സ്വന്തം വീട്ടുമുറ്റത്തു കളിച്ചുകൊണ്ടിരുന്ന രണ്ടുവയസുകാരനെയും രക്ഷിക്കാനെത്തിയ അഞ്ചുവയസുകാരന്‍ സഹോദരനെയും തെരുവുനായ കടിച്ചുകീറിയ സംഭവത്തില്‍ 50,000 രൂപ അടിയന്തര ധനസഹായം നല്‍കാന്‍ സംസ്ഥാന മനുഷ്യാവകാശ കമ്മിഷന്‍ അധ്യക്ഷന്‍ ജസ്റ്റിസ് ജെ. ബി. കോശി ഉത്തരവിട്ടു. കുറിച്ചി പാപ്പാഞ്ചിറയില്‍ ജൂണ്‍ 27ന് ആയിരുന്നു സംഭവം. മുഖ്യമന്ത്രിയുടെ ദുരിതാശ്വാസ നിധിയില്‍ നിന്നു തുക നല്‍കണമെന്നാണ് നിര്‍ദേശം.

കൂലിവേല ചെയ്യുന്ന പട്ടികവിഭാഗക്കാരനായ സചിവോത്തമപുരം വലിയതറ വീട്ടില്‍ ഷൈമോന്റെ മക്കളെയാണ് തെരുവുനായ കടിച്ച് മുറിവേല്‍പ്പിച്ചത്. വിലയേറിയ മരുന്നുകള്‍ ഉപയോഗിച്ച് ചികിത്സ നടത്തിയെന്നും തുടര്‍ ചികിത്സയ്ക്ക് പണമില്ലെന്നുമാണ് പരാതി.

തെരുവുനായ്ക്കളെ കൊല്ലരുതെന്ന സുപ്രീം കോടതിവിധിയില്‍ നായ്ക്കളെ വന്ധ്യംകരണം നടത്തണമെന്നു പറഞ്ഞിട്ടുണ്ടെന്ന് ജസ്റ്റിസ് ജെ. ബി. കോശി ഉത്തരവില്‍ ചൂണ്ടിക്കാണിച്ചു. ഇതിനാവശ്യമായ നിയമവും ഉണ്ടാക്കി. എന്നാല്‍, സര്‍ക്കാരും തദ്ദേശ സ്ഥാപനങ്ങളും നിഷ്‌ക്രിയരായിരിക്കയായിരുന്നു. പേയുണ്ടെന്നു സംശയിക്കുന്ന നായ്ക്കളെ കൊല്ലണമെന്ന ഹൈക്കോടതി ഡിവിഷന്‍ ബെഞ്ച് നിര്‍ദ്ദേശവും നടപ്പാക്കിയില്ല.

തങ്ങളുടെ കടമ നിറവേറ്റാത്തതിനാല്‍ പരാതിക്കാരനു നഷ്ടപരിഹാരം നല്‍കേണ്ടതു സര്‍ക്കാരിന്റെയും തദ്ദേശസ്ഥാപനത്തിന്റെയും കടമയാണെന്ന് നടപടിക്രമത്തില്‍ പറയുന്നു. നടപടിക്രമം റവന്യു സെക്രട്ടറിക്കും കോട്ടയം കലക്ടര്‍ക്കും അയച്ചു. കലക്ടറും കുറിച്ചി ഗ്രാമപഞ്ചായത്ത് സെക്രട്ടറിയും ഓഗസ്റ്റ് 11ന് കോട്ടയത്ത് നടക്കുന്ന സിറ്റിങ്ങില്‍ വിശദീകരണം നല്‍കണം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha