ഇവിടത്തെ നമ്മുടെ വ്യവസായ വകുപ്പ് മന്ത്രി പി. രാജീവ് ചാനലുകളിലൂടെ പ്രസ്ഥാവന നടത്തുമ്പോള്‍ തെലുങ്കാന വ്യവസായ വകുപ്പ് മന്ത്രി വിത്തിന്‍ 24 അവേഴ്‌സിനുള്ളില്‍ കാര്യം നടത്തി. കിറ്റെക്‌സ് സംഘത്തിനായി തെലങ്കാന സര്‍ക്കാര്‍ പ്രത്യേക വിമാനമയച്ചാണ് വരുത്തിച്ചത്. കിറ്റക്‌സ് മാനേജിങ് ഡയറക്ടര്‍ സാബു എം. ജേക്കബുമായി നടത്തിയ ചര്‍ച്ച വിജയകരമെന്ന് തെലങ്കാന വ്യവസായ മന്ത്രി കെ. ടി. രാമ റാവു തന്നെയാണ് അറിയിച്ചത്.

തെലങ്കാന സര്‍ക്കാരിന്റെ പ്രത്യേക്ഷ ക്ഷണം സ്വീകരിച്ചാണ് സാബു ജേക്കബും സംഘവും ഇന്ന് ഹൈദരാബാദിലെത്തിയത്. മന്ത്രി രാമ റാവുവിനൊപ്പം ഉച്ചഭക്ഷണം കഴിച്ച ശേഷമാണ് ചര്‍ച്ചകള്‍ തുടങ്ങിയത്. സംഘം നാളെ മടങ്ങും.

ആയിരം കോടിയുടെ പ്രാരംഭ നിക്ഷേപത്തോടെ കിറ്റെക്‌സ് തെലങ്കാനയില്‍ രംഗപ്രവേശം ചെയ്യുമെന്ന് ട്വിറ്ററിലൂടെ അദ്ദേഹം പ്രഖ്യാപിച്ചു. ലോകത്തെ രണ്ടാമത്തെ ഏറ്റവും വലിയ കുട്ടികള്‍ക്കുള്ള വസ്ത്ര നിര്‍മാതാക്കളായ കിറ്റക്‌സ് ഗ്രൂപ്പിന്റെ പ്രവേശനത്തില്‍ സന്തോഷമുണ്ടെന്ന് അദ്ദേഹം പറഞ്ഞു.

വാറങ്കലിലുള്ള കകതിയ മെഗാ ടെക്‌സ്‌റ്റൈല്‍സ് പാര്‍ക്കില്‍ കിറ്റെക്‌സിന്റെ ഫാക്ടറികള്‍ സ്ഥാപിക്കും. ഉടനടിയുള്ള തീരുമാനത്തില്‍ കിറ്റെക്‌സ് എംഡി സാബു ജേക്കബിനെ അഭിനന്ദിക്കുന്നുവെന്നും തെലങ്കാന വ്യവസായ മന്ത്രി അറിയിച്ചു. ടെക്‌സ്‌റ്റൈല്‍ പ്രോജക്ടിനായി വാറങ്കലില്‍ 1,000 കോടി രൂപ നിക്ഷേപിക്കാനുള്ള കരാര്‍ സ്ഥിരീകരിക്കുന്നതായി കിറ്റെക്‌സ് എംഡി സാബു ജേക്കബ് പ്രസ്താവനയില്‍ വ്യക്തമാക്കി. ഈ നിക്ഷേപം തെലങ്കാനയില്‍ 4000 തൊഴിലവസരങ്ങള്‍ സൃഷ്ടിക്കുമെന്നും അദ്ദേഹം പറഞ്ഞു.

കേരളത്തിലെ പുതിയ നിക്ഷേപ പദ്ധതികളില്‍ നിന്ന് പിന്‍മാറുന്നെന്ന് പ്രഖ്യാപിച്ചതിന് പിന്നാലെയാണ് കിറ്റെക്‌സിന് തെലങ്കാനയില്‍ നിന്ന് ക്ഷണം ലഭിച്ചത്. മറ്റു സംസ്ഥാനങ്ങളും കിറ്റെക്‌സിനെ ക്ഷണിച്ചിരുന്നു.

