എസ്ഐയുടെ വീടിനു നേരെ അജ്ഞാത സംഘത്തിന്റെ ആക്രമണം; വീടിന് മുന്നില് നിര്ത്തിയിട്ടിരുന്ന കാറും ബൈക്കും കത്തിച്ചു
തിരുവനന്തപുരത്ത് എസ്ഐയുടെ വീടിനു നേരെ അജ്ഞാത സംഘത്തിന്റെ ആക്രമണം. വീടിന് മുന്നില് നിര്ത്തിയിട്ടിരുന്ന കാറും ബൈക്കും കത്തിച്ചു. കുഴിത്തുറക്കു സമീപം ഇടയ്ക്കോട് ആയിരുന്നു സംഭവം. തമിഴ്നാട് സ്പെഷ്യല് എസ്ഐ സെലിന്കുമാറിന്റെ വീടിനു മുന്നില് നിര്ത്തിയിട്ടിരുന്ന കാറും ബൈക്കും ആണ് അക്രമികള് തീയിട്ട് നശിപ്പിച്ചത്.
കഴിഞ്ഞ ദിവസം പുലര്ച്ചെ ആയിരുന്നു ആക്രമണം. വീടിനു മുന്നില് തീ ആളിപ്പടരുന്നത് അയല്വാസികളാണ് ആദ്യം ശ്രദ്ധിച്ചത്. തുടര്ന്ന് കുഴിത്തുറയില് നിന്നും എത്തിയ ഫയര്ഫോഴ്സിന്റെ സഹായത്തോടെ തീ അണയ്ക്കുകയായിരുന്നു. ബൈക്കും കാറും പൂര്ണമായും കത്തി നശിച്ചു.
സംഭവസമയം വീട്ടില് സെലിന്കുമാറും ഭാര്യയും രണ്ടു മക്കളും ഉണ്ടായിരുന്നു. അരുമന പൊലീസ് നടത്തിയ അന്വേഷണത്തില് ഇരുചക്ര വാഹനത്തിലെത്തിയ രണ്ട് യുവാക്കള് വാഹനങ്ങളില് പെട്രോളൊഴിച്ച് തീ കത്തിച്ചതായി വിവരം ലഭിച്ചു. എന്നാല് അക്രമികള് വീട്ടിലെ നിരീക്ഷണ ക്യാമറ തകര്ത്തിരുന്നു.
ഒരു മാസം മുമ്ബ് വീട്ടിലെ വളര്ത്തു നായയെ വിഷം കലര്ത്തിയ മാംസം നല്കി അജ്ഞാതര് കൊന്നിരുന്നു. കളിയിക്കാവിള ചെക്ക് പോസ്റ്റില് എസ്ഐ വില്സനെ വെടിവെച്ചു കൊലപ്പെടുത്തിയ കേസിന്റെ അന്വേഷണ സംഘത്തിലെ അംഗമായിരുന്നു സെലിന്കുമാര്. കന്യാകുമാരി ജില്ല പൊലീസ് മേധാവി ഭദ്രി നാരായണന്, ഡിവൈഎസ്പി ഗണേശന്, ഫോറന്സിക് വിദഗ്ധര് തുടങ്ങിയവര് സ്ഥലത്തെത്തി തെളിവെടുപ്പ് നടത്തി.
https://www.facebook.com/Malayalivartha
