എം.വി ജയരാജന് ഇത്രയും ധൈര്യമോ? പിണറായിക്കെതിരെ രംഗത്തുവരാന്‍
ഒടുവില്‍ സി പി എമ്മിന്റെ ഉള്ളിലിരുപ്പ് വ്യക്തമായി. ന്യൂനപക്ഷ ക്ഷേമ പദ്ധതിയിലെ 80:20 അനുപാതം റദ്ദാക്കിയ കോടതി വിധിക്കെതിരെ അപ്പീല്‍ നല്‍കാത്ത പിണറായി വിജയന്‍ സര്‍ക്കാരിനെതിരെ സി പി എം രംഗത്തെത്തി.
വിധി പുറത്തുവന്ന് ആഴ്ചകള്‍ കഴിഞ്ഞിട്ടും അപ്പീല്‍ നല്‍കുന്ന കാര്യത്തില്‍ സര്‍ക്കാര്‍ തീരുമാനമെടുത്തിട്ടില്ല. അപ്പീല്‍ നല്‍കണമോ വേണ്ടയോ എന്ന കാര്യത്തില്‍ പോലും സര്‍ക്കാര്‍ ഒരു തീരുമാനത്തിലെത്തിയില്ല. ഇതിനെതിരെ വ്യാപകമായ പ്രതിഷേധം മുസ്ലീങ്ങളുടെ ഭാഗത്ത് നിന്നും ഉണ്ടായെങ്കിലും സര്‍ക്കാര്‍ അത് വകവച്ചുകൊടുത്തിട്ടില്ല. ഇതാണ് സാഹചര്യമെന്നിരിക്കെയാണ് സി പി എം കണ്ണൂര്‍ ജില്ലാ സെക്രട്ടറി എം വി ജയരാജന് ഹൈക്കോടതിയെ വിമര്‍ശിച്ച് രംഗത്തെത്തിയത്.ഹൈക്കോടതി വിധിയെ വിമര്‍ശിക്കുകയെന്നാല്‍ അതിനെതിരെ അപ്പീല്‍ നല്‍കാത്ത സര്‍ക്കാരിനെയും വിമര്‍ശിക്കുക എന്നാണര്‍ത്ഥം.
ന്യൂനപക്ഷ ക്ഷേമ പദ്ധതിയിലെ 80:20 ശതമാനം അനുപാതം റദ്ദാക്കിയ ഹൈക്കോടതി വിധി മുസ്ലീം സമൂഹത്തിന്റെ സാഹചര്യങ്ങളെ കുറിച്ച് പഠിക്കാത്തതാണെന്നാണ് അദ്ദേഹത്തിന്റെ വിമര്‍ശനം.
ഹൈകോടതി കേരളത്തിലെ സാമൂഹ്യ സാഹചര്യം മനസ്സിലാക്കണമായിരുന്നുവെന്ന് എംവി ജയരാജന് ചൂണ്ടികാട്ടി. പാലോളി കമ്മിറ്റിയുടെ നിര്‍ദേശങ്ങള്‍ ആഴത്തില്‍ പഠിക്കണമായിരുന്നു. ഇത് പഠിക്കാന്‍ ആരെയെങ്കിലും ചുമതലപ്പെടുത്താമായിരുന്നുവെന്നും അദ്ദേഹം പറഞ്ഞു. കേരള മുസ്ലീം ജമാ അത്ത് സംഘടിപ്പിച്ച വെര്‍ച്ചല്‍ യോഗത്തില്‍ പങ്കെടുത്ത് സംസാരിക്കുകയായിരുന്നു ജയരാജന്.
