കനയ്യകുമാറിന് പിന്നാലെ എല്ദോ എബ്രഹാമും കോണ്ഗ്രസിലേക്കോ? വിയര്ത്ത് തളര്ന്ന് സി പി ഐ
കനയ്യ കുമാറിന് പിന്നാലെ മൂവാറ്റുപുഴയിലെ മുന് എം എല് എ എല്ദോ എബ്രഹാമും കോണ്ഗ്രസിലേക്കോ?
പി എസ് പ്രശാന്തിനെയും അനില് കുമാറിനെയും പോലുള്ള നേതാക്കളെ എ .കെ ജി സെന്ററിലെത്തിച്ച് ചുവന്ന മാലയിട്ടതിനുള്ള പ്രതികാരത്തിനായി കാത്തിരിക്കുകയാണ് കെ സുധാകരനും വി.ഡി.സതീശനും. എല്ദോ എബ്രഹാമിനെയാണ് ഇവര് നോട്ടമിട്ടിരിക്കുന്നത്. സി പി എം നേതാക്കളെ കൈക്കലാക്കുന്നതില് ബുദ്ധിമുട്ട് നേരിടുമെന്ന് കോണ്ഗ്രസിനറിയാം. അതുകൊണ്ടാണ് സി പി ഐ യെ നോട്ടമിട്ടിരിക്കുന്നത്.
മുതിര്ന്ന നേതാക്കളെ അപമാനിക്കുന്ന രീതി ഇടതു മുന്നണിയില് പതിവില്ല.എന്നാല് എല്ദോ എബ്രഹാം മുതിര്ന്ന നേതാവിനെതിരെ രംഗത്തെത്തിയത് കോണ്ഗ്രസില് നിന്നു കിട്ടിയ ഗ്രീന് സിഗ്നലിന്റെ തടിസ്ഥാനത്തിലാണെന്നു വേണം കരുതാന്.
സിപിഐ എറണാകുളം ജില്ലാ നേതൃത്വത്തെയാണ് എല്ദോ പരോക്ഷമായി പരിഹസിച്ചതെങ്കിലും കാനത്തിന് ഉള്പ്പെടെ ക്യത്യമായ കുത്തുണ്ടായിരുന്നു. മസാലദോശയും ചമ്മന്തിയുമില്ലാത്ത ആര്ഭാടമില്ലാത്ത മാമോദീസ എന്നാണ് മകളുടെ മാമോദിസ ചിത്രത്തോടൊപ്പം എല്ദോ ഫേസ്ബുക്കില് കുറിച്ചത്. മൂവാറ്റുപുഴയിലെ തെരഞ്ഞെടുപ്പ് തോല്വി സംബന്ധിച്ച പാര്ട്ടി വിലയിരുത്തലിന് പരോക്ഷ മറുപടിയാണ് ഇതെന്നാണ് വിലയിരുത്തല്.
എല്ദോയുടെ ആര്ഭാട വിവാ?ഹം മൂവാറ്റുപുഴയിലെ എല്ഡിഎഫ് തോല്വിക്ക് കാരണമായെന്നായിരുന്നു സിപിഐ ജില്ലാ നേതൃത്വത്തിന്റെ കണ്ടെത്തല്. എറണാകുളം ജില്ലാ സെക്രട്ടറി പി രാജുവാണ് ഈ കണ്ടെത്തല് സിപിഐ സംസ്ഥാന കൗണ്സില് യോഗത്തില് അവതരിപ്പിച്ചത്. വിവാഹ നടത്തിപ്പിന് നേതൃത്വം നല്കിയ നേതാവ് തന്നെ വിമര്ശനമുന്നയിച്ചപ്പോള് യോഗത്തില് ഉരുളക്ക് ഉപ്പേരി പോലുള്ള മറുപടിയാണ് പാര്ട്ടി സംസ്ഥാന അധ്യക്ഷന് കാനം രാജേന്ദ്രന് നല്കിയത്. അന്ന് വിവാഹത്തിന്റെ കാര്മ്മികരില് ഒരാളായി നിന്നപ്പോഴും പഴയിടത്തിന്റെ സദ്യ കഴിച്ചപ്പോഴും ഈ തോന്നല് ഉണ്ടായില്ലേ എന്നായിരുന്നു കാനം രാജേന്ദ്രന്റെ മറുപടി.
എല്ദോയുടെ മകള്ക്ക് കല്ലൂര്ക്കാട് സെന്റ് അഗസ്റ്റിന് പള്ളിയില് ലളിതമായ മാമ്മോദിസ ചട ങ്ങാണ് നടന്നത്. എലൈന് എല്സ എല്ദോ എന്ന പേരും നാമകരണം ചെയ്തു.2021 മെയ് 24 നാണ് മോള് ജനിച്ചത്. എലൈന് എന്നാല് 'സൂര്യനെപ്പോലെ പ്രകാശിക്കുന്നവള് ' എന്നാണ് എല്ദോ വിശ്വസിക്കുന്നത്.
