കോവിഡ് പശ്ചാത്തലത്തില്‍ അവസാന സെമസ്റ്റര്‍ എന്‍ജിനിയറിംഗ് പരീക്ഷ ഓണ്‍ലൈനായി നടത്താന്‍ കോളേജുകളെ ചുമതലപ്പെടുത്താന്‍ സാങ്കേതിക സര്‍വകലാശാല തീരുമാനം.


ജൂണ്‍ 28നും ജൂലായ് 12നുമിടയില്‍ പരീക്ഷ നടത്തും. ചോദ്യപേപ്പര്‍ തയാറാക്കുന്നതും മൂല്യനിര്‍ണയം നടത്തുന്നതും കോളേജുകളിലെ അദ്ധ്യാപകരായിരിക്കും.

കാല്‍ലക്ഷത്തോളം കുട്ടികളാണ് അവസാന സെമസ്റ്റര്‍ പരീക്ഷയെഴുതുന്നത്. മാതൃകാ ചോദ്യപേപ്പര്‍ സര്‍വകലാശാല കോളേജുകള്‍ക്ക് കൈമാറും. ഇതില്‍ നിന്ന് ഓരോ വകുപ്പിലെയും അദ്ധ്യാപകര്‍ യഥാര്‍ത്ഥ ചോദ്യപേപ്പര്‍ തയ്യാറാക്കി ഇമെയില്‍, വാട്‌സ് ആപ് സംവിധാനങ്ങളിലൂടെ വിദ്യാര്‍ത്ഥികള്‍ക്ക് നല്‍കും.

വീട്ടിലിരുന്ന് ഉത്തരമെഴുതി സ്‌കാന്‍ ചെയ്ത് തിരിച്ചയയ്ക്കണം. ഇത് പ്രിന്റൗട്ടെടുത്ത് അദ്ധ്യാപകര്‍ മൂല്യനിര്‍ണയം നടത്തും. മൂന്ന് മണിക്കൂറായിരുന്ന പരീക്ഷ 2 മണിക്കൂര്‍ 15 മിനിറ്റായും 100 മാര്‍ക്കെന്നത് 70 മാര്‍ക്കായും ചുരുക്കിയിട്ടുണ്ട്. ഈ പരീക്ഷയിലെ ഗ്രേഡില്‍ തൃപ്തിയില്ലാത്തവര്‍ക്കായി കൊവിഡിനു ശേഷം സാധാരണ രീതിയിലുള്ള എഴുത്തുപരീക്ഷ നടത്തും.



ഈ പരീക്ഷ ആദ്യത്തെ ചാന്‍സായി കണക്കാക്കും. ജൂലായ് അവസാനത്തോടെ ബിരുദ സര്‍ട്ടിഫിക്കറ്റ് ലഭിച്ചില്ലെങ്കില്‍ കാമ്പസ് പ്ലേസ്മെന്റ് ലഭിച്ചവര്‍ക്ക് ജോലിയില്‍ പ്രവേശിക്കാനും ഉപരിപഠനത്തിനും തടസമുണ്ടാവുമെന്നതിനാലാണ് ഇത്തരമൊരു തീരുമാനമെന്നും കോപ്പിയടി തടയാന്‍ കോളേജ്തല നിരീക്ഷണ സംവിധാനം ഒരുക്കുമെന്നും സര്‍വകലാശാല അറിയിച്ചു.