ശില്‍പ ഷെട്ടിയുടെ ഭര്‍ത്താവായ രാജ് കുന്ദെയുടെ ദുരൂഹത നിറഞ്ഞ ജീവിതത്തിലെ പല കാര്യങ്ങളാണ് പുറത്താകുന്നത്. കുന്ദ്ര പുതുതായി മറ്റൊരു മൊബൈല്‍ ആപ് പുറത്തിറക്കാന്‍ ആലോചിച്ചിരുന്നെന്ന വെളിപ്പെടുത്തലുമായി നടി ഗഹന വസിഷ്ട് രംഗത്തെത്തിയതോടെ പല കാര്യങ്ങളും പുറത്താകുകയാണ്.

ശില്‍പയുടെ സഹോദരിയും മറ്റൊരു ബോളിവുഡ് താരവുമായ സമിത ഷെട്ടിയെ ആപ്പില്‍ പ്രത്യക്ഷപ്പെടുത്തുന്ന കാര്യം കുന്ദ്ര ഗൗരവമായി ആലോചിച്ചിരുന്നു എന്നാണു ഗഹനയുടെ വെളിപ്പെടുത്തല്‍. അതേസമയം ഇറോട്ടിക് വിഭാഗത്തില്‍പ്പെടുന്ന 121 വിഡിയോകളുടെ വില്‍പനയിലൂടെ 9 കോടി രൂപ ലഭിക്കുന്ന രാജ്യാന്തര ഡീല്‍ ഉറപ്പിക്കുന്നതിനു തൊട്ടുമുന്‍പാണു കുന്ദ്ര അറസ്റ്റിലായതെന്നും അന്വേഷണ ഉദ്യോഗസ്ഥര്‍ വെളിപ്പെടുത്തി.

അറസ്റ്റിനു കുറച്ചു ദിവസം മുന്‍പ് കുന്ദ്രയുടെ ഓഫിസില്‍ പോയപ്പോള്‍ കണ്ട കാര്യങ്ങളാണ് ഗഗന വെളിപ്പെടുത്തിയത്. അപ്പോഴാണു ബോളിഫെയിം എന്ന പുതിയ ആപ് പുറത്തിറക്കാന്‍ കുന്ദ്ര ആലോചിച്ചിരുന്നതായി മനസ്സിലാക്കുന്നത്. ചാറ്റ് ഷോകള്‍, മ്യൂസിക് ഷോകള്‍, വിഡിയോകള്‍, ഫീച്ചര്‍ ഫിലിമുകള്‍ എന്നിവയാണു ആപ്പില്‍ ഉള്‍ക്കൊള്ളിക്കാന്‍ നിശ്ചയിച്ചിരുന്നത്. എന്നാല്‍ ഈ ചിത്രങ്ങളില്‍ നിര്‍ഭയ സീനുകള്‍ ഉള്‍ക്കൊള്ളിക്കുന്ന കാര്യം ആലോചനയില്‍ ഇല്ലായിരുന്നു എന്നും ഗഹന പറഞ്ഞു.

ഒരു ചിത്രം ഞാന്‍ സംവിധാനം ചെയ്യാനാണു നിശ്ചയിച്ചിരുന്നത്. തിരക്കഥ സംബന്ധിച്ച ചര്‍ച്ചകള്‍ ഞങ്ങള്‍ നടത്തി. ഒരു സിനിമയില്‍ സമിത ഷെട്ടിയെ അഭിനയിപ്പിക്കുന്ന കാര്യം ആലോചനയില്‍ ഉണ്ടായിരുന്നു. സായ് തംഹാങ്കര്‍, മറ്റു രണ്ട് ആര്‍ട്ടിസ്റ്റുകള്‍ എന്നിവരെ മറ്റൊരു സിനിമയിലേക്കും പരിഗണിച്ചിരുന്നു എന്നും ഗഹന വ്യക്തമാക്കി.

കുന്ദ്ര അറസ്റ്റിലായതിനു പിന്നാലെ ഗഹന പുറത്തിറക്കിയ പത്രക്കുറിപ്പില്‍ പറയുന്നത് ഇങ്ങനെയാണ്. നിയമത്തിന് അതിന്റേതായ സമയം എടുക്കും. മുംബൈ പൊലീസില്‍ പൂര്‍ണ വിശ്വാസമുണ്ട്. പക്ഷേ, നിര്‍ഭയ സീനുകളെ അശ്ലീല ദൃശ്യങ്ങളായി വ്യാഖ്യാനിക്കരുത്. യഥാര്‍ഥ കുറ്റക്കാര്‍ ആരാണെന്നും കുറ്റാരോപിതരെ ആരൊക്കെയാണ് ഉപയോഗിച്ചിരുന്നതെന്നും കോടതി തീരുമാനിക്കും,. തല്‍ക്കാലം കൂടുതല്‍ പ്രതികരണത്തിനില്ല.

