നടന്‍ ജഗതിയുടെ ജീവന് ഭീഷണിയുണ്ടെന്നും അതിനാല്‍ ജഗതിയെ ചികിത്സിക്കാനും ശുശ്രൂഷിക്കാനും അനുവദിക്കണമെന്ന് ആവശ്യപ്പെട്ട് മകള്‍ ശ്രീലക്ഷ്മി കോടതിയിലേക്ക്. പ്രമുഖ ചാനല്‍ പരിപാടിക്കിടയിലാണ് ശ്രീലക്ഷ്മിയുടെ വെളിപ്പെടുത്തല്‍.ജഗതിക്ക് നിലവില്‍ നല്‍കുന്ന ചികിത്സയില്‍ ആശങ്കയുണ്ടെന്നും അദ്ദേഹത്തെ പരിചരിക്കാന്‍ തന്നെ അനുവദിക്കണമെന്നുമാണ് ശ്രീലക്ഷ്മിയുടെ ആവശ്യം.
നടന്‍ ജഗതി ശ്രീകുമാറിന്റെ ചികിത്സക്കായി കോടതിയെ സമീപിക്കും. നിലവിലുള്ള ചികിത്സകള്‍ പുനഃപരിശോധിക്കാനും നല്ല ചികിത്സ ഉറപ്പ് വരുത്താനും സ്വതന്ത്രമായി അദ്ദേഹത്തെ പരിചരിക്കാനുള്ള സാഹചര്യം ഒരുക്കണമെന്ന ആവശ്യമാണ് ശ്രീലക്ഷ്മി ഉന്നയിക്കുന്നത്. അച്ഛനെ കാണാന്‍ കോടതി വിധി ഉണ്ടായിട്ടും മൂ്ന്ന് വര്‍ഷം താന്‍ കാത്തിരുന്നു. ഇനി കോടതിയെ സമീപിക്കുകയാണ് തനിക്ക് മുന്നിലുള്ള മാര്‍ഗ്ഗമെന്നുമാണ് ശ്രീലക്ഷ്മി പറയുന്നത്. ഇതിനായി ചികിത്സിച്ച ഡോക്ടര്‍മാരുടെ സഹായവും ശ്രീലക്ഷ്മി പ്രതീക്ഷിക്കുന്നു. അച്ഛന്‍ ഒന്ന് സംസാരിച്ചു കണ്ടാല്‍ മതിയെന്നാണ് തന്റെ ആഗ്രഹം. നിലവില്‍ അച്ഛന് നല്‍കുന്ന ചികിത്സയിലും സുരക്ഷിതത്വത്തിലും തനിക്ക ആശങ്കയുണ്ടെന്നും ശ്രീലക്ഷ്മി പറഞ്ഞു.
അച്ഛന്‍ അപകടത്തില്‍പ്പെട്ടതിന് ശേഷം പലതരത്തിലുള്ള ഉപദ്രവങ്ങളാണ് തനിക്കും അമ്മയ്ക്കും ഏല്‍ക്കേണ്ടി വന്നതെന്നും ജീവനു പോലും ഭീഷണിയുണ്ടായിട്ടുണ്ടെന്നും ശ്രീലക്ഷ്മി പറഞ്ഞു. ഭര്‍ത്താവിനെ കാണാന്‍ അനുവദിച്ചില്ലെങ്കിലും മകളെ അവളുടെ അച്ഛനെ കാണാന്‍ അനുവദിക്കണമെന്നാണ് ശ്രീലക്ഷമിയുടെ അമ്മ കമലയുടെ ആവശ്യം. അതിനാല്‍ നിയമത്തിന്റെ ഏതറ്റം വരെയും പോകാനും ഈ അമ്മ തയ്യാറാണ്.
കഴിഞ്ഞ മാസം അപകടത്തിനു ശേഷം ജഗതി ആദ്യമായി പങ്കെടുത്ത പൊതുപരിപാടിക്കിടെ ശ്രീലക്ഷ്മി വേദിയിലെത്തിയിരുന്നു. പൂഞ്ഞാറില്‍ നടന്ന ചടങ്ങിനിടെ ശ്രീലക്ഷ്മി എത്തിയത് ഏറെ വിവാദങ്ങളും സൃഷ്ടിച്ചു. അച്ഛന്റെ സ്വത്തൊന്നും തനിക്ക് വേണ്ടെന്നും പപ്പയെ കാണാന്‍ വേണ്ടിയുള്ള നിയമപോരാട്ടമാണ് നടത്താന്‍ ആഗ്രഹിക്കുന്നതെന്നുമാണ് ശ്രീലക്ഷ്മി പറഞ്ഞത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha