ജയിലിനുള്ളില്‍ മദ്യപിച്ചു ബഹളം വച്ച ആറു തടവുകാര്‍ക്കു സെല്‍ മാറ്റം. അവരുടെ കൈവശമെത്തിയ സ്വര്‍ണ്ണവള മുക്കുപണ്ടമാണ് എന്നറിയാതെ അത് വീതം വയ്ക്കുന്നതുമായി ബന്ധപ്പെട്ടു തുടങ്ങിയ തര്‍ക്കമാണ് സെല്‍മാറ്റത്തിലെത്തിയ വാക്കേറ്റമായി മാറിയത്.

സെന്‍ട്രല്‍ ജയിലിനു സമീപം ജയില്‍ വകുപ്പു നിര്‍മിക്കുന്ന ഇന്‍ഡോര്‍ സ്‌റ്റേഡിയത്തിന്റെ നിര്‍മാണജോലികള്‍ തടവുകാര്‍ തന്നെയാണു ചെയ്യുന്നത്. അനധികൃതമായി മണല്‍ കടത്തിയതിനു പൊലീസ് പിടികൂടി സ്‌റ്റേഷനുകളില്‍ സൂക്ഷിച്ചിട്ടുള്ള മണല്‍, ജയില്‍ അധികൃതര്‍ ലേലത്തിനെടുത്താണു ജയിലിലെ നിര്‍മാണജോലികള്‍ നടത്തുന്നത്.

ജയിലിലെ ലോറിയില്‍ തടവുകാര്‍ തന്നെയാണു സ്‌റ്റേഷനുകളിലെത്തി മണല്‍ ശേഖരിച്ചിരുന്നത്. മേല്‍നോട്ടത്തിനായി മൂന്ന് ഉദ്യോഗസ്ഥരുമുണ്ടാകും. ഇങ്ങനെ പാനൂര്‍ മേഖലയിലെ ഒരു പൊലീസ് സ്‌റ്റേഷനിലെത്തിയ തടവുകാര്‍ക്കാണു പൊലീസ് പിടിച്ചെടുത്ത അനധികൃത മദ്യം മണലിനൊപ്പം ബോണസായി കിട്ടിയത്. തടവുകാരോടൊപ്പം മേല്‍നോട്ടത്തിനെത്തിയ പോലീസുകാരെ അറിയിക്കാതെ മദ്യക്കുപ്പികള്‍ മണലിനുള്ളില്‍ പൂഴ്ത്തി സ്‌റ്റേഡിയം നിര്‍മിക്കുന്ന സ്ഥലത്തെത്തിച്ചു.

അവിടെ വച്ച് ഉദ്യോഗസ്ഥരുടെ കണ്ണുവെട്ടിച്ച് ഒന്നുമിനുങ്ങി. തുടര്‍ന്നു മണലിറക്കുമ്പോഴാണു മണലിനുള്ളില്‍ നിന്നൊരു വള കിട്ടുന്നത്. സ്വര്‍ണമാണെന്ന ധാരണയില്‍ ശരീരത്തിനുള്ളില്‍ ഒളിപ്പിച്ച് ജയിലനകത്തെത്തിച്ചു. കളവുമുതല്‍ പങ്കിട്ടെടുക്കുന്ന മാതൃകയില്‍ വള ആറായി മുറിച്ചു വീതിക്കാന്‍ തീരുമാനമായി. എന്നാല്‍ ഇതു വീതിക്കുന്നതിനെ ചൊല്ലിയുള്ള തര്‍ക്കം ബഹളത്തില്‍ കലാശിക്കുകയായിരുന്നു.

മദ്യലഹരിയില്‍ പോരടിച്ച തടവുകാരെ ഉദ്യോഗസ്ഥര്‍ ചോദ്യം ചെയ്തപ്പോഴാണു മദ്യവും വളയും വന്ന വഴിയറിഞ്ഞത്. തര്‍ക്കത്തിനു വഴിവച്ച സ്വര്‍ണവള പരിശോധനയില്‍ മുക്കുപണ്ടമാണെന്നു തെളിഞ്ഞു. മണല്‍ ലോറിയിലേക്കു കയറ്റുന്നതിനിടെ സ്‌റ്റേഷന്‍ വളപ്പില്‍ ഉപേക്ഷിച്ച നിലയില്‍ കണ്ടെത്തിയ കാലാവധി കഴിഞ്ഞ മദ്യക്കുപ്പിയാണ് എടുത്തതെന്ന തടവുകാരുടെ വാദം പക്ഷേ അധികൃതര്‍ വിശ്വാസത്തിലെടുത്തിട്ടില്ല. പൊലീസ് സ്‌റ്റേഷന്‍ വളപ്പില്‍ നിന്നു തടവുകാര്‍ക്ക് എങ്ങനെയാണു മദ്യക്കുപ്പി ലഭിച്ചതെന്ന് അന്വേഷണം തുടങ്ങിയിട്ടുണ്ട്. സംഭവത്തില്‍ ഉള്‍പ്പെട്ട ആറു തടവുകാരെയും ഒന്നാം ബ്ലോക്കില്‍ നിന്നു കൊടുംകുറ്റവാളികളെ പാര്‍പ്പിക്കുന്ന പത്താം ബ്ലോക്കിലേക്കു മാറ്റി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha