പ്രമുഖ വ്യവസായി രാജ് കുന്ദ്രെ അറസ്റ്റിലായതോടെ അദ്ദേഹത്തിന്റെ മുന്‍കാല ചെയ്തികള്‍ ചികഞ്ഞെടുക്കുകയാണ് ഹിന്ദി ലോകം. കുന്ദ്രെ ശില്‍പ ഷെട്ടിയെ വിവാഹം കഴിക്കുന്നതിന് മുമ്പ് മറ്റൊരു യുവതിയെ വിവാഹം കഴിച്ചിരുന്നു. ഒരു ബ്രിട്ടിഷ് വ്യവസായിയുടെ മകള്‍ കവിതയെ കുന്ദ്ര വിവാഹം ചെയ്യുന്നത് 2003 ല്‍ ആണ്. എന്നാല്‍ 2006 ല്‍ അവര്‍ വിവാഹമോചിതരായി. ഈ ബന്ധത്തില്‍ ഒരു മകളുണ്ട്. ശില്‍പ ഷെട്ടിയാണ് തന്റെ ദാമ്പത്യം തകര്‍ത്തതെന്ന കവിതയുടെ ആരോപണം അന്നു വലിയ വിവാദങ്ങള്‍ക്കു വഴിവച്ചിരുന്നു.

ശില്‍പയോടൊപ്പമുള്ള നിരവധി ചിത്രങ്ങള്‍, എപ്പോഴും അവരെക്കുറിച്ച് മാത്രം സംസാരിക്കുന്ന ഭര്‍ത്താവ്. എന്നിട്ടും ദാമ്പത്യം തകരാതിരിക്കാന്‍ താന്‍ പരമാവധി ശ്രമിച്ചു. തീരെ സഹിക്കാനാവാതെ വന്നപ്പോഴാണ് വിവാഹമോചനം നേടിയത് എന്നായിരുന്നു കവിത പറഞ്ഞത്. എന്നാല്‍ താനും ശില്‍പയും വെറും സുഹൃത്തുക്കള്‍ മാത്രമാണെന്നും മുന്‍ ഭാര്യയുടെ പ്രസ്താവനകള്‍ക്ക് ശില്‍പയോട് മാപ്പു പറയുന്നുവെന്നുമായിരുന്നു കുന്ദ്ര പ്രതികരിച്ചത്.

കവിത വേര്‍പിരിഞ്ഞ് മാസങ്ങള്‍ക്കുശേഷമാണ് താന്‍ കുന്ദ്രയെ പരിചയെപ്പട്ടതെന്നു ശില്‍പ വ്യക്തമാക്കുകയും ചെയ്തു. അങ്ങനെ തണുത്ത വിവാദം അടുത്തിടെ വീണ്ടും തലപൊക്കി. തന്റെ സഹോദരി റീനയുടെ ഭര്‍ത്താവുമായി കവിതയ്ക്കുണ്ടായിരുന്ന ബന്ധമാണ് ദമ്പത്യം തകരാന്‍ കാരണമായതെന്ന് ഇടൈംസിന് നല്‍കിയ അഭിമുഖത്തില്‍ കുന്ദ്ര വെളിപ്പെടുത്തി. തന്നെ വഞ്ചിക്കുക എന്നത് സഹിക്കാമായിരുന്നു,

എന്നാല്‍ തന്റെ സഹോദരിയുടെ കുടുംബം കവിത തകര്‍ത്തതെന്നും ആ തെറ്റുകള്‍ മറച്ചു വയ്ക്കാനാണ് ശില്‍പയെ പഴിചാരിയതെന്നും കുന്ദ്ര പറഞ്ഞു. പിങ്ക് വില്ലയ്ക്ക് നല്‍കിയ അഭിമുഖത്തില്‍ റീന ഇക്കാര്യങ്ങളെല്ലാം സ്ഥിരീകരിക്കുകയും ചെയ്തു. കുന്ദ്രയുടെ ജീവിതത്തിലെ കറുത്ത അധ്യായങ്ങളായിരുന്നു ഇതെല്ലാം.