മകള് വേഗതയില് ഓടി എല്ലായിടത്തും പ്രകാശം പരത്തും. നന്മയുടെ വിത്തുപാകും.പുതു തലമുറയ്ക്ക് പ്രചോദനമാകും. പാവപ്പെട്ടവര്ക്കൊപ്പം എക്കാലവും ഉണ്ടാകും. ശരിയുടെ പക്ഷത്ത് ചേരും .തിന്മകള്ക്കെതിരെ പടവാള് ഉയര്ത്തും. നാടിന്റെ മുന്നോട്ടുള്ള പ്രയാണത്തില് പതാകവാഹകയാകും. തന്റെയും ഭാര്യ ഡോക്ടര് ആഗിയുടെയും ബന്ധുക്കള് മാത്രം ചടങ്ങിന്റെ ഭാഗമായെന്നാണ് എല്ദോ പറഞ്ഞത്. ജലത്താല് ശുദ്ധീകരിച്ച ഞങ്ങളുടെ മകളെ എലൈന് എന്ന് എല്ലാവരും വിളിക്കുമെന്ന് എല്ദോ എഫ് ബി യില് എഴുതി.
മൂവാറ്റുപുഴയില് മുങ്ങി താണതെങ്ങനെ എന്ന് ചിന്തിച്ച് ചിന്തിച്ച് ജില്ലാ നേതൃത്വം എത്തിയ നിഗമനമാണ് വിചിത്രം. എംഎല്എയായിരിക്കുമ്പോള് എല്ദോ എബ്രഹാമിന്റെ വിവാഹത്തിന് കിട്ടിയ മാധ്യമ ശ്രദ്ധയും വിഹാഹ നടത്തിപ്പിലെ ആഡംബരവും എതിരായി എന്നാണ് ജില്ലാ സെക്രട്ടറി പി.രാജുവിന്റെ കണ്ടെത്തല്. സിപിഐ സംസ്ഥാന കൗണ്സിലിലും ജില്ലയില് സംപൂജ്യരായതിന്റെ കാരണം രാജു നിരത്തിയത് ഇങ്ങനെയാണ്.
പട്ടിണിയും ദാരിദ്ര്യവും ലാളിത്യവും പറഞ്ഞ് വോട്ട് നേടിയ എല്ദോ എബ്രഹാമിനെ 2016ല് തെരഞ്ഞെടുത്ത മൂവാറ്റുപുഴക്കാര് 2021ല് എല്ദോയെ കൈവിട്ടതില് മണ്ഡലത്തിലുണ്ടായ അടക്കം പറച്ചിലുകള് പാര്ട്ടി യോഗത്തില് ഉയര്ത്തിയതാണ് രാജുവിന് വിനയായത്.
ഓര്ത്തോഡോക്സ് യാക്കോബായ തര്ക്കത്തില് ഒരു വിഭാഗത്തിന്റെ ആളായി എല്ദോ വിശേഷിപ്പിക്കപ്പെട്ടത് അടക്കം രാഷ്ട്രീയ കാരണങ്ങളും തോല്വിക്ക് കാരണമായതായി ചര്ച്ചയില് ഉയര്ന്നു. തെരഞ്ഞെടുപ്പ് പ്രചാരണത്തില് യുഡിഎഫിന് ഒപ്പമെത്താന് വ്യക്തിപരമായി എല്ദോക്കുണ്ടായ കടുത്ത സാമ്പത്തിക ബാധ്യതകളും സിപിഐ ഗൗരവത്തോടെ കാണുന്നു. സാമ്പത്തിക പ്രതിസന്ധിയിലേക്ക് എല്ദോയെ തള്ളിവിടാതെ ബാധ്യതകള് പാര്ട്ടി കൂടി ഏറ്റെടുക്കണമെന്ന അഭിപ്രായവും ശക്തമാണ്. കാനം പങ്കെടുത്ത് എറണാകുളം ജില്ലാ കമ്മിറ്റിയും സംസ്ഥാന നേതാക്കള് പങ്കെടുത്ത് മൂവാറ്റുപുഴ മണ്ഡലം കമ്മിറ്റിയും ചേരാന് തീരുമാനിച്ചിട്ടുണ്ട്.
ഏതായാലും എല്ദോയെ കോണ്ഗ്രസിലെത്തിക്കാനുള്ള ശ്രമങ്ങള് വിജയിക്കുമോ എന്നറിയില്ല. അത് എന്തായാലും ഇടതുമുന്നണിയില് നിന്നും പ്രമുഖ നേതാക്കളെ കോണ്ഗ്രസിലെത്തിക്കാനുള്ള ശ്രമമാണ് നടക്കുന്നത്.
https://www.facebook.com/Malayalivartha
