സല്യൂട്ട് വിവാദം കത്തി നില്‍ക്കവേ സുരേഷ് ഗോപിയെ ആരൊക്കെ ഇന്നലെ സല്യൂട്ട് ചെയ്യുന്നു എന്നറിയാന്‍ വലിയ മാധ്യമ പടയാണ് കാത്ത് നിന്നത്.

സുരേഷ് ഗോപിയുടെ പരിപാടി കവര്‍ ചെയ്യാതെ മാറിനിന്ന ചാനലുകള്‍ക്കുള്ള കനത്ത അടിയാണ് കഴിഞ്ഞ ദിവസം കിട്ടിയത്. ലോക്കല്‍ ചാനലിന് മാത്രമാണ് സുരേഷ് ഗോപിയെ സല്യൂട്ട് അടിക്കുന്ന വിഷ്വല്‍ കിട്ടിയത്. ആ ചാനലിന്റെ വാട്ടര്‍ മാര്‍ക്ക് വച്ചാണ് കൊമ്പന്‍മാരായ ചാനലുകള്‍ വാര്‍ത്ത നല്‍കിയത്. എന്നാല്‍ അത് വീണ്ടും വരാതിരിക്കാന്‍ ചാനലുകള്‍ അണി നിരന്നു.

സല്യൂട്ട് വിവാദം കത്തി നില്‍ക്കെ ഇന്നലെ പാലായില്‍ തന്നെ തുടരെ സല്യൂട്ട് ചെയ്ത പാലാ എസ്.എച്ച്.ഒ കെ.പി.ടോംസണെ അടുത്തു വിളിച്ച് സുരേഷ് ഗോപി എം.പി ചെവിയില്‍ മന്ത്രിച്ചു. അത് സസ്‌പെന്‍സായിരിക്കട്ടെയെന്ന് സുരേഷ് ഗോപി. വി.ഐ.പി പൊതുസ്ഥലത്ത് ചെവിയില്‍ പറഞ്ഞത് പുറത്തു പറയില്ലെന്ന് ഇന്‍സ്‌പെക്ടറും!

ഇന്നലെ ബിഷപ്പ് ഹൗസില്‍ വച്ചും തുടര്‍ന്ന് മുത്തോലി പഞ്ചായത്തില്‍ പൊതുപരിപാടി സ്ഥലത്തുവച്ചും സുരേഷ് ഗോപിയെ ടോംസണ്‍ സല്യൂട്ട് ചെയ്തു. രണ്ടാമത്തെ സല്യൂട്ട് തൊഴുകൈകളോടെ സ്വീകരിച്ച സുരേഷ് ഗോപി ടോംസണടുത്തേക്കു വന്ന് ചേര്‍ത്തുനിറുത്തി ചെവിയില്‍ എന്തോ പറഞ്ഞു. ചിരിച്ചു കൊണ്ട് ടോംസണ്‍ തലയാട്ടി.

ഒരു പൊലീസ് ഓഫീസര്‍ എന്ന നിലയില്‍ എനിക്ക് ഒരുപാട് സന്തോഷം തോന്നിയ വാക്കുകളാണ് അദ്ദേഹം പറഞ്ഞത്. അത് എന്നുമെന്റെ മനസില്‍ തന്നെ ഇരിക്കട്ടെ ' മാദ്ധ്യമപ്രവര്‍ത്തകര്‍ തുടരെ ചോദിച്ചപ്പോള്‍ ഇത്രമാത്രം പറഞ്ഞ് ടോംസണ്‍ തലയൂരി.

