ഐ.എസ് തീവ്രവാദികളുടെ ബന്ധുക്കളെ കാണാന് വിദേശമാധ്യമം തലസ്ഥാനത്ത് എത്തിയതെന്തിന്?
വിദേശ രാജ്യങ്ങളിലെത്തി ഐ.എസ്. ഭീകരരായി മാറിയ മലയാളി നിമിഷയുടെയും കുടുംബത്തിന്റെയും ചിത്രങ്ങളുമായി ഓസ്ട്രേലിയന് ടെലിവിഷന് ചാനല് പ്രതിനിധികള് തലസ്ഥാനത്ത്. നിമിഷയുടെ അമ്മ ബിന്ദുവാണ് ഇക്കാര്യം വ്യക്തമാക്കിയത്. ഇന്ത്യക്കെതിരെ യുദ്ധപ്രഖ്യാപനം നടത്തി രാജ്യം വിട്ട നിമിഷയുടെ കാര്യത്തില് ഓസ്ട്രേലിയന് മാധ്യമത്തിന് എന്താണിത്ര താത്പര്യമെന്ന് വ്യക്തമല്ല.
ഏതായാലും നിമിഷയും സോണിയയും നബീസയും മറിയവും ഇനി മലയാള മണ്ണ് കാണില്ലെന്ന കാര്യത്തില് തീരുമാനമായി കഴിഞ്ഞു. ഇക്കാര്യം പുറത്തുവന്നയുടനെയാണ് ഓസ്ട്രേലിയന് മാധ്യമം നിമിഷയുടെ അമ്മ ബിന്ദുവിനെ കണ്ടത്.
വിദേശ വാര്ത്താ ചാനലുകള് പുറത്തുവിട്ട ചിത്രങ്ങളിലൂടെയാണ് നിമിഷയേയും കുടുംബത്തേയും അമ്മ തിരിച്ചറിഞ്ഞത്. നിമിഷയ്ക്കൊപ്പം ഭര്ത്താവ് ഈസ, മകള് മൂന്നുവയസ്സുകാരി ഉമ്മക്കുല്സു എന്നിവരുമുള്ളതായി അമ്മ ബിന്ദു പറയുന്നു. മൂന്നുദിവസം മുമ്പാണ് ഓസ്ട്രേലിയന് വാര്ത്താ ചാനല് പ്രതിനിധികള് സമീപിച്ചത്.
വാര്ത്താ ഏജന്സികള് വഴി അവര്ക്ക് കൈമാറിക്കിട്ടിയ ചിത്രങ്ങള് കാണിച്ചു. ഇതില്നിന്ന് മരുമകനേയും പേരക്കുട്ടിയേയും തിരിച്ചറിഞ്ഞിട്ടുണ്ട്. മുഖം മറച്ചതിനാല് നിമിഷയെ വ്യക്തമായി തിരിച്ചറിയാന് സാധിച്ചില്ലെങ്കിലും മകള് തന്നെയെന്നാണ് ബോധ്യമെന്നും ബിന്ദു പറഞ്ഞു.
തന്റെ മകളുടെയും പേര കുട്ടിയുടെയും മനുഷ്യാവകാശം സംരക്ഷിക്കണമെന്ന് നിമിഷ ഫാത്തിമയുടെ അമ്മ ബിന്ദു അലമുറയിടുന്നുണ്ടെങ്കിലും കേന്ദ്ര സര്ക്കാര് വാതില് കൊട്ടിയടച്ചു.
നിമിഷ ഫാത്തിമയുടെയും മകളുടെയും മനുഷ്യാവകാശത്തെക്കാള് വലുതാണ് രാജ്യത്തിന്റെ മനുഷ്യാവകാശം എന്ന നിലപാടിലാണ് നമ്മുടെ രാജ്യം. രാജ്യ സ്നേഹികള് എന്നു സ്വയം വിശേഷിപ്പിക്കുന്നവരുടെ ആവശ്യങ്ങള്ക്ക് നേരേ കേന്ദ്ര സര്ക്കാര് പൂര്ണമായും മുഖം തിരിച്ചു.
സിറിയ അടക്കമുള്ള രാജ്യങ്ങളിലാണ് മലയാളികള് ഉള്പ്പെട്ട ഇന്ത്യന് സംഘം ഭീകരപ്രവര്ത്തനങ്ങള്ക്കായി എത്തിയത്. ഭീകരസംഘടനയായ ഐഎസില് ചേര്ന്ന മലയാളികള് അടക്കമുള്ള സ്ത്രീകളെ സ്വീകരിക്കില്ലെന്ന് ഇന്ത്യ വ്യക്തമാക്കിയതോടെ കപട രാജ്യസ്നേഹികള് ലക്ഷദ്വീപിന് ശേഷം ഇത് ആയുധമാക്കാനുള്ള ഒരുക്കമാണ് അണിയറയില് നടത്തുന്നത്. ഇവരുടെ ഐഎസ് ഭീകരരായ ഭര്ത്താക്കന്മാര് കൊല്ലപ്പെട്ടതോടെയാണ് രാജ്യത്തേക്ക് മടങ്ങണമെന്ന് ഇവര് ആവശ്യപ്പെട്ടത്. ചില ദേശീയ പത്രങ്ങള്ക്ക് കേന്ദ്ര സര്ക്കാരിന്റെ നടപടി ഒട്ടും സഹിക്കുന്നില്ല.
മലയാളി വനിതകള് ഉള്പ്പെട്ട ഇന്ത്യക്കാര് കാബൂളിലെ ജയിലില് തടവില് കഴിയുകയാണെന്നു കേന്ദ്രസര്ക്കാര് തന്നെയാണ് വ്യക്തമാക്കിയത്. . ഇന്ത്യാക്കാരില് മലയാളികളായ തിരുവനന്തപുരം സ്വദേശിനി നിമിഷ ഫാത്തിമ, കാസര്ഗോഡ് സ്വദേശിനി അയിഷ എന്ന സോണിയ ബെബാസ്റ്റ്യന്, നബീസ, മറിയം എന്നിവരാണ് ഇപ്പോള് തടവിലുള്ളത്. ഇത്രയും പേരുടെ പേരുകള് മാത്രമാണ് ഇതുവരെ പുറത്തുവന്നിട്ടുള്ളത്.കൂടുതലാളുകള് ഉണ്ടോ എന്ന് വ്യക്തമല്ല.
2019 നവംബര്, ഡിസംബര് മാസങ്ങളില് അഫ്ഗാനിസ്ഥാനില് കീഴടങ്ങിയ ആയിരക്കണക്കിന് ഇസ്ലാമിക് സ്റ്റേറ്റ് ഭീകരരിലാണ് ഇവരും ഉള്പ്പെട്ടത്.
13 രാജ്യങ്ങളില് നിന്നുള്ള 408 ഇസ്ലാമിക് സ്റ്റേറ്റ് ഭീകരരെ അഫ്ഗാനിസ്ഥാന് ജയിലുകളില് പാര്പ്പിച്ചിട്ടുണ്ടെന്ന് ദേശീയ സുരക്ഷാ ഡയറക്ടറേറ്റ് മേധാവി അഹ്മദ് സിയ സരജ് കാബൂളില് മാധ്യമപ്രവര്ത്തകരോട് പറഞ്ഞു. ഇതില് പത്തോളം ഇന്ത്യക്കാര്, 16 ചൈനക്കാര്, 299 പാകിസ്ഥാനികള്, രണ്ട് ബംഗ്ലാദേശികള്, രണ്ട് മാലിദ്വീപില് നിന്നുള്ളവര് എന്നിവരും ഉള്പ്പെടുന്നു.
2016 ജൂലായിലാണ് നിമിഷയെ കാണാതായത്. കാസര്ഗോഡുനിന്ന് ഐഎസില് ചേരാന് അഫ്ഗാനിലേക്കു പോയ സംഘത്തിനൊപ്പമാണ് തിരുവനന്തപുരം ആറ്റുകാല് സ്വദേശിയായ നിമിഷയും പോയത്. രണ്ടു വര്ഷങ്ങള്ക്ക് മുന്പ് ഇവര് അമ്മ ബിന്ദുവുമായി സംസാരിച്ചിരുന്നു. പേരക്കുട്ടിയുടെ ചിത്രവും ഇരുവരും അയച്ചു നല്കിയിരുന്നു.