ഇക്കഴിഞ്ഞ മെയ് മാസത്തിലായിരുന്നു സംസ്ഥാനത്തെ ന്യൂനപക്ഷ ക്ഷേമ പദ്ധതികളുടെ വിതരണത്തിലെ 80:20 അനുപാതം റദ്ദാക്കിക്കൊണ്ട് ഹൈക്കോടതി വിധി പുറപ്പെടുവിച്ചത്. 80 ശതമാനം മുസ്ലിം വിഭാഗത്തിനും 20 ശതമാനം ഇതര ന്യൂനപക്ഷ വിഭാഗങ്ങള്‍ക്കും എന്ന അനുപാതത്തിലായിരുന്നു ക്ഷേമ പദ്ധതികള്‍
മുന്നോട്ട് പോയിരുന്നത്. ഇപ്പോഴത്തെ ജനസംഖ്യ അനുസരിച്ച് ഈ അനുപാതം പുനര്‍ നിശ്ചയിക്കണമെന്നാണ് കേരള ഹൈക്കോടതി ആവശ്യപ്പെട്ടത്. നിലവിലെ അനുപാതം 2015 ലാണ് നിലവില്‍ വന്നത്. ചീഫ് ജസ്റ്റിസ് എസ് മണികുമാര്‍ ഉള്‍പ്പെട്ട ഡിവിഷന്‍ ബെഞ്ചായിരുന്നു വിധി പുറപ്പെടുവിച്ചത്. ഇതോടെ സര്‍ക്കാര്‍ ചെകുത്താനും കടലിനും നടുവിലായി. എന്നാല്‍ സര്‍ക്കാര്‍ സമര്‍ത്ഥമായ മൗനം ഇപ്പോഴും തുടരുകയാണ്.
ന്യൂനപക്ഷങ്ങളുടെ വോട്ടാണ് ഇക്കുറി പിണറായി വിജയന്‍ സര്‍ക്കാരിനെ അധികാരത്തിലെത്തിച്ചത്. അവരെ വെറുപ്പിക്കാന്‍ സര്‍ക്കാര്‍ ഒരുക്കമല്ല. ക്രൈസ്തവ വിഭാഗത്തിലുള്ളവരും സര്‍ക്കാരിന് നല്‍കിയത് കലവറയില്ലാത്ത പിന്തുണയാണ്. ഭൂരിപക്ഷ സമുദായങ്ങളും വന്‍ പിന്തുണയാണ് ഇടതു സര്‍ക്കാരിന് നല്‍കിയത്. അതുകൊണ്ടുതന്നെ ഏതെങ്കിലും ഒരു സമുദായത്തിന് വേണ്ടി മറ്റ് സമുദായങ്ങളെ പിണക്കി കൊണ്ടു മുന്നോട്ടു പോകാന്‍ സര്‍ക്കാരിന് താത്പര്യമില്ലെന്നതാണ് യാഥാര്‍ത്ഥ്യം.
പിണറായിയുടെ അപ്രമാദിത്വം തുടരുന്ന സാഹചര്യത്തില്‍ സി പി എമ്മില്‍ ആരും പിണറായിക്കെതിരെ രംഗത്തുവരില്ല. ആദ്യമായാണ് പിണറായിക്കെതിരെ ഒരു എതിര്‍ ശബ്ദം പാര്‍ട്ടിയില്‍ നിന്നും ഉയരുന്നത്. പക്ഷേ അത് പിണറായി വകവച്ചു കൊടുക്കുമോ എന്ന് കണ്ടറിയാം.
മാത്രവുമല്ല തന്നെ വിമര്‍ശിക്കുന്നവരെ സഹിക്കാനുള്ള മനോഭാവവും പിണറായിക്ക് തീരെയില്ല. വരും ദിവസങ്ങളില്‍ ജയരാജന്റെ പ്രസ്താവന ആളി പടരുമോ എന്ന് കണ്ടറിയാം. ഏതായാലും മുസ്ലീം സംഘടനകളെ സംബന്ധിച്ചടത്തോളം ഇത് വീണുകിട്ടിയ ഒരായുധമായി മാറുകയാണ്.
"https://www.facebook.com/Malayalivartha
