ലക്ഷദ്വീപ് സന്ദര്ശിക്കാന് അനുമതി നല്കാത്ത അഡ്മിനിസ്ട്രേറ്റര്ക്കെതിരെ ഇടത് എംപിമാര്; പാര്ലമെന്റില് അവകാശലംഘന നോട്ടിസ് നല്കി
ലക്ഷദ്വീപ് സന്ദര്ശിക്കാന് അനുമതി നല്കാത്ത അഡ്മിനിസ്ട്രേറ്റര്ക്കെതിരെ ഇടത് എംപിമാര് പാര്ലമെന്റില് അവകാശലംഘന നോട്ടിസ് നല്കി. എളമരം കരീം, ബിനോയ് വിശ്വം, എം.വി.ശ്രേയാംസ് കുമാര്, വി.ശിവദാസന്, കെ.സോമപ്രസാദ്, ജോണ് ബ്രിട്ടാസ് എന്നിവര് രാജ്യസഭയിലും എ.എം.ആരിഫ്, തോമസ് ചാഴികാടന് എന്നിവര് ലോക്സഭയിലുമാണ് നോട്ടിസ് നല്കിയത്.
ലക്ഷദ്വീപിലെ നിലവിലെ സാഹചര്യം വിലയിരുത്താനും പുതിയ അഡ്മിനിസ്ട്രേറ്റര്ക്ക് കീഴില് നടപ്പിലാക്കിയിട്ടുള്ള പരിഷ്കാരങ്ങളും നയങ്ങളും ദ്വീപ് നിവാസികളെ ഏത് രീതിയിലാണ് ബാധിച്ചിരിക്കുന്നത് എന്ന് നേരിട്ട് മനസിലാക്കുന്നതിനുമാണ് ദ്വീപ് സന്ദര്ശിക്കാന് തീരുമാനിച്ചത്. ഇക്കാര്യങ്ങള് മനസ്സിലാക്കി രാഷ്ട്രപതിക്കും പ്രധാനമന്ത്രിക്കും വസ്തുതാന്വേഷണ റിപ്പോര്ട്ട് സമര്പ്പിക്കാനായിരുന്നു തീരുമാനം. ലക്ഷദ്വീപ് നിവാസികളുടെയും ജനപ്രതിനിധികളുടെയും അഭ്യര്ഥനയെ തുടര്ന്നാണ് ദ്വീപ് സന്ദര്ശിക്കാന് തീരുമാനിച്ചതെന്നും എം.പിമാര് പറയുന്നു.
അനുമതിക്കായി ബന്ധപ്പെട്ടവര്ക്ക് കത്തു നല്കിയിരുന്നുവെന്നും എന്നാല്, കോവിഡ് സാഹചര്യം കണക്കിലെടുത്ത് യാത്ര മാറ്റിവയ്ക്കണമെന്ന നിര്ദേശമാണ് ലക്ഷദ്വീപ് ഭരണകൂടം നല്കിയതെന്നും എം.പിമാര് വ്യക്തമാക്കി. തുടര്ന്ന് കോവിഡ് മാനദണ്ഡങ്ങള് പാലിച്ച് ദ്വീപില് ഔദ്യോഗിക സന്ദര്ശനം നടത്താന് അനുവദിക്കണം എന്ന് ആവശ്യപ്പെട്ട് വീണ്ടും കത്ത് നല്കിയിരുന്നു. ഈ കത്തിന് മറുപടി തരാന് പോലും ദ്വീപ് ഭരണകൂടം തയാറായില്ല.
പാര്ലമെന്റ് അംഗങ്ങളോടുള്ള ഇത്തരം അവഹേളനത്തിനെതിരെ അഡ്മിനിസ്ട്രേറ്ററോട് പാര്ലമെന്റ് വിശദീകരണം തേടണമെന്നും, കൃത്യവിലോപം കാണിച്ച മുഴുവന് ആളുകള്ക്കെതിരെയും നടപടികള് സ്വീകരിക്കണമെന്നും എം.പിമാര് ആവശ്യപ്പെട്ടു.
https://www.facebook.com/Malayalivartha
