ഫാദേഴ്സ് ഡേയില് അച്ഛനെ നഗ്നനായി മര്ദിക്കുന്ന മക്കള്.. ക്രൂരത മര്ദ്ദനത്തില് മാത്രമല്ല, കൊടും ചതിയും; അമ്മുമ്മയെ ആശുപത്രിയിലേക്ക് കൊണ്ടു പോകുന്നുവെന്ന് പറഞ്ഞ് അഭിഭാഷകന്റെ അടുത്ത് എത്തിച്ച് സ്വത്തുവകകള് എഴുതി വാങ്ങിയ ചെറുമകന്; ഇനി സ്വത്തുകള് തിരികെ അച്ഛന് എഴുതി നല്കേണ്ടി വരമോ? അച്ഛനെ മാത്രമല്ല സ്വന്തം സഹോദരങ്ങളെയും പറ്റിച്ച ഷാനവാസ്
ഫാദേഴ്സ് ഡേ യില് സ്വത്ത് തര്ക്കത്തിന്റെ പേരില് 75 വയസ്സുള്ള അച്ഛനെ നഗ്നനാക്കി മര്ദ്ദിക്കുന്ന മക്കളുടെ വാര്ത്തയാണ് കേരളം കേട്ടത്. വലഞ്ചുഴി തോണ്ടമണ്ണില് റഷീദിനാണ് മര്ദനമേറ്റത്. അയല്വാസികള് മൊബൈലില് പകര്ത്തിയ ദൃശ്യം പ്രചരിച്ചതോടെ മകന് ഷാനവാസ്, ഇയാളുടെ ഭാര്യ ഷീബ എന്നിവരെ പത്തനംതിട്ട പൊലീസ് അറസ്റ്റ് ചെയ്തു. കുറുവടി ഉപയോഗിച്ച് റഷീദിനെ അടിച്ചു വീഴ്ത്തിയ ശേഷമാണ് ക്രൂരമര്ദനം അഴിച്ചു വിട്ടത്. ഷീബ പിടിച്ചു നിര്ത്തുന്നതും ഷാനവാസ് ക്രൂരമായി പിതാവിനെ മര്ദിക്കുന്നതും ദൃശ്യങ്ങളിലുണ്ട്. അറസ്റ്റിലായ ഇവര് പിന്നീട് സ്റ്റേഷന് ജാമ്യം നല്കി വിട്ടു.
സംഭവത്തിന് പിന്നാലെ പുറത്ത് വരുന്നത് അച്ഛനോട് മക്കള് കാട്ടിയ കൊടും ക്രൂരതയുടെയും ചതിയുടെയും കഥയാണ്. റഷീദിനും ഭാര്യ ഫാത്തിമയ്ക്കും മൂന്നു മക്കളാണുള്ളത്. മൂത്തമകന് സുധീര് മലപ്പുറത്തും ഏറ്റവും ഇളയ മകള് ഷീജ അടൂരിലുമാണുള്ളത്. രണ്ടാമത്തെ മകനാണ് ഷാനവാസ്. റഷീദിന്റെ വൃദ്ധമാതാവിന്റെ പേരിലുള്ള സ്ഥലം ഷാനവാസും ഷീബയും ചേര്ന്ന് തന്ത്രപൂര്വം കൈക്കലാക്കുകയായിരുന്നു. 85 വയസുണ്ടായിരുന്ന വൃദ്ധയെ ആശുപത്രിയിലേക്ക് കൊണ്ടു പോകുന്നുവെന്ന് പറഞ്ഞ് അഭിഭാഷകന്റെ അടുത്ത് എത്തിച്ച് സ്വത്തു വകകള് ഷാനവാസിന്റെ പേരിലാക്കി മാറ്റുകയായിരുന്നു.
