മുകേഷിനെതിരെ ഗാര്‍ഹിക പീഡനത്തിന് കേസ് എടുക്കാന്‍ സംസ്ഥാന പോലീസ് വകുപ്പും സ്വമേധയാ കേസ് എടുക്കാന്‍ വനിതാ കമ്മിഷനും തയ്യാറാകണമെന്നാണ് കോണ്‍ഗ്രസ് നേതാവ് ബിന്ദു കൃഷ്ണ കഴിഞ്ഞ ദിവസം പറഞ്ഞത്.

മുകേഷിന്റെ സ്ത്രീകളോടുള്ള ശൈലി അദ്ദേഹത്തിന്റെ മുന്‍ഭാര്യ സരിത തന്നെ പല പ്രാവശ്യം പരസ്യമായി പറഞ്ഞിട്ടുള്ളതാണെന്നും അപ്പോഴെല്ലാം മുകേഷിന് സംരക്ഷണ കവചം ഒരുക്കി വെള്ളപൂശിയത് ഇടതുപക്ഷമാണെന്നും ബിന്ദു കൃഷ്ണ ആരോപിച്ചു. ബിന്ദുകൃഷ്ണയുടെ ചുവട് പിടിച്ച് പലരും മുകേഷിനെതിരെ രംഗത്തെത്തി. എന്നാല്‍ വളരെ പക്വതയോടെയാണ് മേതില്‍ ദേവിക സംസാരിച്ചത്.

ഈ വേര്‍പിരിയല്‍ വേദനാജനകമാണെന്നും മുകേഷിനെ കുറ്റപ്പെടുത്താനില്ലെന്നും ഇന്നലെ പാലക്കാട് പുത്തൂരിലെ വീട്ടില്‍ അവര്‍ മാദ്ധ്യമങ്ങളോട് പറഞ്ഞു. നോട്ടീസില്‍ മുകേഷിനെതിരെ ഗാര്‍ഹിക പീഡനം ആരോപിച്ചിട്ടുണ്ടെന്ന പ്രചാരണം അടിസ്ഥാന രഹിതമാണ്. തനിക്ക് മുകേഷുമായി പ്രശ്‌നങ്ങളുണ്ടെങ്കിലും അതില്‍ ഗാര്‍ഹിക പീഡനം ഇല്ല. ഇതിന്റെ പേരില്‍ മുകേഷിനെ കുറ്റക്കാരനാക്കരുത്. തന്റെ ജീവിതത്തിന്റെ വലിയ ഭാഗമായിരുന്ന മുകേഷിനെ ചെളിവാരിയെറിയാനില്ലെന്നും മേതില്‍ ദേവിക വ്യക്തമാക്കി.

വ്യക്തിപരമായ കാരണങ്ങളാലാണ് വിവാഹം ബന്ധം വേര്‍പിരിയുന്നത്. അഭിഭാഷകന്‍ നോട്ടീസ് കൊടുത്തിട്ടുണ്ട്. മുകേഷ് നിലപാട് വ്യക്തമാക്കിയിട്ടില്ല. തന്റെ കുടുംബ പ്രശ്‌നത്തിന് കേരളവുമായി ബന്ധമുണ്ടെങ്കില്‍ നേരത്തേ തുറന്ന് പറയുമായിരുന്നു. പിരിയാന്‍ തീരുമാനിച്ച സന്ദര്‍ഭം വളരെ പ്രയാസകരമായ ഘട്ടമാണെന്നും സമാധാനപരമായി അത് മറികടക്കാന്‍ എല്ലാവരും അനുവദിക്കണമെന്നും അവര്‍ അഭ്യര്‍ത്ഥിച്ചു.



