കെ. സുരേന്ദ്രന്‍ പഴയ സുരയല്ല. 23 ദിവസമാണ് ശബരിമല പ്രക്ഷോഭ കാലത്ത് ജയിലില്‍ കിടന്നത്. അതിന്റെ ഫലമായാണ് സുരേന്ദ്രന്‍ ഇപ്പോള്‍ അധ്യക്ഷനായിരിക്കുന്നത്.

അതേസമയം സുരേന്ദ്രനിന്ന് രാജ്യം ഭരിക്കുന്ന പാര്‍ട്ടിയുടെ സംസ്ഥാന അധ്യക്ഷനാണ്. പാര്‍ട്ടിയെ വെട്ടിലാക്കുന്ന കുഴല്‍പ്പണ കേസില്‍ ചോദ്യം ചെയ്യുകയെന്ന് പറഞ്ഞാല്‍ ദേശീയ ശ്രദ്ധ നേടും. അതിനാല്‍ തന്നെ രംഗത്തെത്തുകയാണ് കേന്ദ്ര മന്ത്രി വി മുരളീധരന്‍.

വിവാദങ്ങളില്‍ നിന്ന് തലയൂരാനാണ് ബി.ജെ.പി സംസ്ഥാന അദ്ധ്യക്ഷന്‍ കെ. സുരേന്ദ്രനെതിരായി നീക്കം നടത്തുന്നതെന്ന് കേന്ദ്രമന്ത്രി വി. മുരളീധരന്‍ പറഞ്ഞു. സി.പി.എം പിന്തുണയോടെ പ്രവര്‍ത്തിക്കുന്ന ഗുണ്ടാസംഘങ്ങള്‍ നടത്തുന്ന കൊള്ളയും പിടിച്ചുപറിയും കണ്ടെത്താന്‍ സുരേന്ദ്രനെ ചോദ്യം ചെയ്യുന്നത് പരിഹാസ്യമാണ്. കൊടകര മുതല്‍ കരിപ്പൂര്‍ വരെ കേരളത്തിലെ എല്ലാ അധോലോക ഇടപാടുകളും കമ്മ്യൂണിസ്റ്റ് പാര്‍ട്ടി പാലൂട്ടി വളര്‍ത്തുന്ന ക്രിമിനല്‍ സംഘങ്ങളാണ് നടത്തുന്നത്. അത് പുറത്തായതിന്റെ ജാള്യത മറയ്ക്കാനാണ് സുരേന്ദ്രനെ കേസിലേക്ക് വലിച്ചിഴയ്ക്കുന്നതെന്നും മുരളീധരന്‍ ഫേസ്ബുക്കില്‍ ആരോപിച്ചു.

ഫേസ്ബുക്ക് പോസ്റ്റ് ഇങ്ങനെ

സ്വര്‍ണക്കടത്തും കൊവിഡ് മരണക്കണക്കിലെ കള്ളക്കളിയുമടക്കം സി.പി.എം അകപ്പെട്ട വിവാദങ്ങളില്‍ നിന്ന് തലയൂരാനാണ് ബി.ജെ.പി സംസ്ഥാന അദ്ധ്യക്ഷന്‍ കെ. സുരേന്ദ്രനെതിരായ നീക്കം. സി.പി.എം പിന്തുണയോടെ പ്രവര്‍ത്തിക്കുന്ന ഗൂണ്ടാസംഘങ്ങള്‍ നടത്തുന്ന കൊള്ളയും പിടിച്ചുപറിയും കണ്ടെത്താന്‍ സുരേന്ദ്രനെ ചോദ്യം ചെയ്യുന്നത് പരിഹാസ്യമാണ്.