കാസര്ഗോഡ് പൊയിനാച്ചി സെഞ്ചുറി ഡെന്റല് കോളേജില് അവസാനവര്ഷ ബിഡിഎസ് വിദ്യാര്ത്ഥിനിയായിരുന്ന നിമിഷ അവിടെ വെച്ച് സൗഹൃദത്തിലായ പാലക്കാട് സ്വദേശി ബെക്സണ് വിന്സെന്റിനെ വിവാഹം കഴിക്കുകയായിരുന്നു. തുടര്ന്ന് ഇരുവരും ഇസ്ലാംമതം സ്വീകരിച്ച് ഐഎസില് ചേരുന്നതിനായി അഫ്ഗാനിലേക്ക് കടക്കുകയായിരുന്നു. ശ്രീലങ്കവഴിയാണ് ഇവരുള്പ്പെട്ട സംഘം അഫ്ഗാനിലേക്കു പോയത്.
2016 മെയ് 31ന് ഭര്ത്താവായ അബ്ദുള് റാഷിദ് അബ്ദുള്ളയ്ക്കൊപ്പം കാസര്ഗോഡ് സ്വദേശിനി സോണിയ സെബാസ്റ്റിയന് അഫ്ഗാനിസ്ഥാനിലേക്ക് കടന്നതായി ഇന്ത്യ നേരത്തെ സ്ഥിരീകരിച്ചിട്ടുണ്ട്. സോണിയയെ ഫോട്ടോ കണ്ട് ഉദ്യോഗസ്ഥര് തിരിച്ചറിഞ്ഞതായും റിപ്പോര്ട്ടുകള് പുറത്തുവന്നിട്ടുണ്ട്.
സോണിയ എന്ന അയിഷയെ വിവാഹം കഴിച്ച ശേഷം കോഴിക്കോട് പീസ് ഇന്റര്നാഷണല് സ്കൂളില് അധ്യാപകനായി എത്തിയ റാഷിദ് സഹപ്രവര്ത്തകയായ യാസ്മിന് എന്ന ബീഹാറി യുവതിയുമായി സൗഹൃദത്തിലായി. പിന്നീട് യാസ്മിനെ റാഷിദ് തന്റെ രണ്ടാം ഭാര്യയാക്കി.
2016 മെയ് 31നാണ് മൂവരും മുംബൈ വഴി മസ്ക്കറ്റിലേക്കും അവിടന്ന് അഫ്ഗാനിസ്ഥാനിലേക്കും കടക്കുകയായിരുന്നു. രാജ്യം വിടുമ്പോള് അയിഷ മൂന്ന് മാസം ഗര്ഭിണിയായിരുന്നു. പിന്നീട് അവര് ഒരു പെണ്കുഞ്ഞിന് ജന്മം നല്കിയതായി വിവരം ലഭിച്ചിരുന്നു. ഐഎസിന്റെ സീക്രട്ട് ക്ലാസ്സ് എന്ന വിഭാഗത്തിലാണ് സോണിയയും ഭര്ത്താവ് റാഷിദ് അബ്ദുള്ളയും പ്രവര്ത്തിച്ചിരുന്നത്. കഴിഞ്ഞ ജൂണില് യുഎസ് സൈന്യം നടത്തിയ വ്യോമാക്രമണത്തില് റാഷിദ് അബ്ദുള്ള കൊല്ലപ്പെട്ടതായി നാട്ടിലുള്ളവര്ക്ക് സന്ദേശം ലഭിച്ചിരുന്നു. എന്ഐഎയുടെ മോസ്റ്റ് വാണ്ടഡ് ലിസ്റ്റിലാണ് അയിഷയുള്ളത്.
കാര്യങ്ങള് ഇങ്ങനെയൊക്കെയാവുമ്പോള് ഐ. എസ് ഭീകരരെ കാണാന് വിദേശ മാധ്യമങ്ങള് കാതങ്ങള് സഞ്ചരിച്ച് എത്തുന്നതാണ് അത്ഭുതം.
https://www.facebook.com/Malayalivartha