്ചത്. ഇടതുമുന്നണിയില്‍ അങ്ങനെയായിരുന്നില്ല. മുന്നണിയുടെ സ്ഥാനാര്‍ത്ഥി ആരായാലും കൂട്ടായി പ്രവര്‍ത്തിച്ച് വിജയിപ്പിക്കാനുള്ള ശ്രമമാണവിടെ ഉണ്ടാകാറെന്നും ചിലര്‍ ചൂണ്ടിക്കാട്ടി.

കൊല്ലം നേതൃയോഗത്തിന് മുന്നോടിയായി 21ന് പാര്‍ട്ടി സംസ്ഥാന സമിതി ചേരും. മുന്നണി വിടുന്നതില്‍ നേതൃത്വത്തില്‍ രണ്ടഭിപ്രായമുണ്ടെന്ന സൂചനകളും പുറത്തായി. എന്തായാലും കൊല്ലത്തെ സംബന്ധിച്ച് നിര്‍ണായകമാകും ആര്‍എസ്പിയുടെ തീരുമാനം.