കോട്ടയത്ത് ആരോഗ്യപ്രവര്‍ത്തകന്റെ മൃതദേഹം കത്തിക്കരിഞ്ഞ നിലയില്‍.... മരണത്തില്‍ ദുരൂഹതയാരോപിച്ച് ബന്ധുക്കള്‍ രംഗത്ത്
മെഡിക്കല്‍ കോളജിലെ ഡോക്ടര്‍മാര്‍ താമസിക്കുന്ന ക്വാര്‍ട്ടേഴ്സിനു സമീപം ആരോഗ്യപ്രവര്‍ത്തകന്റെ മൃതദേഹം കത്തിക്കരിഞ്ഞ നിലയില്‍. മരണത്തില്‍ ദുരൂഹതയാരോപിച്ച് ബന്ധുക്കള്‍.
ചുങ്കം, മള്ളൂശേരി, മര്യാതുരുത്ത് സെന്റ് തോമസ് എല്‍.പി. സ്‌കൂളിനു സമീപം കളരിക്കല്‍ കാര്‍ത്തികയില്‍ (പടിഞ്ഞാറേമുറിയില്‍) പരേതനായ രാജശേഖരന്റെയും വിജയമ്മയുടെയും മകന്‍ പ്രശാന്ത് രാജാ(36)ണു മരിച്ചത്. കോവിഡ് സംബന്ധമായി താല്‍ക്കാലിക ആരോഗ്യപ്രവര്‍ത്തകനായിരുന്നു പ്രശാന്ത്.
കഴിഞ്ഞ വെള്ളിയാഴ്ച രാവിലെ പത്തോടെ വീട്ടില്‍നിന്നു ജോലിക്കുപോയ ഇദ്ദേഹം രാത്രി വൈകിയും തിരിച്ചെത്തിയില്ല. സ്വകാര്യസ്ഥാപനത്തില്‍നിന്നു വാടകയ്ക്കെടുത്ത ഇന്നോവ കാറിലാണു ജോലിക്കു പോയിരുന്നത്. വൈകിട്ട് 5.30 വരെ ബന്ധുക്കളുമായി ഫോണില്‍ സംസാരിച്ചിരുന്നു.
പിന്നീട് ഫോണ്‍ സ്വിച്ച്ഓഫ് ആയി. ഇന്നലെ രാവിലെ പ്രശാന്തിന്റെ ഭാര്യയും ബന്ധുക്കളും ഗാന്ധിനഗര്‍ പോലീസില്‍ പരാതി നല്‍കി. ഈസമയം പ്രശാന്ത് വാടകയ്ക്കെടുത്ത ഇന്നോവ കാര്‍ പോലീസ് സ്റ്റേഷനു മുന്നിലൂടെ കടന്നുപോയി. ഇതു ശ്രദ്ധയില്‍പെട്ട പോലീസ് ഗാന്ധിനഗര്‍ ജങ്ഷനിലെ പെട്രോള്‍ പമ്ബിനു സമീപം തടഞ്ഞ് കാര്‍ കസ്റ്റഡിയിലെടുത്തു.
കാറിലുണ്ടായിരുന്നയാളെ ചോദ്യംചെയ്തപ്പോള്‍, തന്റെ കാറാണെന്നും ജി.പി.എസ്. സംവിധാനത്തിലൂടെ കണ്ടെത്തുകയായിരുന്നെന്നും താക്കോല്‍ കാറില്‍ത്തന്നെ ഉണ്ടായിരുന്നെന്നും പറഞ്ഞു.
തുടര്‍ന്ന്, കാര്‍ കിടന്ന സ്ഥലത്ത് പോലീസ് തെരഞ്ഞു. മെഡിക്കല്‍ കോളജ് കുട്ടികളുടെ ആശുപത്രി റോഡില്‍നിന്നു ചാത്തുണ്ണിപ്പാറയ്ക്കു പോകുന്ന വഴിയില്‍ അരക്കിലോമീറ്റര്‍ മാറി, വിജനപ്രദേശത്തെ കുറ്റിക്കാട്ടിലാണു മൃതദേഹം കണ്ടെത്തിയത്. ഇതിനു സമീപത്താണു ഡോക്ടര്‍മാരുടെ ക്വാര്‍ട്ടേഴ്സ്. മൃതദേഹം മെഡിക്കല്‍ കോളജ് മോര്‍ച്ചറിയിലേക്കു മാറ്റി. വൈക്കം വെള്ളൂര്‍ സ്വദേശി പാര്‍വതിയാണു ഭാര്യ. മക്കള്‍: അദ്വൈത് (നാല്), അര്‍ണവ് (ഒന്ന്).
ഫോറന്‍സിക് വിഭാഗത്തിലെ ഡോക്ടറാണെന്ന വ്യാജേന, വിദേശജോലി വാഗ്ദാനം ചെയ്ത് പ്രശാന്ത് പലരില്‍നിന്നും വന്‍തുക കൈപ്പറ്റിയിട്ടുണ്ടെന്നു പോലീസ് പറഞ്ഞു.
ജോലി ലഭിക്കാതായപ്പോള്‍ ഇവരില്‍ ഒരാള്‍ നല്‍കിയ ഒമ്പതുലക്ഷം രൂപ തിരികെച്ചോദിച്ചു. തുക ഇന്നലെ നല്‍കേണ്ടതായിരുന്നു. അതു സാധിക്കാത്തതിനാല്‍ സാനിറ്റൈസര്‍ ദേഹത്തൊഴിച്ച് തീകൊളുത്തി ആത്മഹത്യ ചെയ്യുകയായിരുന്നെന്നാണു പോലീസ് നല്‍കുന്ന സൂചന.
മരണത്തിലെ ദുരൂഹത അന്വേഷിക്കണമെന്നു ബന്ധുക്കള്‍ ആവശ്യപ്പെട്ടു. പ്രശാന്തിനു സാമ്പത്തികബുദ്ധിമുട്ടുണ്ടായിരുന്നില്ല. കോവിഡ് വ്യാപനം കുറയുമ്‌ബോള്‍ വിദേശത്തു പോകാന്‍ തയാറെടുത്തിരിക്കുകയായിരുന്നു. പ്രശാന്ത് ആത്മഹത്യ ചെയ്യില്ലെന്നും ബന്ധുക്കള്‍ പറയുന്നു.
https://www.facebook.com/Malayalivartha
