പ്രോട്ടോക്കോളില്‍ മന്ത്രിമാരെ ബഹുമാനിക്കാന്‍ പറയുന്നില്ലെന്ന് പറഞ്ഞ് മന്ത്രി വരുമ്പോള്‍ ചടഞ്ഞു കൂടിയിരിക്കുന്നത് ശരിയല്ലെന്നും സംസ്‌കാരമുണ്ടെങ്കിലേ മന്ത്രി വരുമ്പോള്‍ എണീറ്റ് നില്‍ക്കാന്‍ കഴിയൂ എന്നും മന്ത്രി കെ.ബാബു. പൊലീസ് സേനയ്ക്ക് അച്ചടക്കം അത്യാവശ്യമാണ്. എഡിജിപി ആയാലും സിവില്‍ പൊലീസ് ഓഫിസറായാലും അത് ആവശ്യമാണെന്ന് എഡിജിപി ഋഷിരാജ് സിങ്ങിനെ കുറ്റപ്പെടുത്തി മന്ത്രി പറഞ്ഞു. കേരളാ പൊലീസ് ഓഫിസേഴ്‌സ് അസോസിയേഷന്‍ ജില്ലാ സമ്മേളനത്തിന്റെ പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. അഴിമതിക്കാരല്ലാത്ത ചില ആളുകളുടെ തോന്നല്‍ അവരാണ് ലോകത്തെ ഏറ്റവും വലിയ ആള്‍ക്കാര്‍ എന്നാണ്. പൊലീസിലെ ക്രിമിനലിസം പോലെ തന്നെ വച്ചുപൊറുപ്പിക്കാന്‍ പാടില്ലാത്തതാണ് അച്ചടക്കമില്ലായ്മയുമെന്ന് മന്ത്രി പറഞ്ഞു.
ജസ്റ്റിസ് അലക്‌സാണ്ടര്‍ തോമസിനെതിരെയും ബാബു രൂക്ഷവിമര്‍ശനം ഉന്നയിച്ചു. ജഡ്ജിമാര്‍ ഇരിക്കുന്ന സ്ഥാനത്തിന്റെ വില മനസിലാക്കണമെന്നും ഉത്തരവുകളിടുന്നതിനു മുന്‍പു സാമാന്യ ബുദ്ധി ഉപയോഗിക്കണമെന്നും അദ്ദേഹം ആവശ്യപ്പെട്ടു. പഠിക്കുന്ന കാലത്ത് പല നിലപാടുകളും പലര്‍ക്കുമുണ്ടാകും. എന്നാല്‍ ഒരു സ്ഥാനത്ത് എത്തിയാല്‍ ആ സ്ഥാനത്തിന്റെ വില കാക്കണം. ബാര്‍ മുതലാളിമാര്‍ക്ക് വേണ്ടി അറ്റോര്‍ണി ജനറല്‍ ഹാജരായതിനെതിരെയാണ് മുഖ്യമന്ത്രി പ്രധാനമന്ത്രിക്ക് കത്തയച്ചത്. അത് അദ്ദേഹത്തിന്റെ കടമയാണ്. അതിനെ പലരും ചോദ്യം ചെയ്യുകയാണ്. ജഡ്ജിമാരുടെ ചില പ്രതികരണങ്ങള്‍ കാരണം മുഖ്യമന്ത്രിക്ക് പോലും സ്വതന്ത്രമായി പ്രവര്‍ത്തിക്കാന്‍ കഴിയുന്നില്ല. ജഡ്ജിമാരായി ആ സ്ഥാനത്ത് കയറി ഇരിക്കുന്നവര്‍ പക്ഷപാതിത്വം കാണിക്കരുത്.
ജനാധിപത്യരാജ്യത്താണ് ജീവിക്കുന്നതെന്ന് ഓര്‍മ വേണം. നിഷ്പക്ഷ നിലപാടുകള്‍ ഉയര്‍ത്തിപ്പിടിക്കുന്നതിന് വേണ്ടി ചില ജഡ്ജിമാര്‍ വോട്ട് ചെയ്യാന്‍ പോലും പോകാറില്ല. അടുപ്പമുള്ള ബന്ധുക്കളുടെ കേസുകള്‍ വരുമ്പോള്‍ ചില ജഡ്ജിമാര്‍ ആ കേസ് കേള്‍ക്കുന്നതില്‍ നിന്ന് ഒഴിഞ്ഞു നില്‍ക്കാറുമുണ്ട്. സ്ഥാനത്തിരിക്കുന്നവര്‍ പരിധി വിട്ട് പെരുമാറിയാല്‍ ഇരിക്കുന്ന സ്ഥാനത്തിന്റെ മഹത്വം കുറയുമെന്നും അദ്ദേഹം പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha