മുട്ടില്‍ മരംമുറി കേസില്‍ സര്‍ക്കാരിനെ പ്രതിരോധത്തിലാക്കി പുതിയ രേഖകള്‍ പുറത്ത്. മരം മുറിയുമായി ബന്ധപ്പെട്ട് വയനാട് കളക്ടര്‍ നല്‍കിയ മുന്നറിയിപ്പ് സര്‍ക്കാര്‍ അവഗണിച്ചെന്ന് തെളിയിക്കുന്ന രേഖകള്‍ ആണ് ഇപ്പോള്‍ പുറത്തുവന്നിരിക്കുന്നത്.


ഡിസംബറിലാണ് കളക്ടര്‍ സര്‍ക്കാരിന് കത്തു നല്‍കിയത്. കളക്ടര്‍ നല്‍കിയ കത്തിന്റെ പകര്‍പ്പാണ് സര്‍ക്കാറിനെ അവതാളത്തിലാക്കി ഇപ്പോള്‍ പുറത്തുവന്നിരിക്കുന്നത്. ഈ കത്ത് വളരെയധികം നിര്‍ണായകമാകും ഇപ്പോഴത്തെ വനംമന്ത്രി എ കെ ശശീന്ദ്രന്റെ പരാമര്‍ശങ്ങളില്‍ സി പി ഐയ്ക്ക് കടുത്ത ദേഷ്യമാണുള്ളത് .

റവന്യൂ കമ്മിഷണര്‍ക്കായിരുന്നു കളക്ടര്‍ കത്ത് നല്‍കിയത്. സര്‍ക്കാര്‍ ഉത്തരവിന്റെ മറവില്‍ വ്യാപക മരംമുറി നടക്കുമെന്നാണ് വയനാട് ജില്ലാ കളക്ടര്‍ സര്‍ക്കാരിന് മുന്നറിയിപ്പ് നല്‍കിയിരുന്നത്.


എന്നാല്‍ 2020ലെ വിവാദ ഉത്തരവ് പുറത്തിറങ്ങുന്നതിന് മുന്നേ റവന്യു വകുപ്പിന്റെ ഒത്താശയോടെ വന ഭൂമിയിലെ മരങ്ങള്‍ വ്യാപകമായി മുറിച്ച് മാറ്റിയിട്ടുണ്ടെന്ന വിവരങ്ങളടക്കം മറനീക്കി വെളിച്ചത്തേക്ക് വരികയായിരുന്നു. പത്തനംതിട്ട ജില്ലയിലെ ചേത്തക്കലില്‍ ആരബിള്‍ ഭൂമിയിലെ മരങ്ങള്‍ മുറിച്ച് മാറ്റി പാറ ഖനനം ചെയ്യാനാണ് 2019ല്‍ റവന്യു വകുപ്പ് അനുമതി നല്‍കിയത്. അന്നത്തെ റാന്നി ഡി എഫ് ഒയും പാറഖനനത്തിന് അനുകൂലമായി റിപ്പോര്‍ട്ട് നല്‍കി.

എന്നാല്‍ മരംമുറിയില്‍ മുന്‍ റവന്യൂ, വനം മന്ത്രിമാര്‍ക്ക് വീഴ്ച പറ്റിയില്ലെന്ന നിലപാടിലാണ് സി പി ഐ. ഇ ചന്ദ്രശേഖരനും, കെ രാജുവിനും തെറ്റ് പറ്റിയിട്ടില്ലെന്ന് സി പി എമ്മിനെ സി പി ഐ അറിയിച്ചിട്ടുണ്ട്. റവന്യുവകുപ്പ് ഉത്തരവ് ഇറക്കിയത് പാര്‍ട്ടിയില്‍ ചര്‍ച്ചചെയ്ത ശേഷമായിരുന്നു . കുറവുകള്‍ കണ്ടപ്പോള്‍ ഇത് പിന്‍വലിച്ചെന്നും ഉദ്യോഗസ്ഥ വീഴ്ച അന്വേഷിക്കുമെന്നും സി പി ഐ പറയുന്നുണ്ട്.


ഇപ്പോഴത്തെ വനംമന്ത്രി എ കെ ശശീന്ദ്രന്റെ പരാമര്‍ശങ്ങളില്‍ സി പി ഐയ്ക്ക് കടുത്ത അമര്‍ഷമുണ്ട് . സി പി ഐയെ പ്രതിരോധത്തിലാക്കുന്ന തരത്തിലാണ് മന്ത്രിയുടെ പരാമര്‍ശമെന്നാണ് ഇപ്പോള്‍ ആരോപണം ഉയരുന്നത് .