സര്‍ക്കാര്‍ ജീവനക്കാര്‍ക്കും അദ്ധ്യാപകര്‍ക്കും ലീവ് സറണ്ടര്‍ ആനുകൂല്യം നല്‍കുന്നത് ജൂണ്‍ ഒന്നു മുതല്‍ ആറു മാസത്തേക്കു കൂടി നീട്ടി സര്‍ക്കാര്‍ ഉത്തരവിറക്കി. കൊവിഡ് മൂലം 2021 മേയ് 31വരെ ലീവ് സറണ്ടര്‍ അനുവദിക്കുന്നത് നിറുത്തി വച്ചിരുന്നു.

കൊവിഡ് വ്യാപനം കുറയാത്തത് കണക്കിലെടുത്താണ് നീട്ടിയത്. മേയ് 31ന് ശേഷം ഇന്നലെ വരെ ആര്‍ക്കെങ്കിലും ലീവ് സറണ്ടര്‍ അനുവദിക്കുകയോ, ആരെങ്കിലും അപേക്ഷ നല്‍കുകയോ ചെയ്തിട്ടുണ്ടെങ്കില്‍ അതെല്ലാം റദ്ദാക്കിയിട്ടുണ്ട്.


സര്‍വകലാശാലകള്‍, എയ്ഡഡ് സ്ഥാപനങ്ങള്‍, സ്വയംഭരണ സ്ഥാപനങ്ങള്‍, ബോര്‍ഡുകള്‍, പൊതുമേഖലാ സ്ഥാപനങ്ങള്‍,അപ്പക്‌സ് സൊസൈറ്റികള്‍, മറ്റ് സര്‍ക്കാര്‍ സ്ഥാപനങ്ങള്‍ എന്നിവിടങ്ങളിലെ ജീവനക്കാര്‍ക്കും ഇത് ബാധകമാണ്.

അതേ സമയം ലാസ്റ്റ് ഗ്രേഡ് ജീവനക്കാര്‍, സര്‍ക്കാര്‍ സ്ഥാപനങ്ങളിലെ പാര്‍ട്ട് ടൈം താത്കാലിക ജീവനക്കാര്‍, മുനിസിപ്പാലിറ്റികളിലെ താത്കാലിക ജീവനക്കാര്‍ എന്നിവരെ ഇതില്‍ നിന്ന് ഒഴിവാക്കി. ഏണ്‍ഡ് ലീവുകള്‍ ജീവനക്കാരുടെ ലീവ് അക്കൗണ്ടിലേക്ക് ക്രെഡിറ്റ് ചെയ്യും.

ഓരോ സാമ്പത്തിക വര്‍ഷവും ഏപ്രില്‍ മാസത്തിലാണ് ലീവ് അക്കൗണ്ടിലെ ലീവ് സറണ്ടര്‍ ചെയ്ത് പണമായി നല്‍കിയിരുന്നത്. 201920ലെ ലീവാണ് അവസാനമായി സറണ്ടര്‍ ചെയ്ത് പണമായി നല്‍കിയത്. കൊവിഡ് മൂലം 2020 21ലെ ലീവ് സറണ്ടര്‍ ആനുകൂല്യം ഡിസംബര്‍ വരെ നീട്ടി വയ്ക്കുകയും പിന്നീട് നവംബറില്‍ പുതിയ ഉത്തരവിലൂടെ പണമായി നല്‍കാതെ പി.എഫ് അക്കൗണ്ടിലേക്ക് മാറ്റാന്‍ തീരുമാനിക്കുകയുമായിരുന്നു.

ഇത് 2021 ജൂണ്‍ മാസത്തില്‍ പിന്‍വലിക്കാന്‍ അനുവദിക്കുമെന്ന് പറഞ്ഞിരുന്നു. പിന്നാലെ ,കൊവിഡ് രണ്ടാം തരംഗത്തിന്റെ പേരില്‍ 2021 22ലെ ലീവ് സറണ്ടര്‍ ആനുകൂല്യം നല്‍കുന്നത് മേയ് 31 വരെ നിറുത്തി വച്ചിരുന്നു .