കല്ലുവാതുക്കലില്‍ പിഞ്ച് കുഞ്ഞിനെ ഉപേക്ഷിച്ച് അത് മരണപ്പെട്ട സംഭവത്തില്‍ ഓരോ ദിവസം കഴിയും തോറും ദുരൂഹത കൂടുകയാണ്. അതിനാല്‍ തന്നെ അതില്‍ വ്യക്തത വരുത്താനാണ് അന്വേഷണ സംഘം ശ്രമിക്കുന്നത്.

രണ്ട് യുവതികളെ ഇത്തിക്കരയാറ്റില്‍ മരിച്ച നിലയില്‍ കണ്ടെത്തിയ കേസില്‍ രഹസ്യ മൊഴി രേഖപ്പെടുത്താന്‍ അന്വേഷണ സംഘം ചീഫ് ജുഡീഷ്യല്‍ മജിസ്‌ട്രേട്ട് കോടതിയില്‍ അപേക്ഷ നല്‍കി. പ്രസവിച്ചയുടന്‍ ഉപേക്ഷിച്ച കുഞ്ഞ് മരിച്ച കേസില്‍ അറസ്റ്റിലായ രേഷ്മയുടെ ഫെയ്‌സ്ബുക് കാമുകനായി നടിച്ചത് ഈ യുവതികളാണെന്നു മൊഴികളുണ്ടായിരുന്നു.

കല്ലുവാതുക്കല്‍ മേവനക്കോണം, തച്ചക്കോട്ട് വീട്ടില്‍ രഞ്ജിത്തിന്റെ ഭാര്യ ആര്യ (23), രേഷ്മ ഭവനില്‍ രാധാകൃഷ്ണ പിള്ളയുടെ മകള്‍ ഗ്രീഷ്്മ (ശ്രുതി22) എന്നിവരാണ് അനന്തു എന്ന പേരില്‍ രേഷ്മയുമായി ഫെയ്‌സ്ബുക് ചാറ്റ് നടത്തിയിരുന്നത്.

ആര്യയുടെ ഭര്‍തൃമാതാവ്, ഗ്രീഷ്മയുടെ സുഹൃത്ത് എന്നിവരുടെ രഹസ്യമൊഴിയാണു രേഖപ്പെടുത്തുക. രേഷ്മയ്ക്ക് മറ്റേതെങ്കിലും ഫെയ്‌സ്ബുക് കാമുകന്മാര്‍ ഉണ്ടോയെന്നു കൂടി പൊലീസ് അന്വേഷിക്കുന്നുണ്ട്. ഇതിന്റെ ഭാഗമായി ഇന്നലെ ഒരാളുടെ മൊഴി കൂടി രേഖപ്പെടുത്തി. ഒരിക്കലും കാണാതിരുന്ന കാമുകന് വേണ്ടി കുഞ്ഞിനെ ഉപേക്ഷിച്ച് പോകുമോന്ന് സംശയമാണ് ബലപ്പെടുന്നത്.

അതേസമയം പ്രസവിച്ചയുടന്‍ കരിയിലക്കുഴിയില്‍ ഉപേക്ഷിച്ച കുഞ്ഞ് മരിച്ച കേസില്‍ അറസ്റ്റിലായ അമ്മ രേഷ്മയെ ചോദ്യം ചെയ്യുന്നതിനു കസ്റ്റഡിയില്‍ ആവശ്യപ്പെട്ട് അന്വേഷണ സംഘം കോടതിയില്‍ അപേക്ഷ നല്‍കി. അറസ്റ്റിലായതിനു പിന്നാലെ രേഷ്മയ്ക്ക് കോവിഡ് സ്ഥിരീകരിച്ചതിനാല്‍ കസ്റ്റഡിയില്‍ വാങ്ങാന്‍ കഴിഞ്ഞിരുന്നില്ല. പൊലീസ് കസ്റ്റഡിയില്‍ ലഭിച്ചില്ലെങ്കില്‍ ജയിലില്‍ വച്ചു ചോദ്യം ചെയ്യും. രേഷ്മയെ അറസ്റ്റ് ചെയ്ത ദിവസം തന്നെ, പ്രസവിച്ച സ്ഥലം, ചോരക്കുഞ്ഞിനെ ഉപേക്ഷിച്ച സ്ഥലം എന്നിവിടങ്ങളില്‍ എത്തിച്ചു തെളിവെടുപ്പു നടത്തിയിരുന്നു.

