പ്രവാസികൾക്ക് വമ്പൻ ഓഫറുമായിഇത്തിഹാദ് എയര്‍വെയ്‌സ്. ദുബായിലെ മാള്‍ ഓഫ് എമിറേറ്റ്സിലുള്ള പോപ് അപ് സ്റ്റാന്റില്‍ നിന്ന് വിമാന ടിക്കറ്റ് വാങ്ങുന്നവര്‍ക്ക് നിരക്കില്‍ 50 ശതമാനം ഇളവ് പ്രഖ്യാപിച്ചിരിക്കുകയാണ്.

സപ്തംബര്‍ 16 മുതല്‍ 23 വരെ ഇത്തിഹാദിന്റെ ആനുകൂല്യം കിട്ടും .ഇത്തിഹാദിന്റെ പോപ് അപ് സ്റ്റാന്‍ഡ് പ്രവര്‍ത്തിക്കുന്നത് സാധാരണ ദിവസങ്ങളില്‍ രാവിലെ 10 മുതല്‍ രാത്രി 10 വരെയാണ് . വാരാന്ത്യ ദിനങ്ങളില്‍ അര്‍ധരാത്രി വരെയുണ്ട് . മാള്‍ ഓഫ് എമിറേറ്ന്റെ താഴത്തെ നിലയില്‍ പ്രവര്‍ത്തിക്കുന്ന ഇത്തിഹാദ് സ്റ്റാന്റില്‍ കുട്ടികള്‍ക്ക് വിനോദത്തിനുള്ള സൗകര്യവുമുണ്ട്.

ഇവിടെ നിന്ന് ടിക്കറ്റെടുക്കുന്നവര്‍ക്ക് ഭാവിയിലെ ടിക്കറ്റ് ബുക്കിംഗിന് 25 ശതമാനം ഡിസ്‌കൗണ്ട് അനുവദിക്കുന്ന കോഡും ലഭിക്കും. ആ കോഡ് ഉപയോഗിച്ചാല്‍ പിന്നീടുള്ള യാത്രകളില്‍ ടിക്കറ്റ് നിരക്കിന്റെ നാലിലൊന്ന് ഇളവ് ലഭിക്കും.

ഇക്കോണമി, ബിസിനസ്, ഫസ്റ്റ് ക്ലാസ്സ് ടിക്കറ്റുകള്‍ക്കും ഈ ഓഫറുകള്‍ ലഭ്യമാകുമെന്ന് ഇത്തിഹാദ് എയര്‍വെയ്‌സിന്റെ ബ്രാന്റ് മാര്‍ക്കറ്റിംഗ് ആന്റ് സ്‌പോണ്‍സര്‍ഷിപ്പ് വൈസ് പ്രസിഡന്റ് ആമിന താഹിര്‍ അറിയിച്ചു. ദുബായില്‍ നിന്നുള്ള യാത്രക്കാരെ ആകര്‍ഷിക്കുകയെന്ന ലക്ഷ്യത്തിന്റെ ഭാഗമായാണ് പുതിയ പരിഷ്കാരങ്ങൾ.

അബൂദാബിയിലേക്ക് വിദേശത്തു നിന്നെത്തുന്ന വാക്‌സിന്‍ സ്വീകരിച്ച യാത്രക്കാര്‍ക്ക് ക്വാറന്റൈന്‍ ഇളവ് നല്‍കാനുള്ള തീരുമാനത്തിന്റെ പശ്ചാത്തലത്തില്‍ ആളുകളെ കൂടുതലായി യാത്ര ചെയ്യാന്‍ കൂടുതൽ പ്രോത്സാഹനം നൽകുകയാണ് ലക്ഷ്യം .

അബുദാബിയില്‍ നിന്ന് ഇത്തിഹാദ് വിമാനത്തില്‍ യാത്ര ചെയ്യുകയെന്നത് ദുബായ് നിവാസികള്‍ക്കും ഏറെ എളുപ്പമാണ് എന്ന് തെളിയിക്കാൻ വേണ്ടിയാണ് മാള്‍ എമിറേറ്റില്‍ തന്നെ ഇത്തരമൊരു ഓഫര്‍ അവതരിപ്പിച്ചതെന്നും അവര്‍ പറഞ്ഞു.

ദുബായില്‍ നിന്ന് അബൂദാബി ഇന്റര്‍നാഷനല്‍ എയര്‍പോര്‍ട്ടിലേക്കും തിരിച്ചും സൗജന്യ വാഹന സര്‍വീസ് ഉണ്ടായിരിക്കുന്നതാണെന്നും ഇത് യാത്ര കൂടുതല്‍ അനായാസമാക്കുമെന്നും അവര്‍ വ്യക്തമാക്കി.