അതേസമയം സല്യൂട്ട് വിവാദത്തില്‍ നിലപാട് വ്യക്തമാക്കി സുരേഷ് ഗോപി രംഗത്തെത്തി. സല്യൂട്ട് എന്ന് പറയുന്ന പരിപാടിയേ അവസാനിപ്പിക്കണമെന്നും ആരെയും സല്യൂട്ട് ചെയ്യണ്ടെന്നും അദ്ദേഹം പറഞ്ഞു. അതില്‍ രാഷ്ട്രീയ വേര്‍തിരിവ് വരുന്നത് അഗീകരിക്കില്ല. ഇന്ത്യയില്‍ ഒരു സംവിധാനമുണ്ട്, അത് അനുസരിച്ചേ പറ്റൂവെന്നും അദ്ദേഹം പറഞ്ഞു. പാല ബിഷപ്പ് ഹൗസിലെത്തി ബിഷപ്പുമായി കൂടിക്കാഴ്ച നടത്തിയ ശേഷം മാധ്യമപ്രവര്‍ത്തകരോട് പ്രതികരിക്കുകയായിരുന്നു സുരേഷ് ഗോപി.

സല്യൂട്ട് വിവാദമാക്കിയതാരാണ്? ആ പോലീസ് ഓഫീസര്‍ക്ക് പരാതിയുണ്ടോ? പോലീസ് അസോസിയേഷനാണ് പരാതി ഉന്നയിച്ചതെന്ന് മാധ്യമപ്രവര്‍ത്തകര്‍ പറഞ്ഞപ്പോള്‍ അസോസിയേഷനോ, ആരുടെ അസോസിയേഷന്‍ എന്നാണ് സുരേഷ് ഗോപി ചോദിച്ചത്. ആ അസോസിയേഷന്‍ ജനാധിപത്യ സംവിധാനത്തിലുള്ളതല്ല. അസോസിയേഷനൊന്നും ജനങ്ങള്‍ക്ക് ചുമക്കാന്‍ പറ്റില്ല. അത് അവരുടെ ക്ഷേമത്തിന് മാത്രം. അതുവെച്ച് രാഷ്ട്രീയമൊന്നും കളിക്കരുത് എന്നും അദ്ദേഹം പറഞ്ഞു.

സല്യൂട്ട് നല്‍കാന്‍ പാടില്ലെന്ന് ആരാണ് പറഞ്ഞത്? അങ്ങനെ പറയാന്‍ പറ്റില്ല. പോലീസ് കേരളത്തിലാണ്. ഇന്ത്യയില്‍ ഒരു സംവിധാനമുണ്ട്. അത് അനുസരിച്ചേ പറ്റൂ. നാട്ടുനടപ്പ് എന്ന് പറയുന്നത് രാജ്യത്തെ നിയമത്തെ അടിസ്ഥാനമാക്കിയാണ്. ഡിജിപി അല്ലേ നിര്‍ദേശം കൊടുക്കേണ്ടത്. അദ്ദേഹം പറയട്ടെ. സല്യൂട്ട് നല്‍കണ്ട എന്നവര്‍ വിശ്വസിക്കുന്നുവെങ്കില്‍ പാര്‍ലമെന്റിലെത്തി ചെയര്‍മാന് പരാതി നല്‍കട്ടെയെന്നും അദ്ദേഹം കൂട്ടിച്ചേര്‍ത്തു.

പാലാ ബിഷപ്പ് വര്‍ഗീയ പരാമര്‍ശം ഒന്നും നടത്തിയിട്ടില്ലെന്നും സുരേഷ് ഗോപി പറഞ്ഞു. അദ്ദേഹം ഒരു മതവിഭാഗത്തിനെ പോലും പറഞ്ഞിട്ടില്ല. തീവ്രവാദമാണ് എന്ന് പറയുമ്പോള്‍ ഒരു വിഭാഗം അത് ഞങ്ങളെയാ ഉദ്ദേശിച്ചതെന്ന് പറഞ്ഞ് ഏറ്റെടുത്താലെങ്ങനാ? ഒരു മതത്തിനേയും അദ്ദേഹം പരാമര്‍ശിച്ചിട്ടില്ല. ചില പ്രവര്‍ത്തനങ്ങള്‍ പരാമര്‍ശിച്ചിട്ടുണ്ടാകും. ചോദ്യങ്ങള്‍ ഉന്നയിച്ച മാധ്യമപ്രര്‍ത്തകരോട് രൂക്ഷമായ ഭാഷയിലാണ് അദ്ദേഹം പ്രതികരിച്ചത്.