രേഷ്മയുടെ അജ്ഞാത ഫെയ്‌സ്ബുക് കാമുകനായി നടിച്ചു ഫെയ്‌സ്ബുക് ചാറ്റ് നടത്തിയ 2 യുവതികളെ ഇത്തിക്കരയാറ്റില്‍ മരിച്ച നിലയില്‍ കണ്ടെത്തിയ കേസില്‍ രണ്ടു പേരുടെ രഹസ്യ മൊഴി മജിസ്‌ട്രേട്ടിനു മുന്നില്‍ രേഖപ്പെടുത്തും.

രേഷ്മയുടെ അറസ്റ്റിനു ശേഷം പൊലീസ് ചോദ്യം ചെയ്യാനായി വിളിപ്പിച്ച യുവതികളെ കാണാതാവുകയും പിറ്റേന്ന് ഇരുവരുടെയും മൃതദേഹങ്ങള്‍ ഇത്തിക്കരയാറ്റില്‍ കണ്ടെത്തുകയുമായിരുന്നു. ഇവര്‍ ഇരുവരും ചേര്‍ന്ന് അനന്തു എന്ന പേരില്‍ ഫെയ്‌സ്ബുക് ചാറ്റ് നടത്തി രേഷ്മയെ കബളിപ്പിച്ചിരുന്നു എന്ന വിവരം ആര്യ ഭര്‍തൃ മാതാവിനോടും ഗ്രീഷ്മ സുഹൃത്തിനോടും വെളിപ്പെടുത്തിയിരുന്നു. ഈ സുഹൃത്തിന്റെയും ആര്യയുടെ ഭര്‍ത്താവ് രഞ്ജിത്തിന്റെ മാതാവിന്റെയും രഹസ്യമൊഴിയാണു രേഖപ്പെടുത്തുക.

അനന്തു എന്ന ബാങ്ക് ഉദ്യോഗസ്ഥനായ കാമുകനായി ചമഞ്ഞ് ഒന്നര വര്‍ഷത്തിലേറെ ഇവര്‍ രേഷ്മയുമായി ചാറ്റ് ചെയ്തിരുന്നു. രേഷ്മയുടെ ഭര്‍ത്താവ് കല്ലുവാതുക്കല്‍ ഊഴായ്‌ക്കോട്, പേഴുവിള വീട്ടില്‍ വിഷ്ണുവിന്റെ സഹോദരന്റെ ഭാര്യയാണ് ആര്യ. ഗ്രീഷ്മ സഹോദരിയുടെ മകളും. രേഷ്മയുമായുള്ള ഇരുവരുടെയും ചാറ്റ് വിവരങ്ങള്‍ ഫെയ്‌സ്ബുക് അധികൃതരോട് പൊലീസ് ആവശ്യപ്പെട്ടിട്ടുണ്ട്.

അതേസമയം, അനന്തു എന്ന തന്റെ ഫെയ്‌സ്ബുക് കാമുകന്‍, ബന്ധുക്കളായ യുവതികള്‍ തന്നെയായിരുന്നെന്ന വിവരം റിമാന്‍ഡില്‍ കഴിയുന്ന രേഷ്മ ഇതുവരെ അറിഞ്ഞില്ലെന്നാണു സൂചന. അറസ്റ്റിനു പിന്നാലെ കോവിഡ് പോസിറ്റീവായ രേഷ്മ തിരുവനന്തപുരം അട്ടക്കുളങ്ങര വനിതാ ജയിലില്‍ കോവിഡ് കേന്ദ്രത്തില്‍ നിരീക്ഷണത്തിലാണ്. കര്‍ശന പ്രവേശന നിയന്ത്രണം ഉള്ളതിനാല്‍ രേഷ്മ വിവരം അറിയാനുള്ള സാധ്യത വളരെ കുറവാണെന്നാണ് വിവരം.