ഒത്തുകളിക്കേസില്‍ ശ്രീശാന്ത് ഉള്‍പ്പെടെയുള്ള താരങ്ങളെ കോടതി വെറുതെ വിട്ടതോടെ വീണ്ടും ശ്രദ്ധാകേന്ദ്രമാകുന്നത് താരങ്ങളെ നാടകീയമായി അറസ്റ്റ് ചെയ്ത അന്നത്തെ ഡല്‍ഹി പൊലീസ് കമ്മിഷണര്‍ നീരജ് കുമാറാണ്. വിരമിക്കുന്നതിനു തലേദിവസമാണ് ഇദ്ദേഹം കേസിലെ കുറ്റപത്രം സമര്‍പ്പിച്ചത്. അതിനുശേഷം ബിസിസിഐയ്ക്കു വേണ്ടപ്പെട്ടയാളായി മാറിയ നീരജ് ഇപ്പോള്‍ ബിസിസിഐ അഴിമതി വിരുദ്ധ യൂണിറ്റിന്റെ മുഖ്യ ഉപദേശകനാണ്.
കോളിളക്കം സൃഷ്ടിച്ച കേസ് ദുര്‍ബലപ്പെട്ടതോടെ നീരജ് കുമാറിന്റെ കാര്യക്ഷമതയെക്കുറിച്ചു ബോര്‍ഡ് വൃത്തങ്ങളില്‍ എതിരഭിപ്രായങ്ങളുയര്‍ന്നുകഴിഞ്ഞു. ഐപിഎല്‍ കേസില്‍ ഡല്‍ഹി പൊലീസ് കാണിച്ച അനാവശ്യ തിടുക്കം തുടക്കംമുതല്‍ സംശയം ഉണര്‍ത്തിയിരുന്നു. ഡല്‍ഹി കൂട്ടമാനഭംഗക്കേസിനെത്തുടര്‍ന്നു തകര്‍ന്നുപോയ സ്വന്തം പ്രതിച്ഛായ തിരിച്ചുപിടിക്കാന്‍ പൊലീസ് ആസൂത്രണം ചെയ്തതാണ് ഐപിഎല്‍ കേസെന്ന് ആരോപണമുണ്ടായിരുന്നു. ക്രിക്കറ്റ് ലോകത്തെ പല വന്‍സ്രാവുകളുടെയും പേരുകള്‍ അന്വേഷണഘട്ടത്തില്‍ ഉയര്‍ന്നുകേട്ടെങ്കിലും ഒടുവില്‍ കുരുക്കിലായത് ശ്രീശാന്തും അങ്കിത് ചവാനും അജിത് ചാന്ദിലയും മാത്രം.
ഇവര്‍ പിടിയിലായതോടെ അന്വേഷണത്തിന്റെ ആവേശം ഏതാണ്ട് നിലച്ചു. പിടിയിലായവരെ ഒരിക്കലും പുറത്തുവരാനാകാത്ത വിധം കുരുക്കിയിടാനായി പിന്നെ ശ്രമം. അതിനായി ദാവൂദ് ഇബ്രാഹീം മുതല്‍ മക്കോക്ക വരെയുള്ള കാര്‍ഡുകള്‍ ഇറക്കി. വന്‍തോതില്‍ ഹവാലാ പണം ഐപിഎല്ലിലേക്ക് ഇറങ്ങിയെന്ന് ആരോപിച്ചു. ആറായിരം പേജുള്ള കുറ്റപത്രം കോടതി കയ്യോടെ തള്ളുമ്പോള്‍ തകര്‍ന്നുപോകുന്നതു ഡല്‍ഹി സ്‌പെഷല്‍ സെല്ലിന്റെ വിശ്വാസ്യതയാണ്. നേപ്പാളില്‍നിന്നു കീഴടങ്ങാനെത്തിയ ലിയാഖത്ത് അലി എന്ന കശ്മീര്‍ സ്വദേശിയെ തീവ്രവാദിയെന്നു മുദ്രകുത്തി ഡല്‍ഹി സ്‌പെഷല്‍ സെല്‍ നാടകം കളിച്ചതു മാസങ്ങള്‍ക്കു മുന്‍പാണ്.ദേശീയ അന്വേഷണ ഏജന്‍സി പിന്നീടു നടത്തിയ അന്വേഷണത്തില്‍ സ്‌പെഷല്‍ സെല്ലിന്റെ കെട്ടുകഥകള്‍ ഓരോന്നായി പൊളിഞ്ഞുവീണിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha