മലയാളികള്‍ മറക്കാത്ത സമരമാണ് സെക്രട്ടറിയേറ്റ് നടയിലെ ലാസ്റ്റ് ഗ്രേഡ് സമരം. നിയമനം ലഭിക്കാത്തതില്‍ പ്രതിഷേധിച്ച് നടത്തിയ സമരം വലിയ ജനശ്രദ്ധ നേടി. അന്ന് ഏറെ ശ്രദ്ധിക്കപ്പെട്ട ചിത്രമാണ് സമര നായികയും ലയയും ഡെന്‍സിയും കെട്ടിപ്പിടിച്ച് ആശ്വസിപ്പിക്കുന്ന ചിത്രം. അന്നത്തെ കരച്ചില്‍ ഇപ്പോള്‍ സന്തോഷമാകുകയാണ്.

സമരവേദിയില്‍ പൊട്ടിക്കരഞ്ഞ യുവതിയെത്തേടി ഒടുവില്‍ നിയമന ഉത്തരവെത്തിയിരിക്കുകയാണ്. എരുമപ്പെട്ടി മണ്ടംപറമ്പ് തോപ്പില്‍ ടി.ഡി. ഡെന്‍സിക്കാണ് ലാസ്റ്റ് ഗ്രേഡ് സര്‍വന്റായി നിയമന ഉത്തരവ് ലഭിച്ചത്. സെക്രട്ടേറിയറ്റിന് മുന്നില്‍ നടന്ന റാങ്ക് ഹോള്‍ഡര്‍മാരുടെ സമരത്തിനിടെ കൂട്ടുകാരിയെ കെട്ടിപ്പിടിച്ചു കരഞ്ഞ ടി.ഡി. ഡെന്‍സിയുടെ ദൃശ്യം മാധ്യമങ്ങളിലൂടെ ശ്രദ്ധ നേടിയിരുന്നു. സമരത്തിന് നേതൃത്വം നല്‍കിയ ലയയ്‌ക്കൊപ്പമുള്ള ചിത്രമാണ് ശ്രദ്ധേയമായത്.

റാങ്ക് ലിസ്റ്റില്‍ 497ാം സ്ഥാനത്തുണ്ടായിരുന്ന ഡെന്‍സിക്ക് ചൊവ്വാഴ്ചയാണ് നിയമന ഉത്തരവ് ലഭിച്ചത്. നാലുമാസം ഗര്‍ഭിണിയായതുകൊണ്ട് പ്രത്യേക അപേക്ഷപ്രകാരം ഏറ്റവും അടുത്തുള്ള തലപ്പിള്ളി താലൂക്കിലാണ് നിയമനം ലഭിച്ചത്. അടുത്തുള്ള സ്ഥലത്തേയ്ക്ക് നിയമനം ലഭിക്കുവാന്‍ സമരസമിതിയുടെ സഹായം ലഭിച്ചുവെന്ന് ഡെന്‍സി പറയുന്നു. ചൊവ്വാഴ്ച നിയമന ഉത്തരവ് ലഭിച്ച ഉടന്‍ ഭര്‍ത്താവ് റിതുരാജ് എടുത്ത് സാമൂഹികമാധ്യമത്തില്‍ പോസ്റ്റ് ചെയ്ത ഫോട്ടോയും വൈറലായി.

സമരത്തിന്റെ ഭാഗമായി ചിലര്‍ മണ്ണെണ്ണ ദേഹത്ത് ഒഴിക്കാന്‍ തുടങ്ങിയപ്പോള്‍ ലയ രാജേഷ് അവരെ പിന്‍തിരിപ്പിക്കാന്‍ ശ്രമിച്ചു. പിന്നീട് മാധ്യമങ്ങളോട് സംസാരിച്ചശേഷം മാറിനില്‍ക്കുമ്പോഴാണ് ലയ ചേച്ചിയുടെ അടുത്തെത്തിയത്. ഞങ്ങള്‍ രണ്ടുപേരും വിഷമം സഹിക്കവയ്യാതെയാണ് അന്ന് കെട്ടിപ്പിടിച്ച് പൊട്ടിക്കരഞ്ഞത് ഡെന്‍സി പറയുന്നു.