മുകേഷിന്റെ രാഷ്ട്രീയ പശ്ചാത്തലം കണക്കിലെടുത്താണ് താനിപ്പോള്‍ ഇക്കാര്യങ്ങള്‍ വിശദീകരിക്കാന്‍ നിര്‍ബന്ധിതയായത്. മുതിര്‍ന്ന ആള്‍ക്കാരാണ് ഞങ്ങള്‍ രണ്ടുപേരും. നടന്‍ എന്ന നിലയിലും രാഷ്ട്രീയ പ്രവര്‍ത്തകന്‍ എന്ന നിലയിലുമുള്ള മുകേഷിന്റെ നിലയുമായി ഇത്തരം വ്യക്തിപരമായ കാര്യങ്ങള്‍ കൂട്ടിക്കുഴയ്ക്കാന്‍ പാടില്ല. മുകേഷുമായി ദേഷ്യത്തോടെ പിരിയേണ്ട കാര്യമുണ്ടെന്ന് കരുതുന്നില്ല. വിവാഹമോചനം സംബന്ധിച്ച് മുകേഷുമായി നേരത്തേ സംസാരിച്ചതാണ്. തിരഞ്ഞെടുപ്പ് കഴിയാന്‍ കാത്തിരുന്നതാണെന്നും മേതില്‍ ദേവിക പറഞ്ഞു.

2013 ഒക്ടോബര്‍ 24നായിരുന്നു മുകേഷും മേതില്‍ ദേവികയും തമ്മിലുള്ള വിവാഹം. പ്രതികരിക്കാതെ മുകേഷ്തിരുവനന്തപുരം: വിവാഹമോചന വിഷയത്തില്‍ തനിക്കെതിരായ ആരോപണങ്ങളില്‍ പ്രതികരിക്കാനില്ലെന്നാണ് മുകേഷിന്റെ നിലപാട്. മേതില്‍ ദേവികയുടെ വക്കീല്‍ നോട്ടീസ് മുകേഷിന് കിട്ടിയിട്ടില്ലെന്നാണ് അടുപ്പമുളളവര്‍ ഇന്നലെ രാവിലെ മുതല്‍ പറഞ്ഞിരുന്നത്.

എന്നാല്‍ വൈകുന്നേരത്തോടെ വിവാഹമോചനത്തിന് നോട്ടിസ് നല്‍കിയെന്ന് ദേവിക സ്ഥിരീകരിച്ചതിന് പിന്നാലെ ഉയര്‍ന്ന ചോദ്യങ്ങളില്‍ നിന്ന് മുകേഷ് ഒഴിഞ്ഞുമാറി. ഉച്ചവരെ നിയമസഭാ സമ്മേളനത്തില്‍ പങ്കെടുത്ത മുകേഷ് പിന്നീട് സഭയില്‍ എത്തിയില്ല. ഇടയ്ക്ക് ഫോണ്‍ സ്വിച്ച് ഓഫാക്കിയ അദ്ദേഹം പിന്നീട് പ്രതികരിക്കാനില്ലെന്ന് പറയുകയായിരുന്നു.

വിവാഹബന്ധം വേര്‍പിരിയാന്‍ മുകേഷിന് വക്കീല്‍ നോട്ടീസ് അയച്ചെന്ന് മേതില്‍ ദേവിക കഴിഞ്ഞ ദിവസമാണ് സ്ഥിരീകരിച്ചത്. പിരിയുന്നത് പരസ്പര ധാരണ പ്രകാരമാണ്. ഇപ്പോള്‍ പ്രചരിക്കുന്ന കഥകളിലൊന്നും സത്യമില്ലെന്നും മേതില്‍ ദേവിക പറഞ്ഞു.

മുകേഷിനെതിരെ താന്‍ പരസ്യമായി യാതൊരു പ്രതികരണവും നടത്തിയിട്ടില്ല. ഓണ്‍ലൈന്‍ മാദ്ധ്യമങ്ങളില്‍ പ്രചരിക്കുന്ന പല കാര്യങ്ങളും തെറ്റാണ്. നാല്‍പത് വര്‍ഷത്തിലധികമായി അഭിനയ രംഗത്തുളള മുകേഷേട്ടനെ അപമാനിക്കാന്‍ താനാഗ്രഹിക്കുന്നില്ല. വിവാഹമോചനം എന്നത് വളരെ വ്യക്തിപരമായ കാര്യമാണെന്നും മേതില്‍ ദേവിക പറഞ്ഞു.