പ്രണയം തകര്ത്തുകളഞ്ഞു... നിമിഷയെന്ന പൊന്നുമോളെ കാണാതായപ്പോള് തകര്ന്ന് ഒരു കുടുംബം; മകള് മതം മാറി ഫാത്തിമയായി; അവിടന്ന് ഐഎസ്എസില് ചേര്ന്നു; ഇപ്പോഴും കുടുംബത്തെ ഞെട്ടിക്കുന്ന പൊന്നു മോള്ക്കായി വാദിച്ച് അമ്മ ബിന്ദു
കേരളത്തെ ഞെട്ടിച്ച വാര്ത്തയാണ് നിമിഷ, ഫാത്തിമയായത്. 2016 ജൂലായിലാണ് ആറ്റുകാല് സ്വദേശി നിമിഷയെ കാണാനില്ലെന്ന പരാതിയുമായി അമ്മ ബിന്ദു രംഗത്തെത്തുന്നത്. അതോടെയാണ് നിമിഷ വാര്ത്തകളില് നിറയുന്നത്. തുടര്ന്ന് നടത്തിയ അന്വേഷണത്തിലാണ് ഭര്ത്താവിനൊപ്പം മതപരിവര്ത്തനം നടത്തി ഫാത്തിമയെന്ന പേരില് ഐസിസില് ചേരാന് നിമിഷ പോയതായി സ്ഥിരീകരിച്ചത്. തുടര്ന്ന് തീ തിന്ന ആ കുടുംബം ഇപ്പോഴും അതേ അവസ്ഥയിലാണ്.
കാസര്കോട് പൊയിനാച്ചി സെഞ്ചുറി ഡെന്റല് കോളേജ് അവസാന വര്ഷ വിദ്യാര്ഥിനിയായിരിക്കെ, 2013 സപ്തംബറിലാണ് നിമിഷ മതപരിവര്ത്തനം നടത്തി ഫാത്തിമ എന്ന പേരു സ്വീകരിച്ചതെന്നാണ് പോലീസ് രേഖകള് പറയുന്നത്.
പെണ്കുട്ടിയെ കാസര്കോട്ട് പഠിച്ചുകൊണ്ടിരിക്കെ കാണാതായിരുന്നു. കാണാതായ സമയത്ത് ബന്ധുക്കളുടെ പരാതിയുടെ അടിസ്ഥാനത്തില് പോലീസ് അന്വേഷണം നടത്തി. കാസര്കോട് വിദ്യാനഗര് പോലീസ് സ്റ്റേഷനില് രജിസ്റ്റര്ചെയ്ത പരാതിയുടെ അടിസ്ഥാനത്തില് നടന്ന അന്വേഷണത്തിന്റെ റിപ്പോര്ട്ടിലാണ് നിമിഷയുടെ മതപരിവര്ത്തനത്തെക്കുറിച്ചും മറ്റും വിവരിക്കുന്നത്.
കാസര്കോട് ജില്ലാ പോലീസ് സൂപ്രണ്ട് 2015 നവംബറില് അന്നത്തെ സംസ്ഥാന പോലീസ് മേധാവി ടി.പി.സെന്കുമാറിനു സമര്പ്പിച്ച റിപ്പോര്ട്ടില് പെണ്കുട്ടിയുടെ ജീവിതരീതിയിലുണ്ടായ മാറ്റത്തെക്കുറിച്ചും പറയുന്നുണ്ട്. കാസര്കോട് പൊയിനാച്ചി സെഞ്ചുറി ഡെന്റല് കോളേജിലെ ഒരു സഹപാഠിയുമായി നിമിഷ അടുപ്പത്തിലായി. ഇയാളുമായുള്ള അടുപ്പം നിമിഷയെ കടുത്തമതവിശ്വാസിയാക്കിയതായി റിപ്പോര്ട്ടില് പറയുന്നു.
പിന്നീട് നിമിഷ ഫാത്തിമ യോഗങ്ങളിലും ക്ലാസുകളിലും സ്ഥിരമായി പങ്കെടുത്തിരുന്നു. പഠിച്ചിരുന്ന കോളേജിലെ സീനിയര് വിദ്യാര്ഥികളും ആയിശ, മറിയ എന്നിവര് വഴിയാണ് ബെക്സന് വിന്സെന്റ് എന്ന ഈസയെ നിമിഷ ഫാത്തിമ പരിചയപ്പെടുന്നതും വിവാഹം കഴിക്കുന്നതും.
ബന്ധുക്കള് നല്കിയ ഹേബിയസ് കോര്പ്പസ് ഹര്ജിയെ തുടര്ന്ന് കോടതിയില് ഹാജരായപ്പോള് ഭര്ത്താവിനൊപ്പം പോകാന് താത്പര്യം പറഞ്ഞപ്പോള് കോടതി അന്ന് അതംഗീകരിക്കുകയായിരുന്നു. വെറും നാലു ദിവസത്തെ പരിചയം വെച്ചാണ് അവര് വിവാഹിതരായതെന്നാണ് പെണ്കുട്ടിയുടെ സുഹൃത്തുക്കള് വീട്ടുകാര്ക്കു നല്കിയ സൂചന. അസ്വാഭാവിക സാഹചര്യത്തില് കാണാതായ നിമിഷയുമായി 2016ജൂണ് 4ന് ശേഷം വീട്ടുകാര്ക്കു ബന്ധപ്പെടാനായിട്ടില്ല.
ഇന്ത്യയിലേക്ക് തിരികെ വരാന് ആഗ്രഹമുണ്ടെന്ന് നിമിഷ ഫാത്തിമയും സോണിയ സെബാസ്റ്റ്യനും നേരത്തെ വ്യക്തമാക്കിയിരുന്നു.
തിരികെയെത്തിയാല് തങ്ങള് ശിക്ഷിക്കപ്പെടുമോയെന്ന ഭയമുണ്ടെന്നും ജയിലിലടക്കില്ലെങ്കില് അമ്മയെ കാണാന് വരണമെന്നുണ്ടെന്നും നിമിഷ ഫാത്തിമ പറഞ്ഞിരുന്നു. ഐഎസില് ഉണ്ടായിരുന്ന പ്രതീക്ഷ ഇപ്പോഴില്ലെന്നും ഇനി തിരിച്ചുപോകില്ലെന്നും സോണിയ പറഞ്ഞിരുന്നു. ഇസ്ലാമായി ജീവിക്കുന്നതിനാണ് തങ്ങള് ഐ.എസില് ചേര്ന്ന് അഫ്ഗാനിസ്താനിലേക്ക് പോയത്. എന്നാല് ആ പ്രതീക്ഷകള്ക്കനുസരിച്ച് ജീവിക്കാന് കഴിഞ്ഞില്ല. അതുകൊണ്ട് മടങ്ങിവരാന് ആഗ്രഹിക്കുന്നു. ഇനി ഐഎസിലേക്കൊരു മടക്കയാത്രയിയില്ലെന്നാണ് നേരത്തെ ഇരുവരും വ്യക്തമാക്കിയത്.
ഇപ്പോഴും നിമിഷയുടെ അമ്മ തീ തിന്നുകയാണ്. ഐസിസില് ചേര്ന്ന മലയാളി യുവതികളെ തിരികെ കൊണ്ടുവരേണ്ടതില്ലെന്ന് കേന്ദ്ര സര്ക്കാര് നിലപാടെടുത്തതിന് പിന്നാലെ മകളെ നാട്ടിലേക്ക് കൊണ്ടുവരാന് നിയമനടപടികളുമായി മുന്നോട്ട് പോകുമെന്നറിയിച്ച് നിമിഷ ഫാത്തിമയുടെ അമ്മ ബിന്ദു പറഞ്ഞു. തന്റെ മകളെ തിരികെയെത്തിക്കാനായി മുഖ്യമന്ത്രി പിണറായി വിജയന്റെ സഹായം തേടുമെന്നും ഒരു മലയാള വാര്ത്താ ചാനലിനോട് സംസാരിക്കവെ ബിന്ദു പറഞ്ഞു.
തന്റെ രാജ്യത്തേക്ക് മടങ്ങി വരാന് നിമിഷയ്ക്ക് താത്പര്യമുണ്ടെന്നും മകളെ നാട്ടിലേക്ക് തിരികെയെത്തിച്ചതിനു ശേഷം നിയമനടപടികള്ക്ക് വിധേയമാകുന്നതില് തനിക്ക് എതിര്പ്പില്ലെന്നും ബിന്ദു പറയുന്നു. തങ്ങള് ആര്ക്കും ഒരു ദ്രോഹവും ചെയ്തിട്ടില്ലെന്നും എല്ലാത്തരം പരിഹാസങ്ങളും സഹിച്ചാണ് ജീവിക്കുന്നതിനും തനിക്ക് നീതി വേണമെന്നും നിമിഷ ഫാത്തിമയുടെ അമ്മ അഭ്യര്ത്ഥിക്കുന്നു.
https://www.facebook.com/Malayalivartha