ദിവസങ്ങളായി പോലീസിനെ വെട്ടിലാക്കി ഒളിച്ചു കഴിഞ്ഞ മറൈന്‍ ഡ്രൈവില്‍ യുവതിയെ ഫ്‌ളാറ്റില്‍ തടങ്കലില്‍വെച്ച് പീഡിപ്പിച്ച കേസിലെ പ്രതി മാര്‍ട്ടിനെ അവസാനം പോലീസ് മാളത്തില്‍ പോയി പൊക്കി. മാര്‍ട്ടിന്റെ അറസ്റ്റിന് വഴിതെളിച്ചത് സൃഹൃത്തുക്കളുടെ മൊഴിയില്‍ നിന്നും ലഭിച്ച വിവരങ്ങളാണ്.

കൂട്ടാളികളായ തൃശ്ശൂര്‍ പാവറട്ടി സ്വദേശി പറക്കാട്ടുവീട്ടില്‍ ധനീഷ്(29), പുത്തൂര്‍ സ്വദേശി കണ്ടിരുത്തി വീട്ടി ശ്രീരാഗ്(27), മുണ്ടൂര്‍ സ്വദേശി പരിയാടന്‍ വീട്ടില്‍ ജോണ്‍ ജോയ്(28) എന്നിവര്‍ വ്യാഴാഴ്ച രാവിലെ അറസ്റ്റിലായിരുന്നു. ഇവരെ ചോദ്യം ചെയ്തതില്‍നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് തിരച്ചില്‍ നടത്തിയത്.

മാര്‍ട്ടിന്റെ വീടിന് അടുത്തുള്ള തൃശ്ശൂര്‍ മുണ്ടൂരിലെ ചതുപ്പ് പ്രദേശത്താണ് പോലീസ് തിരച്ചില്‍ തുടങ്ങിയത്. ആദ്യം ഉച്ചയ്ക്ക് ഒരു ഒളിസങ്കേതത്തില്‍ തിരച്ചില്‍ നടത്തിയെങ്കിലും ഇവിടെനിന്ന് പ്രതി കടന്നിരുന്നു. രാത്രിയോടെ ആളൊഴിഞ്ഞ ഒരു വീട്ടില്‍ മാര്‍ട്ടിന്‍ ഒളിവില്‍ കഴിയുന്നുണ്ടെന്ന രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് പിടിയിലായത്.

ജൂണ്‍ എട്ടിന് കാക്കനാട്ടെ ഫ്‌ളാറ്റില്‍ നിന്ന് മുങ്ങിയ പ്രതി ചതുപ്പ് പ്രദേശത്ത് ഒളിവില്‍ കഴിഞ്ഞുവരികയായിരുന്നു. മാര്‍ട്ടിനെ കൊച്ചിയില്‍നിന്ന് തൃശ്ശൂരിലേക്ക് പോകാന്‍ സഹായിച്ചത് രണ്ടാം പ്രതി ധനീഷാണ്. തൃശ്ശൂരില്‍ ഇയാള്‍ക്ക് ഒളിത്താവളവും ഭക്ഷണവും ഒരുക്കികൊടുത്തത് ശ്രീരാഗും ജോണും ചേര്‍ന്നായിരുന്നു. മാര്‍ട്ടിന്‍ കൊച്ചിയില്‍നിന്ന് തൃശ്ശൂരിലേക്ക് കടക്കാന്‍ ഉപയോഗിച്ച ബി.എം.ഡബ്ല്യു. കാറടക്കം നാല് വാഹനങ്ങള്‍ പോലീസ് കസ്റ്റഡിയിലെടുത്തിട്ടുണ്ട്.

മറൈന്‍ ഡ്രൈവിലെ ഫ്‌ളാറ്റില്‍ കണ്ണൂര്‍ സ്വദേശിനിയായ 27കാരിയെ തടങ്കലില്‍ വെച്ച് ലൈംഗികമായും ശാരീരികമായും ക്രൂരമായി പീഡിപ്പിക്കുകയായിരുന്നു മാര്‍ട്ടിന്‍. ഫെബ്രുവരി 15 മുതല്‍ മാര്‍ച്ച് എട്ട് വരെയുള്ള കാലയളവിലാണ് പീഡനം നടന്നത്. എറണാകുളത്ത് ഫാഷന്‍ ഡിസൈനറായി ജോലി ചെയ്ത് വരുമ്പോഴാണ് യുവതി മാര്‍ട്ടിനുമായി പരിചയത്തിലാകുന്നത്.