കേരളത്തില്‍ നടപ്പാക്കാന്‍ നിശ്ചയിച്ചിരുന്ന 3500 കോടി രൂപയുടെ വ്യവസായ പദ്ധതി വിവാദങ്ങളുടെ പശ്ചാത്തലത്തില്‍ തെലങ്കാനയിലേക്കു മാറ്റാന്‍ നീക്കം തുടങ്ങിയതിനു പിന്നാലെ കിറ്റെക്‌സ് ഓഹരി വില കുതിച്ചുയര്‍ന്നു. തെലങ്കാന സര്‍ക്കാരിന്റെ ക്ഷണം സ്വീകരിച്ച് കിറ്റെക്‌സ് സംഘം ഇന്നലെ ഹൈദരാബാദില്‍ എത്തിയ ദിവസം ഉണ്ടായ ഈ നേട്ടം കമ്പനി നിലപാടിനുള്ള ബിസിനസ് കമ്മ്യൂണിറ്റിയുടെ പിന്തുണയുടെ സൂചനയായി.

ഓഹരി മൂല്യം കൂടിയത് തങ്ങളുടെ നിലപാടുമായി മുന്നോട്ടുപോകാന്‍ കമ്പനിക്ക് ധൈര്യം പകരുകയും ചെയ്തു. അതേസമയം, കേരളം നിക്ഷേപ സൗഹൃദമാണെന്ന വാദം വ്യവസായ വകുപ്പ് ആവര്‍ത്തിച്ചു. ഇക്കാര്യങ്ങള്‍ അധികൃതര്‍ വിശദീകരിക്കുകയും ചെയ്തു. ആക്ഷേപങ്ങള്‍ക്ക് ഇടവരുത്തുംവിധം ഓരോ വകുപ്പും അടിക്കടി കയറിയിറങ്ങി പരിശോധന നടത്തുന്ന രീതി ഉപേക്ഷിക്കാനും തീരുമാനിച്ചു.

തുടര്‍ച്ചയായി രണ്ടാംദിവസവും ഓഹരി സൂചിക നഷ്ടത്തില്‍ ക്ലോസ് ചെയ്തപ്പോഴാണ് കിറ്റെക്‌സിന്റെ മിന്നും പ്രകടനം. ഒറ്റ ദിവസംകൊണ്ട് 19.72 ശതമാനത്തിന്റെ (23.15 രൂപ) വര്‍ദ്ധന. 117.4 രൂപയില്‍ വ്യാപാരം തുടങ്ങിയ കിറ്റെക്‌സ് ഓഹരി വില 140.55 രൂപയിലേക്ക് ഉയര്‍ന്നു. ഒരുവേള മൂല്യം 140.85 രൂപവരെ ഉയര്‍ന്നിരുന്നു.വിവിധ സര്‍ക്കാര്‍ വകുപ്പുകളില്‍ നിന്ന് നേരിട്ട പരിശോധനാ പീഡനം കഴിഞ്ഞമാസം കിറ്റെക്‌സിന്റെ ഓഹരി മൂല്യം ഇടിച്ചിരുന്നു. ജൂണില്‍ ശരാശരി 130 രൂപയ്ക്കുമേല്‍ ഉണ്ടായിരുന്ന വില, ഈമാസം ആദ്യവാരം 108 രൂപ വരെ താഴ്ന്നു. ഈ വര്‍ഷം ജനുവരി ഒന്നിന് 110-111 രൂപയായിരുന്നു ഓഹരിവില. ഏപ്രിലില്‍ ഇത് 9394 രൂപയിലെത്തിയിരുന്നു.

അതേസമയം കേരളത്തില്‍ ഉപേക്ഷിച്ച 3,500 കോടിയുടെ അപ്പാരല്‍ പാര്‍ക്ക് ഉള്‍പ്പെടെ പദ്ധതികള്‍ തെലങ്കാനയില്‍ നടപ്പാക്കും. കിറ്റെക്‌സ് ചെയര്‍മാന്‍ സാബു എം. ജേക്കബും തെലങ്കാന വ്യവസായമന്ത്രി കെ.ടി. രാമറാവുവുമായി ഇന്നലെ നടത്തിയ ചര്‍ച്ചയിലാണ് തീരുമാനമായത്.