ബ്രിട്ടിഷ് ടെലിവിഷന്‍ റിയാലിറ്റി ഷോ ബിഗ് ബ്രദറിന്റെ അഞ്ചാം സീസണില്‍ പങ്കെടുക്കാനായി ലണ്ടനിലെത്തിയപ്പോഴാണ് ശില്‍പയും കുന്ദ്രയും പരിചയപ്പെടുന്നത്. ശില്‍പയുടെ ഏജന്റ് കുന്ദ്രയുടെ സുഹൃത്തായിരുന്നു. ഷോയില്‍ വിജയിച്ച് ശില്‍പ നേടിയ പ്രശസ്തി എങ്ങനെ പ്രയോജനപ്പെടുത്താമെന്ന് സുഹൃത്തായ ഏജന്റ് കുന്ദ്രയോട് ചോദിച്ചു. ഒരു പെര്‍ഫ്യൂം ബ്രാന്‍ഡ് ചെയ്യാനായിരുന്നു കുന്ദ്രയുടെ ഉപദേശം. മാത്രമല്ല അതിന് കുന്ദ്ര മുന്‍കൈ എടുക്കുകയും ചെയ്തു. ലാഭത്തിനൊപ്പം കുന്ദ്ര-ശില്‍പ പ്രണയത്തിനും ആ പെര്‍ഫ്യൂം ബിസിനസ് തുടക്കമിട്ടു. രണ്ടു വര്‍ഷത്തെ പ്രണയത്തിനുശേഷം 2009 ല്‍ ഇവര്‍ വിവാഹിതരാകുകയും ചെയ്തു. തുടര്‍ന്ന് മുംബൈയിലേക്ക് താമസം മാറ്റി. പിന്നെ ഉയര്‍ച്ച വളരെ പെട്ടെന്ന്.

കുടുംബത്തിനായി അച്ഛനും അമ്മയും കഠിനമായി കഷ്ടപ്പെടുന്നതു കണ്ടാണ് കുന്ദ്ര വളര്‍ന്നത്. പണം എത്ര മാത്രം പ്രധാനപ്പെട്ടതാണെന്ന് താന്‍ തിരിച്ചറിഞ്ഞത് ആ കാലത്താണെന്നു കുന്ദ്ര പലപ്പോഴും പറഞ്ഞിട്ടുണ്ട്. ആ സാധാരണ ജീവിതം രാജ് വെറുത്തിരുന്നു. പക്ഷേ അതിനെല്ലാം പതിയെ മാറ്റം വന്നു.

പ്രണയത്തിലും ദാമ്പത്യത്തിലും ആരെയും അസൂയപ്പെടുത്തുന്ന രീതിയിലാണ് ശില്‍പയും കുന്ദ്രയും മുന്നേറിയത്. ലോകത്തിലെ ഏറ്റവും വലിയ ബില്‍ഡിങ് ആയ ഖുര്‍ജ് ഖലീഫയുടെ 19 ാം നിലയില്‍ ഒരു ഫ്‌ലാറ്റ് ഒന്നാം വിവാഹ വാര്‍ഷികത്തിന് കുന്ദ്ര ശില്‍പ ഷെട്ടിക്ക് നല്‍കിയ സമ്മാനം ഇതായിരുന്നു. സെന്‍ട്രല്‍ ലണ്ടനിലുള്ള 7 കോടി വില വരുന്ന ഒരു ഫ്‌ലാറ്റായിരുന്നു അതേ വര്‍ഷം നല്‍കിയ ജന്മദിന സമ്മാനം. ലോക്ഡൗണിലെ മാലദ്വീപ് ആഘോഷങ്ങളും വാര്‍ത്തകളില്‍ നിറഞ്ഞു.

ഷോളുകള്‍ വിറ്റാണ് കുന്ദ്ര തുടങ്ങിയത്. അന്നു നേടിയതാകട്ടെ കോടികളും. ബിസിനസ് സാധ്യതകള്‍ മുന്‍കൂട്ടി കാണാനുള്ള കഴിവ് രാജസ്ഥാന്‍ റോയല്‍സിലെ ഓഹരി പങ്കാളിത്തവും ശരിവയ്ക്കുന്നു. പണത്തിനായി വഴിവിട്ടു സഞ്ചരിക്കാന്‍ മടിയില്ലെന്ന് പലപ്പോഴായി കുന്ദ്ര തെളിയിച്ചിട്ടുമുണ്ട്. അവസാനം പോലീസ് പിടിയിലായതോടെ പതനവും ആരംഭിച്ചു.