ഇവര്‍ ഒരുമിച്ച് താമസിച്ചുവരുകയുമായിരുന്നു. ഇതിനിടെ യുവതിയെ മറൈന്‍ ഡ്രൈവിലെ ഫ്‌ളാറ്റില്‍ കൊണ്ടുപോയി മാര്‍ട്ടിന്‍ ലൈംഗികമായി പീഡിപ്പിച്ചു. യുവതിയുടെ സ്വകാര്യദൃശ്യങ്ങള്‍ പകര്‍ത്തിയ പ്രതി, ഫ്‌ളാറ്റിന് പുറത്ത് പോകുകയോ പീഡന വിവരം പുറത്തു പറയുകയോ ചെയ്താല്‍ വീഡിയോ പുറത്ത് വിടും എന്ന് ഭീഷണിപ്പെടുത്തി പീഡിപ്പിച്ചു. ഒടുവില്‍ മാര്‍ട്ടിന്റെ കണ്ണുവെട്ടിച്ച് യുവതി ഫ്‌ളാറ്റില്‍നിന്ന് രക്ഷപ്പെട്ടു.

യുവതി നല്‍കിയ പരാതിയില്‍ ഏപ്രില്‍ എട്ടിന് എറണാകുളം സെന്‍ട്രല്‍ പോലീസ് കേസെടുത്തെങ്കിലും പ്രതിയെ അറസ്റ്റ് ചെയ്യാന്‍ വൈകി. തുടര്‍ന്ന് യുവതി ജൂണ്‍ ഏഴിന് പോലീസിനെതിരേ മാധ്യമങ്ങളിലൂടെ രംഗത്തെത്തുകയും വനിതാകമ്മിഷന്‍ അടക്കം പോലീസിനെ ശക്തമായി വിമര്‍ശിക്കുകയും ചെയ്തു. തുടര്‍ന്നാണ് പോലീസ് അന്വേഷണം ശക്തമാക്കിയത്.

മാര്‍ട്ടിന്‍ ജോസഫ് ജൂണ്‍ എട്ടുവരെ കൊച്ചിയിലുണ്ടായിരുന്നു എന്ന് വ്യക്തമാക്കുന്ന സി.സി.ടി.വി. ദ്യശ്യങ്ങള്‍ പുറത്തുവന്നു. പോലീസ് അന്വേഷണം കാര്യക്ഷമമായിരുന്നില്ല എന്ന യുവതിയുടെ ആരോപണങ്ങള്‍ ശരിവെക്കുന്നതാണ് ദൃശ്യങ്ങള്‍. ഫ്‌ളാറ്റിലെ ലിഫ്റ്റില്‍ നിന്ന് ഇറങ്ങിപ്പോകുന്ന സി.സി.ടി.വി. ദൃശ്യങ്ങളാണ് പുറത്തുവന്നത്.

പരാതി ലഭിച്ചശേഷം പോലീസ് പ്രതിക്കായി തിരച്ചില്‍ നടത്തിയിരുന്നു എന്ന് പറയുമ്പോഴാണ് നഗരത്തിലെതന്നെ ഒരു ഫ്‌ളാറ്റില്‍ മാര്‍ട്ടിന്‍ തങ്ങിയത്. ഏപ്രില്‍ എട്ടിനാണ് യുവതിയുടെ പരാതിയില്‍ എറണാകുളം സെന്‍ട്രല്‍ പോലീസ് കേസെടുത്തത്. പരാതി നല്‍കാന്‍ വൈകിയതാണ് പ്രതിക്ക് ഒളിവില്‍ പോകാന്‍ സഹായകരമായതെന്നായിരുന്നു പോലീസിന്റെ വിശദീകരണം.