കോവിഡ്19 നിയന്ത്രണങ്ങള്‍ കാരണം പലര്‍ക്കും ജോലിക്ക് പോകാനാകാതെ വളരെയധികം ബുദ്ധിമുട്ടുകള്‍ നേരിടുന്നുണ്ട്. രാജ്യത്തെ മിക്ക യുവാക്കളും ജോലിക്ക് പോകാനാകാതെ വലിയ പ്രശ്‌നങ്ങളും അഭിമുഖീകരിക്കുന്നുണ്ട്.

പക്ഷേ ചിലരെങ്കിലും ഈ സമയത്ത് വീട്ടിലിരുന്ന് പണം സമ്പാദിക്കാനുള്ള നൂതന മാര്‍ഗങ്ങള്‍ കണ്ടെത്തി.ഈ ലോക്‌ഡോണ്‍ കാലത്ത് യൂട്യൂബേര്‍സിന്റെ എണ്ണത്തില്‍ വളരെയധികം വര്‍ധനവുണ്ടായി. അവരു ടെ വരുമാനവും ഇരട്ടിച്ചു. ഇത്തരത്തില്‍ ഒരു യൂട്യൂബറെയാണ് ഞായറാഴ്ച നടന്ന 79ാമത് 'മന്‍ കി ബാത്ത്' പരിപാടിയില്‍ പ്രധാനമന്ത്രി നരേന്ദ്ര മോദി പ്രശംസിച്ചത്. ദിവസ വേതനത്തിന് ജോലി ചെയ്തിരുന്ന ഐസക് മുണ്ട എന്ന യുവാവാണ് കഴിഞ്ഞ ഒന്നര വര്‍ഷം കൊണ്ട് യൂട്യൂബിലൂടെ താരമായി മാറിയത് .

ഒഡീഷയിലെ സംബാല്‍പൂര്‍ ജില്ലയിലെ ബാബുപാലി ഗ്രാമത്തില്‍ നിന്നുള്ള ദിവസ വേതന തൊഴിലാളിയാണ് മുണ്ട (35). കേവലം മൂവായിരം രൂപ വായ്പയെടുത്ത് സ്മാര്‍ട് ഫോണ്‍ വാങ്ങി യൂട്യൂബ് ചാനല്‍ തുടങ്ങിയ മുണ്ട ഇന്ന് ഓണ്‍ലൈനിലെ താരമാണ്. ഓരോ മാസവും യൂട്യൂബില്‍ നിന്ന് ലക്ഷങ്ങളാണ് സമ്പാദിക്കുന്നത്.

ഐസക് മുണ്ടയെക്കുറിച്ചു മോദി പറഞ്ഞതിങ്ങനെ: ഐസക് ജി ഒരിക്കല്‍ ദിവസ വേതനത്തിന് ജോലി ചെയ്തിരുന്നു, എന്നാല്‍ ഇപ്പോള്‍ അദ്ദേഹം ഇന്റര്‍നെറ്റിലെ താരമായി മാറിയിരിക്കുന്നു. മുണ്ട തന്റെ യൂട്യൂബ് ചാനലിലൂടെ ധാരാളം സമ്പാദിക്കുന്നുണ്ട്. തന്റെ വിഡിയോകളിലൂടെ അദ്ദേഹം പ്രാദേശിക വിഭവങ്ങള്‍, പരമ്പരാഗത പാചക രീതികള്‍, ഗ്രാമം, ജീവിതശൈലി, കുടുംബം, ഭക്ഷണ ശീലങ്ങള്‍ എല്ലാം പരിയപ്പെടുത്തുന്നു.

2020 മാര്‍ച്ചില്‍ ഒഡീഷയിലെ പ്രശസ്തമായ പ്രാദേശിക വിഭവമായ പഖാലുമായി ബന്ധപ്പെട്ട ഒരു വിഡിയോയാണ് ആദ്യമായി പോസ്റ്റ് ചെയ്തത്. അന്നാണ് യൂട്യൂബര്‍ എന്ന നിലയില്‍ മുണ്ടയുടെ യാത്ര തുടങ്ങിയത് . അതിനുശേഷം അദ്ദേഹം നൂറുകണക്കിന് വിഡിയോകള്‍ പോസ്റ്റ് ചെയ്തുവെന്നും മോദി ചൂണ്ടിക്കാട്ടി .

അദ്ദേഹത്തിന്റെ ഈ ശ്രമം പല കാരണങ്ങളാല്‍ വ്യത്യസ്തമാണ്. പ്രത്യേകിച്ചും ഇതിലൂടെ നഗരങ്ങളില്‍ താമസിക്കുന്നവര്‍ക്ക് കൂടുതല്‍ അറിയാത്ത ജീവിതശൈലി കാണാനുള്ള അവസരം കിട്ടുന്നു . സംസ്‌കാരവും പാചകരീതിയും തുല്യമായി സമന്വയിപ്പിച്ച് നമ്മെയും പ്രചോദിപ്പിച്ചുകൊണ്ട് ഐസക് മുണ്ട ജി ആഘോഷിക്കുന്നുവെന്നും പ്രധാനമന്ത്രി പറഞ്ഞു.



മുണ്ട തന്റെ ആദ്യത്തെ സ്മാര്‍ട് ഫോണ്‍ വാങ്ങുന്നത് മൂവായിരം രൂപ കടം വാങ്ങിയാണ്. ഐസക്കിന്റെ യൂട്യൂബ് ചാനലായ 'ഐസക് മുണ്ട ഈറ്റിങ്' 7.77 ലക്ഷത്തിലധികം പേരാണ് സ്ബ്‌സെ്രെകബ് ചെയ്തിരിക്കുന്നത്. ആവശ്യത്തിന് കറിയില്ലാതെ ഒരു പാത്രം നിറയെ ചോറ് എങ്ങനെ അതിവേഗം കഴിക്കാമെന്നത് കാണിച്ച് തരുന്ന വിഡിയോ ഹിറ്റായിരുന്നു.

2020 മാര്‍ച്ച് മുതല്‍ ഇതുവരെ മുണ്ട 257 വിഡിയോകള്‍ അപ്‌ലോഡ് ചെയ്തിട്ടുണ്ട്.പ്രധാനമന്ത്രി അദ്ദേഹത്തിന്റെ വിജയഗാഥ നമ്മോട് പറയുമ്പോള്‍ ഏവര്‍ക്കും ഒരു പ്രചോദനം ആയി മാറുകയാണ്. ഇത്തരത്തില്‍ സ്വയം രീതികള്‍ കണ്ടുപിടിച്ച് വരുമാനമാര്‍ഗം കണ്ടെത്തുന്നത് വളരെ അധികം നല്ല കാര്യമാണ്. ഇത്തരത്തിലുള്ള വിജയകഥ പ്രധാനമന്ത്രിയുടെ വായില്‍നിന്നും കേള്‍ക്കുമ്പോള്‍ അത് ആ വ്യക്തിയെ സംബന്ധിച്ച് വളരെയധികം അഭിമാനകരമായ കാര്യം തന്നെയാണ്.