വൃദ്ധ മരിക്കുന്നതു വരെ ഇവര് ഈ വിവരം പുറത്ത് വിട്ടില്ല. ഏതെങ്കിലും കാരണവശാല് പിതാവ് അറിഞ്ഞാല് സ്വത്ത് തിരികെ നല്കേണ്ടി വരുമെന്നായിരുന്നു ഇത്. വൃദ്ധ മരിച്ച് ഏതാനും നാളുകള് കഴിഞ്ഞപ്പോള് സ്വത്തുക്കള് തന്റെ പേരിലാക്കാന് റഷീദ് വില്ലേജ് ഓഫീസില് ചെന്നപ്പോഴാണ് അത് മകന് വര്ഷങ്ങള്ക്ക് മുന്പ് എഴുതി വാങ്ങിയതെന്ന് അറിയുന്നത്. തകര്ന്ന ഹൃദയത്തോടെ വീട്ടിലെത്തി മകനോട് വിവരം ചോദിച്ചു. ഇതോടെയാണ് മകനും മരുമകളും ചേര്ന്ന് മര്ദനവും അസഭ്യവര്ഷവും ആരംഭിച്ചത്. റഷീദും ഭാര്യ ഫാത്തിമയും വീട്ടില് നിന്ന് ഇറങ്ങണമെന്നായിരുന്നു ആവശ്യം.
സഹികെട്ട ഫാത്തിമ അടൂരില് മകള്ക്കൊപ്പം താമസമാക്കി. ഇതോടെ ഷാനവാസും ഷീജയും പിതാവിനെ കടുത്ത മര്ദനത്തിന് ഇരയാക്കി. പലപ്പോഴും നാട്ടുകാരാണ് തടസം പിടിക്കാന് ചെന്നത്. ഇവര്ക്ക് നേരെയും അസഭ്യ വര്ഷമുണ്ടായി. ഇതിനിടെ റഷീദിനെ പത്തനാപുരം ഗാന്ധിഭവനിലേക്ക് മാറ്റാനും ഷാനവാസ് ശ്രമിച്ചു. നാട്ടുകാര് ഇത് തടഞ്ഞു.
സ്വത്ത് തട്ടിപ്പ് സംബന്ധിച്ച് റഷീദ് ആറുമാസം മുന്പ് അടൂര് ആര്ഡിഓയ്ക്ക് പരാതി നല്കി. ഷാനവാസിനെയും ഭാര്യയെയും വിളിച്ചു വരുത്തിയ ആര്ഡിഓ സ്വത്ത് തിരികെ റഷീദിന് നല്കാന് നിയമം ഉണ്ടെന്ന് ഷാനവാസിനെ അറിയിച്ചുവെന്നും അയല്വാസികള് പറയുന്നു. ആറു മാസം റഷീദിനെ കൂടെതാമസിപ്പിക്കാനും ഷാനവാസിന്റെയും ഷീബയുടെയും ഭാഗത്ത് നിന്ന് മോശം പെരുമാറ്റം ഉണ്ടായാല് സ്വത്ത് കൈമാറ്റം മരവിപ്പിക്കാനും ആര്ഡിഒ നിര്ദ്ദേശിച്ചു. കഴിഞ്ഞ ആറു മാസമായി വലിയ കുഴപ്പം ഇല്ലായിരുന്നു. ആര്ഡിഒ നിര്ദ്ദേശിച്ച കാലാവധി കഴിഞ്ഞതിന് പിന്നാലെയാണ് മര്ദനവും പീഡനവും ആരംഭിച്ചത്.
റഷീദിനെ പള്ളി അധികാരികളും പൊലീസും അയല്വാസികളും ചേര്ന്ന് ഇതേ വീട്ടില് താമസിപ്പിച്ചിരിക്കുകയാണ്. മര്ദനമേറ്റതിനുള്ള ചികില്സയും നല്കി. ശുശ്രൂഷയും ഭക്ഷണവും നല്കുന്നത് അയല്ക്കാരാണ്. ആര്ഡിഓയെ കണ്ട് വിവരം ധരിപ്പിക്കാനും സ്വത്ത് കൈമാറ്റം റദ്ദാക്കാനുമാണ് റഷീദിന്റെ തീരുമാനം. തനിക്ക് അവകാശപ്പെട്ട കുടുംബസ്വത്ത് താനറിയാതെ മകന് തട്ടിയെടുത്തതാണ്. അതുകൊണ്ടു തന്നെ ആ സ്വത്തില് മറ്റു മക്കള്ക്കും അവകാശം ഉണ്ടെന്ന് റഷീദ് വ്യക്തമാക്കുന്നു.
https://www.facebook.com/Malayalivartha