കൊടകര മുതല്‍ കരിപ്പൂര്‍ വരെ കേരളത്തിലെ എല്ലാ അധോലോക ഇടപാടുകളും കമ്മ്യൂണിസ്റ്റ് പാര്‍ട്ടി പാലൂട്ടി വളര്‍ത്തുന്ന ക്രിമിനല്‍ സംഘങ്ങളാണ് നടത്തുന്നത്. അത് പുറത്തായതിന്റെ ജാള്യത മറയ്ക്കാനാണ് സുരേന്ദ്രനെ കേസിലേക്ക് വലിച്ചിഴയ്ക്കുന്നത്. കേന്ദ്ര ഏജന്‍സികളെയല്ല സംസ്ഥാന ഏജന്‍സികളെയാണ് ഭരിക്കുന്നവര്‍ രാഷ്ട്രീയ വേട്ടയാടലിന് ഉപയോഗിക്കുന്നതെന്ന് വ്യക്തം. ദേശീയപാതയിലെ പിടിച്ചുപറിയും ബി.ജെ.പിയുമായി എന്ത് ബന്ധമെന്ന് കേരള പൊലീസ് പറയട്ടെ. കള്ളപ്പണമാണ് വിഷയമെങ്കില്‍ അത് അന്വേഷിക്കേണ്ടത് പൊലീസല്ല.

നാടിന്റെ സ്വത്തായ രാജകീയ വൃക്ഷങ്ങള്‍ മുറിച്ചു കടത്തിയവര്‍ ഇപ്പോഴും സ്വൈര്യവിഹാരം നടത്തുന്നത് കേരള പൊലീസിനെ ബാധിക്കുന്നേയില്ല. വനംകൊള്ളക്കാരെ തൊടാന്‍ ധൈര്യമില്ലാത്ത പിണറായിയുടെ പൊലീസ് ബി.ജെ.പിക്കെതിരെ തിരിയുന്നത് രാഷ്ട്രീയ പകപോക്കലിനാണ്. കരിപ്പൂര്‍ സ്വര്‍ണക്കടത്ത് അന്വേഷണം കണ്ണൂരിലെ പാര്‍ട്ടിയാഫീസുകളിലേക്കെത്തുന്നതിന്റെ വെപ്രാളമാണ് ഇപ്പോള്‍ കാണുന്നത്. സര്‍ക്കാരിനെതിരായ വിമര്‍ശനങ്ങളില്‍ നിന്ന് ജനശ്രദ്ധ തിരിക്കാനുള്ള വില കുറഞ്ഞ ഈ തന്ത്രം വിലപ്പോവില്ലെന്ന് സി.പി.എം മനസിലാക്കുന്നത് നന്നാവും.

അതേസമയം കരിപ്പൂര്‍ സ്വര്‍ണക്കടത്ത് അന്വേഷണം സി.പി.എം നേതാക്കളിലേക്ക് നീളുന്നതില്‍ നിന്ന് ശ്രദ്ധ തിരിക്കാനാണ് കൊടകര കേസിന്റെ പേരില്‍ തനിക്ക് പൊലീസ് നോട്ടീസ് നല്‍കിയതെന്ന് ബി.ജെ.പി സംസ്ഥാന പ്രസിഡന്റ് കെ. സുരേന്ദ്രനും ആരോപിച്ചു.

സാക്ഷിമൊഴി രേഖപ്പെടുത്താന്‍ ചൊവ്വാഴ്ച ഹാജരാകാനാണ് നോട്ടീസ്. പറഞ്ഞ ദിവസം ഹാജരാകണമെന്നില്ല. ഇക്കാര്യത്തില്‍ എന്തു ചെയ്യണമെന്ന് ആലോചിച്ച് തീരുമാനിക്കും. ചൊവ്വാഴ്ച പാര്‍ട്ടിയുടെ സംസ്ഥാന ഭാരവാഹി യോഗം വിളിച്ചതാണ്. അതിനു ശേഷമാണ് നോട്ടീസ് വന്നത്. കേസുകള്‍ വരും പോകും. വേണമെങ്കില്‍ അറസ്റ്റ് വാറണ്ടുമായിക്കോട്ടെ. കേസ് കണ്ട് ഒളിച്ചോടുന്നവരല്ല ബി.ജെ.പിക്കാര്‍. കള്ളക്കേസാണെന്ന് അറിഞ്ഞിട്ടും നിയമവാഴ്ച അംഗീകരിക്കുന്നതുകൊണ്ടാണ് സഹകരിക്കുന്നതെന്നും സുരേന്ദ്രന്‍ പറഞ്ഞു.