നവാസിന്റേത് ലൈംഗികാധിക്ഷേപം തന്നെ, അഭിമാനം ഞങ്ങള്ക്കും വലുത്, ലീഗിനെതിരെ വീണ്ടും മുന് ഹരിത നേതാക്കള്
ലീഗ് നേതൃത്വത്തിനെതിരെ ആഞ്ഞടിച്ച് ഹരിത മുന് ഭാരവാഹികള് രംഗത്ത്. മുസ്ലിം ലീഗിന്റെ വിദ്യാര്ത്ഥി സംഘടനയായ എംഎസ് എഫിന്റെ സംസ്ഥാന പ്രസിഡന്റ് പി കെ നവാസിന്റെ പരാമര്ശം ലൈംഗികാധിക്ഷേപം തന്നെയെന്ന് ഹരിത മുന് ഭാരവാഹികള് തുറന്നടിച്ചു .
രൂക്ഷമായ സൈബര് ആക്രമണമാണ് നേരിടുന്നത്. അപമാനത്തിന് ലീഗ് നേതൃത്വം മറുപടി പറയണമെന്നും ഹരിത മുന് നേതാക്കള് വാര്ത്താ സമ്മേളനത്തില് ആവശ്യപ്പെട്ടു. അഭിമാനം ഞങ്ങള്ക്കും വലുതാണെന്നും അവര് കൂട്ടിച്ചേര്ത്തു. ഇത്രയും കാലത്തെ പ്രവര്ത്തനത്തെ റദ്ദ് ചെയ്യുന്ന തരത്തിലുള്ള പരാമര്ശമാണ് ലീഗ് നേതൃത്വം നടത്തിയതെന്നും അവര് ആരോപിച്ചു.
പാര്ട്ടിക്ക് പരാതി കൊടുത്തിട്ട് 50 ദിവസം കഴിഞ്ഞ ശേഷമാണ് വനിതാ കമ്മീഷനെ സമീപിച്ചതെന്നും അവര് കുറ്റപ്പെടുത്തി. പരാതി മെയിലില് തന്നെ അയച്ച് നേതൃത്വത്തെ അറിയിച്ചതാണ്. കുഞ്ഞാലിക്കുട്ടിക്ക് അടക്കം പരാതി നല്കിയിരുന്നു. നേതാക്കളെ നേരിട്ട് സന്ദര്ശിച്ചും പരാതി അറിയിച്ചിരുന്നു. അടിയന്തര വിഷയമായി പരിഗണിച്ച് നടപടിയെടുക്കണമെന്ന് ആവശ്യപ്പെട്ടു. ഞങ്ങളെ കേള്ക്കാന് തയ്യാറാകണമെന്ന് പലതവണ അഭ്യര്ത്ഥിച്ചു. ഹരിതയിലെ പെണ്കുട്ടികള് സ്വഭാവ ദൂഷ്യമുള്ളവരാണെന്ന് വരുത്താനാണ് ശ്രമം. പിഎംഎ സലാമിന്റെ പ്രതികരണം വേദനിപ്പിച്ചു. വനിതാ കമ്മീഷന് പരാതി നല്കിയത് വലിയ കുറ്റമായി പറഞ്ഞുവെന്നും അവര് പറഞ്ഞു.
നവാസിന് എതിരായ പരാതി പിന്വലിക്കാത്തതിനെ തുടര്ന്ന് ലീഗ്, ഹരിത സംസ്ഥാന കമ്മിറ്റി പിരിച്ചുവിടുകയും പുതിയ കമ്മിറ്റി രൂപീകരിക്കുകയും ചെയ്തിരുന്നു. ലൈംഗികാധിക്ഷേപം നേരിട്ടവര് വനിതാ കമ്മിഷനില് പരാതി നല്കിയതിനാണു നടപടിക്ക് കാരണമായത്. ഹരിത നേതാക്കളുടെ നടപടി കടുത്ത അച്ചടക്ക ലംഘനമെന്നു മുസ്ലിം ലീഗ് നേതൃത്വം വിലയിരുത്തിയിരുന്നു.
ഹരിത പിരിച്ചു വിട്ടതിനെതിരെ കോടതിയെ സമീപിക്കുമെന്ന് ഹരിത അംഗങ്ങള് അറിയിച്ചിരുന്നു. സ്ത്രീ വിരുദ്ധ പരാമര്ശം നടത്തിയ വിഷയത്തില് പരാതി നല്കിയതിന്റെ പേരില് കൂട്ടായ്മ പിരിച്ചു വിടുന്നത് നിയമവിരുദ്ധമാണ്.പിരിച്ചു വിടും മുന്പ് ആരുടെയും വിശദീകരണം പോലും കേള്ക്കാന് തയ്യാറായില്ല. പിരിച്ചുവിടല് പാര്ട്ടി ഭരണഘടന പ്രകാരമല്ലെന്നും പരാതിക്കാര് വ്യക്തമാക്കിയിരുന്നു.
വനിത കമ്മിഷനില് നല്കിയ പരാതി ഒരുകാരണവശാലും പിന്വലിക്കില്ല. നീതി ലഭിക്കാന് ഏത് അറ്റം വരെയും പോകുമെന്നും ഹരിത നേതാക്കള് പറഞ്ഞിരുന്നു. ആരോപണ വിധേയര് പരസ്യമായി ഖേദപ്രകടനം നടത്തുന്നതിനു പകരമായി വനിത കമ്മിഷനില് നല്കിയ പരാതി പിന്വലിക്കണമെന്നു ലീഗ് നേതൃത്വം നിര്ദേശിച്ചിരുന്നെങ്കിലും ഹരിത അംഗങ്ങള് തള്ളുകയായിരുന്നു.
എംഎസ്എഫ് സംസ്ഥാന പ്രസിഡന്റ് പി.കെ.നവാസ്, മലപ്പുറം ജില്ലാ പ്രസിഡന്റ് കബീര് മുതുപറമ്പ്, ജില്ലാ ജനറല് സെക്രട്ടറി വി.അബ്ദുല് വഹാബ് എന്നിവര് സ്ത്രീ വിരുദ്ധ പരാമര്ശവും പ്രചാരണവും നടത്തിയെന്ന പേരിലാണ് ഹരിത സംസ്ഥാന കമ്മിറ്റിയിലെ 10 അംഗങ്ങള് വനിത കമ്മിഷനെ സമീപിച്ചത്.ഹരിതയിലെ പത്ത് അംഗങ്ങള് വനിതാ കമ്മിഷന് നല്കിയ ലൈംഗിക അധിക്ഷേപ പരാതിയില് പി കെ നവാസിനെ അറസ്റ്റ് ചെയ്തിരുന്നു.
"
https://www.facebook.com/Malayalivartha