വെബ്‌സൈറ്റില്‍ അശ്ലീല വിഡിയോ അപ്‌ലോഡ് ചെയ്ത കുറ്റത്തിനു കഴിഞ്ഞ വര്‍ഷം ഗഹനയെയും ക്രൈംബ്രാഞ്ച് അറസ്റ്റ് ചെയ്തിരുന്നു. അശ്ലീല ദൃശ്യങ്ങള്‍ നിര്‍മിച്ചു മൊബൈല്‍ ആപ്ലിക്കേഷനുകളിലൂടെ പ്രചരിപ്പിച്ചതാണു കുന്ദ്രയ്‌ക്കെതിരായ കുറ്റം. കുന്ദ്രയെ കൂടുതല്‍ ദിവസങ്ങള്‍ കസ്റ്റഡിയില്‍ ലഭിക്കണമെന്നു പൊലീസ് കോടതിയില്‍ ആവശ്യപ്പെട്ടേക്കും.

കുന്ദ്രയുടെ അറസ്റ്റിനു ശേഷവും അശ്ലീല ചിത്രങ്ങള്‍ നിര്‍മിക്കാന്‍ കുന്ദ്രയുടെ ഉടമസ്ഥതയിലുള്ള ജെഎല്‍ സ്ട്രീം കമ്പനി ആലോചിച്ചിരുന്നതായി പൊലീസ് വെളിപ്പെടുത്തി. കുന്ദ്രയുടെ കബോര്‍ഡിനുള്ളില്‍ ഒളിപ്പിച്ച നിലയില്‍ പുതിയ തിരക്കഥകള്‍ കണ്ടെത്തി. ഹിന്ദി ഭാഷയില്‍ തയാറാക്കിയ തിരക്കഥകളാണിത്. ഇതോടെയാണു കുന്ദ്രയുടെ അസാന്നിധ്യത്തിലും അശ്ലീല ചിത്രങ്ങള്‍ നിര്‍മിക്കാന്‍ കമ്പനി നിശ്ചയിച്ചിരുന്നോ എന്ന സാധ്യത പൊലീസ് പരിശോധിക്കുന്നത്.

അശ്ലീല ചിത്ര നിര്‍മാണ കേസില്‍ മുംബൈ പൊലീസിന്റെ നിരീക്ഷണത്തിലുള്ള ഇതേ കമ്പനിയുടെ പ്രചാരണത്തിനായി നാലു മാസം മുന്‍പു ശില്‍പ ഷെട്ടിതന്നെ മുന്നിട്ടിറങ്ങിയിരുന്നു. ഇതേ കമ്പനിയില്‍ 2020 സെപ്റ്റംബര്‍ വരെ ശില്‍പയുടെ അമ്മ സുനന്ദ ഷെട്ടി ഡയറക്ടറായിരുന്നതായും വിവിധ മാധ്യമങ്ങള്‍ റിപ്പോര്‍ട്ട് ചെയ്തു.

വിയാന്‍ ഇന്‍ഡസ്ട്രീസിലെ ഉദ്യോഗസ്ഥനാണു കുന്ദ്രയുടെ ഓഫിസില്‍ സൂക്ഷിച്ചിട്ടുള്ള 'നിഗൂഢ കബോര്‍ഡിനെ'ക്കുറിച്ചു ക്രൈം ബ്രാഞ്ചിനു വിവരം നല്‍കിയത്. തുടര്‍ന്നു നടത്തിയ പരിശോധനയിലാണു ഓഫിസില്‍ ഒളിപ്പിച്ച കബോര്‍ഡ് പൊലീസ് കണ്ടെത്തിയതും തിരക്കഥകള്‍ പിടിച്ചെടുത്തതും.

തിരക്കഥകള്‍ക്കു പുറമെ ക്രിപ്‌റ്റോ കറന്‍സി ഉപയോഗിച്ചു നടത്തിയ കമ്പനിയുടെ സാമ്പത്തിക ഇടപാടുകളുടെ രേഖകളും പിടിച്ചെടുത്തു. ഭിത്തിക്കുള്ളില്‍ നിര്‍മിച്ച രഹസ്യ അറയിലാണു കബോര്‍ഡ് ഒളിപ്പിച്ചിരുന്നത്. പുറത്തുനിന്നു നോക്കിയാല്‍ യാതൊരു സൂചനകളും ലഭിക്കാത്ത രീതിയിലായിരുന്നു നിര്‍മാണം.