കഴിഞ്ഞ സര്‍ക്കാരിന്റെ മുഴുവന്‍ ഭരണനേട്ടങ്ങളെയും മാച്ചുകളയുന്നതായിരുന്നു ആ ചിത്രം. റാങ്ക് ലിസ്റ്റില്‍ ഉള്‍പ്പെട്ടിട്ടും ജോലി കിട്ടാത്തതിന്റെ സങ്കടത്തില്‍ കെട്ടിപ്പിടിച്ച് പൊട്ടിക്കരയുന്ന തൃശൂരില്‍ നിന്നുള്ള രണ്ട് കൂട്ടുകാരികള്‍ ലയയും ഡെന്‍സി റീത്തുവും.

പിഎസ് സി റാങ്ക് ലിസ്റ്റ് റദ്ദാക്കരുതെന്നാവശ്യപ്പെട്ട് സെക്രട്ടറേറിയറ്റിനു മുന്നില്‍ സമരം ചെയ്യാനെത്തിയ ലയ സങ്കടം സഹിക്കാനാവാതെ ഒരു നിമിഷം പൊട്ടിക്കരഞ്ഞത്. പക്ഷെ ഇതിനെതിരെ പിന്നീട് അവരുടെ ഫേസ് ബുക്ക് പേജിലും സമൂഹമാധ്യമങ്ങളിലും സൈബര്‍ സഖാക്കളുടെ ആക്രമണമായിരുന്നു.

സാമൂഹികമാധ്യമങ്ങളില്‍ മറഞ്ഞിരുന്ന് ആക്രമിക്കുന്നത് മുഖമില്ലാത്തവരാണ്. എന്നെ ക്രൂരമായി ആക്രമിക്കുന്നവര്‍ സെക്രട്ടേറിയറ്റിന് മുന്നിലേക്ക് വരൂ. എല്ലാ ചോദ്യങ്ങള്‍ക്കും മറുപടി നല്‍കാം എന്നാണ് ലയ പറഞ്ഞത്.

സര്‍ക്കാരിന്റെ പിന്‍വാതില്‍ നിയമനത്തിനെതിരെ സെക്രട്ടേറിയറ്റില്‍ സമരം ചെയ്തുകൊണ്ടിരിക്കുന്നതിനിടയില്‍ നിയമനം കാത്തു കഴിയുന്ന ഡെന്‍സി റീത്തു വന്ന് കെട്ടപ്പിടിച്ചപ്പോള്‍ ലയ നിയന്ത്രണം വിട്ട് കരഞ്ഞു. സമരത്തിനിടയില്‍ ഒപ്പമുണ്ടായിരുന്ന രണ്ട് പേര്‍ മണ്ണെണ്ണയൊഴിച്ച് തീകൊളുത്തി മരിക്കാന്‍ ശ്രമം നടത്തിയപ്പോള്‍ ഇവരുടെ സങ്കടം ഇരട്ടിച്ചു. ഇത് പിറ്റേദിവസം പത്രങ്ങളിലും സമൂഹമാധ്യമങ്ങളിലും സര്‍ക്കാരിന്റെ നേട്ടങ്ങളെ വെല്ലുവിളിക്കുന്ന ചിത്രമായി മാറുകയായിരുന്നു. ഇതോടെയാണ് സൈബര്‍ സഖാക്കളുടെ രോഷം അണപൊട്ടിയത്. പിന്നീടങ്ങളോട്ട് സൈബറിടങ്ങളില്‍ ലയക്കെതിരെ സംഘടിതാക്രമണമായിരുന്നു.

ലയ കരഞ്ഞത് നാടകമാണെന്നും ലയ കോണ്‍ഗ്രസുകാരിയാണെന്നും തുടങ്ങി ഒരുപാട് വിമര്‍ശനങ്ങള്‍. എന്നാല്‍ ഈ സമരത്തിനറങ്ങിയവരില്‍ പാര്‍ട്ടിക്കാരായ ധാരാളം പേരുണ്ടെന്നും അതെന്താണ് സൈബര്‍ സഖാക്കള്‍ തിരിച്ചറിയാത്തതെന്നുമാണ് ലയയുടെ മറുചോദ്യം.