വെള്ളത്തുണിയില് പൊതിഞ്ഞ് മാനസയുടെ ചലനമറ്റ ശരീരം.....'എന്റെ പൊന്നുമോളേ...' എന്ന് അലറിക്കരഞ്ഞ് അമ്മ; കണ്ണീരണിയിച്ച് മാനസയുടെ അന്ത്യയാത്ര
വെള്ളത്തുണിയില് പൊതിഞ്ഞ് മാനസയുടെ ചലനമറ്റ ശരീരം വീട്ടിലേക്കെടുത്തപ്പോള് അകത്ത് നിന്ന് പെറ്റമ്മയുടെ നിലവിളി ഉയര്ന്നു. 'എന്റെ പൊന്നുമോളേ...' എന്ന ആര്ത്തനാദത്തില് കൂടി നിന്നവരുടെയെല്ലാം കണ്ണുകള് ഈറനണഞ്ഞു. ദുഖം ഉള്ളിലൊതുക്കാനാവാതെ പലരും വിങ്ങിക്കരഞ്ഞു.
കോതമംഗലത്ത് യുവാവ് വെടിവെച്ച് കൊന്ന കണ്ണൂര് നാറാത്തെ മാനസയുടെ മൃതദേഹം രാവിലെ ഏഴരയോടെയാണ് കണ്ണൂര് നാറാത്തെ വീട്ടിലെത്തിച്ചത്. അമ്മയ്ക്കും അടുത്ത ബന്ധുക്കള്ക്കും അവസാന നോക്കിനായി അല്പസമയം വീട്ടിനുള്ളില് വെച്ചപ്പോള് കൂട്ട നിലവിളിക്കായിരുന്നു ഒരു ഗ്രാമം സാക്ഷിയായത്. ഡോക്ടറായി തിരിച്ചു വരേണ്ട മോളുടെ മരവിച്ച ശരീരം കാണാനാവാതെ അമ്മ നിയന്ത്രണം വിട്ട് പൊട്ടിക്കരഞ്ഞു.
ഞായറാഴ്ച പുലച്ചെ രണ്ടരയോടെയാണ് മാനസയുടെ ഭൗതിക ശരീരം പോസ്റ്റ്മോര്ട്ടത്തിന് ശേഷം കോതമംഗലത്തു നിന്നും കണ്ണൂരിലെത്തിയത്. തുടര്ന്ന് കണ്ണൂര് എ.കെ.ജി ആശുപത്രിയില് മോര്ച്ചറിയില് സൂക്ഷിക്കുകയായിരുന്നു.
വീട്ടുമുറ്റത്ത് പൊതു ദര്ശനത്തിനടക്കം വെച്ച മൃതദേഹം ഒമ്പതരയോടെ കണ്ണൂര് പയ്യാമ്പലത്തെ പൊതു ശ്മാശനത്തിലെത്തിച്ച് സംസ്കരിച്ചു. 'സ്നേഹ' സല്യൂട്ട് നല്കിയാണ് വിമുക്തഭടന് കൂടിയായ മാധവന് മകളെ യാത്രയാക്കിയത്. സഹോദരന് അശ്വന്ത് സംസ്കാര ചടങ്ങുകള് നിര്വഹിച്ചു.
അങ്ങനെ പ്രണയ പകയുടെ നീറുന്ന ഓര്മയായി മാനസ ചിതയില് എരിഞ്ഞമര്ന്നു. വെള്ളിയാഴ്ച വൈകീട്ടോടെയാണ് മാനസക്ക് സംഭവിച്ച ദുരന്ത വാര്ത്ത കുടുംബാംഗങ്ങളും നാട്ടുകാരുമറിയുന്നത്. സംഭവമറിഞ്ഞയുടന് മാനസയുടെ മാതാവ് സബീന തളര്ന്നു വീണിരുന്നു. ആരോഗ്യനില വഷളായതിനെ തുടര്ന്ന് ഡോക്ടറും നഴ്സുമാരുമെത്തി പരിശോധന നടത്തി.
വീട്ടില് പൊതുദര്ശനത്തിന് വെച്ച മൃതദേഹത്തില് മന്ത്രി എം.വി. ഗോവിന്ദന്, കെ.വി. സുമേഷ് എം.എല്.എ, ജില്ല പഞ്ചായത്ത് പ്രസിഡന്റ് പി.പി. ദിവ്യ, മേയര് ടി.ഒ. മോഹനന്, സി.പി.എം ജില്ല സെക്രട്ടറി എം.വി. ജയരാജന്, ബി.ജെ.പി ജില്ല പ്രസിഡന്റ് എന്. ഹരിദാസ് എന്നിവര് അന്ത്യാഞ്ജലി അര്പ്പിച്ചു.
മാനസയെ കൊലപ്പെടുത്തിയ ശേഷം സ്വയം വെടിയുതിര്ത്തു മരിച്ച രഖിലിന്റെയും മൃതദേഹം സംസ്കരിച്ചു. തലശ്ശേരി മേലൂരിലെ വീട്ടിലെത്തിച്ച മൃതദേഹം പൊതു ദര്ശനത്തിന് വച്ചു. തുടര്ന്ന് നാട്ടുകാരും ബന്ധുക്കളും സുഹൃത്തുക്കളും അന്തിമോപചാരം അര്പ്പിച്ചു. പിണറായി പന്തക്കപ്പാറ ശ്മശാനത്തിലാണ് സംസ്കരിച്ചത്.
https://www.facebook.com/Malayalivartha