സമ്പൂര്‍ണ ലോക്ഡൗണ്‍ ഇന്നും തുടരും...... ഭക്ഷണം ഇന്നും ഹോം ഡെലിവറി മാത്രം..... സമ്പൂര്‍ണ ലോക്ഡൗണിന്റെ ആദ്യദിനം നിയന്ത്രണങ്ങള്‍ ലംഘിച്ചതിന് 5346 പേര്‍ക്കെതിരെ കേസെടുത്തു, 2003 പേരെ അറസ്റ്റ് ചെയ്തു, 3645 വാഹനങ്ങള്‍ പിടിച്ചെടുത്തു, നാളെ മുതല്‍ 16 വരെ പതിവു നിയന്ത്രണങ്ങള്‍ തുടരും
സമ്പൂര്‍ണ ലോക്ഡൗണ്‍ ഞായറാഴ്ചയും തുടരും. ശനിയാഴ്ച കോവിഡ് വിലക്ക് ലംഘനം നടത്തിയതിന് 5346 ആളുകളുടെ പേരില്‍ കേസെടുത്തു. 2003 പേരെ അറസ്റ്റ് ചെയ്യുകയും 3645 വാഹനങ്ങള്‍ പിടിച്ചെടുക്കുകയും ചെയ്തു.
ക്വാറന്റീന്‍ ലംഘിച്ചതിന് 32 കേസുകള്‍ റിപ്പോര്‍ട്ട് ചെയ്തു. മാസ്‌ക് ധരിക്കാത്ത 10,943 പേര്‍ക്കെതിരേയും നടപടിയെടുത്തു. അത്യാവശ്യ യാത്രകള്‍ക്കല്ലാതെ പുറത്തിറങ്ങിയവര്‍ക്കെതിരേയാണ് നടപടിയുണ്ടായത്.
അതേസമയം ആദ്യദിനമായ ശനിയാഴ്ച കര്‍ശന നടപടികളാണ് പൊലീസ് കൈക്കൊണ്ടത്. അനാവശ്യമായി പുറത്തിറങ്ങിയവരെ തടഞ്ഞ് വാഹനങ്ങള്‍ കസ്റ്റഡിയിലെടുത്തു. പലര്‍ക്കെതിരെയും കേസെടുക്കുകയും പിഴ ഈടാക്കുകയും ചെയ്തു. പാതകള്‍ ഏറക്കുറെ വിജനമായിരുന്നു.
അവശ്യ സര്‍വിസുകള്‍ മാത്രമാണ് പ്രവര്‍ത്തിക്കാന്‍ അനുമതി. ശനിയാഴ്ച തുറക്കാന്‍ മുമ്പ് അനുമതി നല്‍കിയിരുന്ന സ്ഥാപനങ്ങളൊന്നും തുറക്കാന്‍ അനുവദിച്ചില്ല. ഹോട്ടലുകളില്‍നിന്ന് ഓണ്‍ലൈന്‍ ഡെലിവറി മാത്രമേ ഇന്നും അനുവദിക്കൂ.
പഴം, പച്ചക്കറി, പാല്‍, മീന്‍, മാംസം തുടങ്ങി അവശ്യ വസ്തുക്കള്‍ വില്‍ക്കുന്ന കടകള്‍ക്ക് രാവിലെ ഏഴുമുതല്‍ വൈകീട്ട് ഏഴുവരെ ഇന്നും തുറക്കാം. സാമൂഹിക അകലം പാലിച്ച് നിര്‍മാണ പ്രവര്‍ത്തനങ്ങള്‍ നടത്താന്‍ തടസ്സമില്ല. എന്നാല്‍, ഇക്കാര്യം പൊലീസ് സ്‌റ്റേഷനില്‍ മുന്‍കൂട്ടി അറിയിക്കണം.
ടെസ്റ്റ് പോസിറ്റിവിറ്റി നിരക്ക് കൂടുതലായതിനാലാണ് സംസ്ഥാനത്ത് ലോക്ഡൗണ്‍ നീട്ടാന്‍ വിദഗ്ധസമിതി നിദേശം നല്‍കിയത്. രോഗവ്യാപനനിരക്ക് പത്ത് ശതമാനത്തിനും താഴെ വന്നാല്‍ പിന്‍വലിക്കാമെന്നാണ് സമിതി നിലപാട്.
"
https://www.facebook.com/Malayalivartha
