സാധാരണ എപ്പോഴും വലിയ പാര്‍ട്ടികളാണ് മുന്നണിക്ക് തലവേദനയാകുന്നത്. ഇത്തവണ സിപിഎമ്മിന് വലിയ ഭൂരിപക്ഷം ഉണ്ടായിട്ടും എല്ലാ മുന്നണികള്‍ക്കും അവസരം നല്‍കാനാണ് തീരുമാനിച്ചത്. അങ്ങനേയാണ് ഐഎന്‍എല്ലിന് മന്ത്രി സ്ഥാനം ലഭിച്ചത്. എന്നാല്‍ അവര്‍ അടിച്ച് പിരിയുന്ന കാഴ്ചയാണ് കണ്ടത്. ഇതോടെ പൊട്ടിച്ചിരിക്കുന്നത് മുസ്ലീം ലീഗും കുഞ്ഞാലിക്കുട്ടിയുമായിരിക്കും.

ഘടകകക്ഷി അംഗത്വവും മന്ത്രിസ്ഥാനവും നല്‍കിയതിന് പിന്നാലെ ഐഎന്‍എല്ലില്‍ ഉണ്ടായ പിളര്‍പ്പില്‍ സിപിഎമ്മിനു കടുത്ത രോഷമാണ്. ഏതു വിഭാഗത്തെ തള്ളണം, കൊള്ളണം എന്നത് അവര്‍ ആലോചിച്ചിട്ടില്ല. രണ്ടു കൂട്ടരും ഒരുമിച്ചു പോകണമെന്നാണു പാര്‍ട്ടി ആവശ്യപ്പെടുന്നത്.

പാര്‍ട്ടികള്‍ പിളര്‍ന്നാല്‍ രണ്ടു കൂട്ടരെയും തല്‍ക്കാലത്തേക്കെങ്കിലും മുന്നണിയില്‍ നിന്നു പുറത്തു നിര്‍ത്തുന്ന രീതി സിപിഎം പിന്തുടരാറുണ്ട്. പിന്നീട് ഔദ്യോഗിക വിഭാഗം എന്ന വിശേഷണം ആര്‍ജിക്കുന്നവരെ മുന്നണിയിലേക്കു പരിഗണിച്ചാലായി. കേരള കോണ്‍ഗ്രസിലെ പി.സി.തോമസ് വിഭാഗം പിളര്‍ന്നപ്പോള്‍ ഒരു വിഭാഗത്തെ മുന്നണി യോഗത്തില്‍ നിന്ന് ഇറക്കിവിട്ട ചരിത്രവുമുണ്ട്.

ഐഎന്‍എല്ലിന്റെ കാര്യത്തില്‍ രണ്ടു വിഭാഗങ്ങളെയും എല്‍ഡിഎഫില്‍ എടുക്കാന്‍ ഒരു സാധ്യതയുമില്ല. പാര്‍ട്ടിയുടെ ഏക എംഎല്‍എയും മന്ത്രിയുമായ അഹമ്മദ് ദേവര്‍കോവില്‍, കാസിം ഇരിക്കൂര്‍ വിഭാഗത്തിനൊപ്പം നില്‍ക്കുന്ന സാഹചര്യത്തില്‍ ആ വിഭാഗത്തിനു മേല്‍ക്കൈ ലഭിച്ചേക്കാം. കേന്ദ്ര നേതൃത്വത്തിന്റെ പിന്തുണയും ഇവര്‍ക്കാണെന്ന സൂചനയുണ്ട്. പക്ഷേ, പാര്‍ട്ടി ഭാരവാഹികളും ജില്ലാ ഘടകങ്ങളും പ്രവര്‍ത്തകരും എല്ലാം തങ്ങള്‍ക്കൊപ്പം എന്നാണു രണ്ടു വിഭാഗങ്ങളും അവകാശപ്പെടുന്നത്. മലബാര്‍ മേഖലയിലെ ജില്ലാ ഘടകങ്ങളോടും നേതാക്കളോടും സിപിഎം അഭിപ്രായം തേടിയേക്കും.

ന്യൂനപക്ഷ വിഭാഗത്തെ പ്രതിനിധീകരിക്കുന്ന പാര്‍ട്ടിയും അവരുടെ മന്ത്രിയും എന്ന നിലയില്‍ മന്ത്രിസഭയില്‍ നിന്നു തിരക്കിട്ട് ഒഴിവാക്കാന്‍ സാധ്യത കുറവാണ്. എന്നാല്‍ മന്ത്രിയെ അനുകൂലിക്കുന്നവര്‍ പാര്‍ട്ടിയില്‍ ദുര്‍ബലരാണ് എന്നു തെളിയിക്കപ്പെട്ടാല്‍ കടുത്ത തീരുമാനം എല്‍ഡിഎഫിന് എടുക്കേണ്ടിയും വരും.

ഘടകകക്ഷി അംഗത്വവും മന്ത്രിപദവും കൊടുത്തപ്പോള്‍ സിപിഎം നേതൃത്വത്തിനു കൊടുത്ത വാക്ക് ഐഎന്‍എല്‍ തെറ്റിച്ചു. മുസ്‌ലിംലീഗിന്റെ കോട്ടകളില്‍ വിള്ളല്‍ വീഴ്ത്താനും ലീഗിലെ കൂടുതല്‍ പേരെ ഇടതു പാളയത്തിലേക്ക് എത്തിക്കാനും എല്ലാ ശ്രമവും നടത്തുമെന്നായിരുന്നു അവര്‍ നല്‍കിയ ഉറപ്പ്. രണ്ടര വര്‍ഷത്തേക്ക് ആണെങ്കിലും മന്ത്രിസ്ഥാനം ലഭിച്ചതോടെ ഐഎന്‍എല്ലില്‍ ചേരുന്നവരുടെ എണ്ണം കൂടുകയും ചെയ്തിരുന്നു. അതിനിടയിലാണു പാര്‍ട്ടിയിലെ ആഭ്യന്തര തര്‍ക്കം എല്ലാ സീമകളും ലംഘിച്ചത്.



തര്‍ക്കം രൂപപ്പെട്ടപ്പോള്‍ ഇരുവിഭാഗങ്ങളെയും എകെജി സെന്ററിലേക്കു സിപിഎം വിളിച്ചു വരുത്തിയിരുന്നു. മുന്നണിയുടെ പ്രതിഛായ കളയാതെ ഐക്യത്തോടെയും അച്ചടക്കത്തോടെയും പോകണമെന്ന താക്കീതു നല്‍കി വിട്ടയച്ചു. തുടര്‍ന്നു യോജിച്ച് മാധ്യമപ്രവര്‍ത്തകരെ കണ്ട ഇരു വിഭാഗം നേതാക്കളും പാര്‍ട്ടിയില്‍ പ്രശ്‌നങ്ങളൊന്നുമില്ല എന്നാണ് അവകാശപ്പെട്ടത്.

സ്‌കറിയാ തോമസിന്റെ നിര്യാണത്തെ തുടര്‍ന്ന് എല്‍ഡിഎഫില്‍ ഘടകകക്ഷിയായ ആ കേരള കോണ്‍ഗ്രസ് വിഭാഗവും പിളര്‍ന്നിരുന്നു. മറു കൂട്ടരെ മുന്നണിയില്‍ നിന്ന് ഒഴിവാക്കണമെന്ന് ആവശ്യപ്പെട്ട് ഇരു വിഭാഗങ്ങളും എല്‍ഡിഎഫിനു കത്തു നല്‍കിയിരിക്കുകയാണ്. അതിനു പിന്നാലെയാണ് ഐഎന്‍എല്ലിലെ പൊട്ടിത്തെറി. കൂടുതല്‍ പ്രശ്‌നങ്ങളുണ്ടായാല്‍ മന്ത്രി അഹമ്മദ് ദേവര്‍കോവിന്റെ മന്ത്രിസ്ഥാനം തെറിക്കും.